ខេត្តកំពង់ឆ្នាំង ៖ រដ្ឋបាលសាលាខេត្តកំពង់ឆ្នាំង នៅព្រឹកថ្ងៃទី១០ ខែកក្កដា ឆ្នាំ២០២១ បានចេញលិខិតសម្រេចបិទជាបណ្ដោះអាសន្នផ្សារលើក្រុងកំពង់ឆ្នាំងតទៅរហូតដល់មានការជូនដំណឹងថ្មី បន្ទាប់ពីសន្ទុះនៃការឆ្លងកូវីដ១៩ កើតឡើងច្រើនពេក ។
ថ្ងៃជាមួយគ្នានេះដែរ រដ្ឋបាលសាលាខេត្តក៏បានចេញលិខិតមួយផ្សេងទៀតស្ដីពីការរកឃើញអ្នកឆ្លង covid-19 ថ្មី ត្រឹមថ្ងៃទី៩ ខែកក្កដាម្សិលមិញនេះ រហូតដល់ទៅ៦៦ នាក់ ។ ដែលក្នុងនោះមានអាជីវករ ,កម្មករ,បុគ្គលិកធនាគារ, និងមន្ត្រីរាជការ ។
ក្នុងលិខិតជូនដំណឹងរបស់រដ្ឋបាលសាលាខេត្តកំពង់ឆ្នាំងក៏បានបញ្ជាក់ថា ៖ ចំពោះអ្នកវិជ្ជមានកូវីដ១៩ ថ្មីទាំង៦៦នាក់ត្រូវបានយកទៅដាក់ឲ្យសម្រាកនៅមន្ទីរពេទ្យខេត្តកំពង់ឆ្នាំង, មណ្ឌលព្យាបាលវិទ្យាល័យតេជោហ៊ុនសែនទឹកហូត, មណ្ឌលព្យាបាលវិទ្យាល័យហ៊ុនសែន កំពង់ត្រឡាច, និងមណ្ឌលព្យាបាលវិទ្យាល័យហ៊ុនសែនបរិបូណ៌ ។
ជាមួយគ្នាដែលរដ្ឋបាលសាលាខេត្តក៏បានអំពាវនាវឲ្យអ្នកដែលមានប្រាស្រ័យទាក់ទងដោយផ្ទាល់ និងប្រយោលជាមួយអ្នកវិជ្ជមានកូវីដ១៩ ខាងលើរយៈពេល១៤ថ្ងៃមុន សូមពិនិត្យសំណាកជាបន្ទាន់ នៅមន្ទីរពេទ្យខេត្តកំពង់ឆ្នាំង មន្ទីរពេទ្យបង្អែកកំពង់ត្រឡាច ឬមណ្ឌលសុខភាពដែលនៅជិតបំផុត ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ ។
សូមបងប្អូនប្រជាពលរដ្ឋ ត្រូវអនុវត្តឲ្យបានខ្ជាប់ខ្ជួននូវវិធានការ ៣ការពារ និង៣កុំ ដើម្បីគ្រួសារយើង និងសង្គមជាតិយើង ។ ជាមួយនឹងសេចក្តីជូនដំណឹងស្តីពីការហ៊ុមព័ទ្ធបិទផ្សារលើក្រុងកំពង់ឆ្នាំង ដោយផ្អាកការលក់ដូរជាបណ្ដោះអាសន្ននេះផងដែរ រដ្ឋបាលសាលាខេត្តក៏បានអំពាវនាវឲ្យប្រជាពលរដ្ឋជុំវិញផ្សារ និងអាជីវករសូមប្រញាប់ទៅយកសំណាកជាបន្ទាន់ ចាប់ពីថ្ងៃទី១០ ខែកក្កដា រៀងរាល់ម៉ោងធ្វើការ និងសូមអាជីវករទាំងអស់ដាក់ខ្លួនធ្វើចត្តាឡីស័កនៅតាមផ្ទះអោយបានត្រឹមត្រូវផងដែរ ។
ដោយឡែកយោងតាមប្រភពពីមន្ត្រីនៃមន្ទីរសុខាភិបាលខេត្តកំពង់ឆ្នាំង ដែលបានយកសំណាកអ្នកពាក់ព័ន្ធលើអាជីវករទាំងផ្សារឆ្នាំង និងផ្សារលើក្រុងកំពង់ឆ្នាំង នៅព្រឹកថ្ងៃទី១០ ខែកក្កដា ឆ្នាំ២០២១ ជាលទ្ធផលបណ្តោះអាសន្នលើតេស្តរហ័សបានរកឃើញ អ្នកវិជ្ជមានថ្មីចំនួន១៩នាក់បន្ថែមទៀត នេះនៅមិនទាន់គិតពីតាម បណ្តាស្រុកទាំង៧ទៀតផង ។
គួររំឮកថា ៖ ដើម្បីជាវិធានការនៃការទប់ស្កាត់ការរីករាលដាលនៃជម្ងឺកូវីដ១៩ រដ្ឋបាលសាលាខេត្តកំពង់ឆ្នាំងបានសម្រេចបិទផ្សារ និងតំបន់ជុំវិញផ្សារឆ្នាំង កាលពីថ្ងៃទី៨ កក្កដា លុះដល់ថ្ងៃទី១០ ខែដដែលបានសម្រេចបិទផ្សារលើក្នុងកំពង់ឆ្នាំងមួយបន្ថែមទៀត បន្ទាប់ តែរយៈ២ថ្ងៃសោះសន្ទុះនៃការរកឃើញអ្នកឆ្លងកូវីដសហគមន៍២០ កុម្ភៈមានចំនួនច្រើនពេក ៕
ចែករំលែកព័តមាននេះ