ខេត្តកំពង់ស្ពឺ ៖ អ្នកបើកបរបានចុះពីរថយន្តដឹកថ្ម គេចខ្លួនពីកន្លែងកើតហេតុ ក្រោយបង្កគ្រោះថ្នាក់ចរាចរណ៍ បើកចុះចំណោតហើយដាច់ហ្វ្រាំងរេចង្កូតធ្លាក់ផ្លូវ នៅចំណុចលោកយាយម៉ៅ ពេជ្រនិល បណ្ដាលឲ្យខូចខាតរបាំងដែក រាំងផ្លូវ ច្រើនផ្ទាំង ។
ករណីគ្រោះថ្នាក់ចរាចរណ៍នេះ កើតឡើងកាលពីវេលាម៉ោង០២និង៥០នាទីរសៀលថ្ងៃសៅរ៍ ទី១០ ខែកក្កដា ឆ្នាំ២០២១ ត្រង់ចន្លោះគីឡូម៉ែតលេខ ១០៣-១០៤ ផ្លូវជាតិលេខ៤ ។
មន្ត្រីនគរបាលខេត្តកំពង់ស្ពឺ បានអោយដឹងថា មានរថយន្តមួយគ្រឿងម៉ាកហ៊ីយ៉ាន់ដាយ ពណ៍ស ពាក់ស្លាកលេខភ្នំពេញ 3E-1085 លេខសណ្តោងព្រះសីហនុ 4A-2899 ប្រភេទ V1 បើកបរក្នុងទិសដៅ ពីកើតទៅលិច បានបើកធ្លាក់ផ្លូវ បណ្តាលអោយខូចខាតរបាំងដែកការពារផ្លូវប្រហែល៥០ម៉ែត្រ រថយន្តក៏រេចង្កូតមកផ្លូវខាងឆ្វេងដៃ ធ្លាក់ចូលប្រឡាយទឹកអូរ ទៅមុខលែងរួច ។
មន្ត្រីនគរបាលខេត្តកំពង់ស្ពឺ បញ្ជាក់ថា ចំពោះមូលហេតុបណ្ដាលមកពីលក្ខណៈបច្ចេកទេស នៃរថយន្ត (ដាច់ហ្វ្រាំង) ។ ក្រោយកើតហេតុ អ្នកបើកបរបានគេចខ្លួន ពេលសមត្ថកិច្ចទៅដល់ ។ យ៉ាងណាហេតុការណ៍នេះ មិនមានបង្កគ្រោះថ្នាក់ដល់អ្នកដំណើរផ្សេងឡើយ ។
បច្ចុប្បន្ន សមត្ថកិច្ចនគរបាលចរាចរណ៍ កំពុងតែពិនិត្យស្រាវជ្រាវស្វែងរកម្ចាស់ក្រុមហ៊ុនមកទទួលខុសត្រូវ និងចាត់ការស្ទួចយកមករក្សាទុកនៅអធិការដ្ឋាននគរបាលស្រុកភ្នំស្រួច ដើម្បីចំណាត់ការតាមនីតិវិធី ៕
ចែករំលែកព័តមាននេះ