ខេត្តកំពង់ឆ្នាំង៖ នៅក្នុងឱកាសចុះសាកសួរសុខទុក្ខប្រជាពលរដ្ឋចំនួន៩៣គ្រួសារ ដែលកំពុងរាំងខ្ទប់មិនឱ្យចេញចូលនៅតំបន់ផ្សារឆ្នាំង ក្រុងកំពង់ឆ្នាំង នាព្រឹកថ្ងៃទី១០ ខែកក្កដា ឆ្នាំ២០២១ ឯកឧត្តម ស៊ុន សុវណ្ណារិទ្ធិ…
ខេត្តកំពង់ឆ្នាំង៖ នៅក្នុងឱកាសចុះសាកសួរសុខទុក្ខប្រជាពលរដ្ឋចំនួន៩៣គ្រួសារ ដែលកំពុងរាំងខ្ទប់មិនឱ្យចេញចូលនៅតំបន់ផ្សារឆ្នាំង ក្រុងកំពង់ឆ្នាំង នាព្រឹកថ្ងៃទី១០ ខែកក្កដា ឆ្នាំ២០២១ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង អមដំណើរដោយ លោកជំទាវ ប៊ន សុភី អភិបាលរងខេត្ត បានមានប្រសាសន៍ថា៖ ទុក្ខកង្វល់របស់បងប្អូនប្រជាពលរដ្ឋ គឺជាទុក្ខកង្វល់របស់អាជ្ញាធរខេត្ត និងរាជរដ្ឋាភិបាល ។ ថ្ងៃនេះក្នុងនាមអាជ្ញាធរខេត្ត ក្រុង សូមនាំនូវអំណោយបន្តិចបន្តួច ថ្វីបើមិនច្រើន ក៍ពិតមែន តែមានអត្ថន័យ ជ្រាលជ្រៅ សម្រាប់បងប្អូនដែលកំពុងតែជាប់ ធ្វើចិត្តាឡីស័ក នៅតាមផ្ទះ ក្នុងតំបន់ ហាមឃាត់ក្នុងសង្កាត់ផ្សារឆ្នាំងនេះ ។
ឯកឧត្តម អភិបាលខេត្តកំពង់ឆ្នាំង មានប្រសាសន៍បន្តថា៖ ការបិទខ្ទប់បែបនេះ គឺជាវិធានការដ៏ចាំបាច់របស់អាជ្ញាធរខេត្ត និងមន្ត្រីជំនាញមន្ទីរសុខាភិបាល ដែលបានអនុវត្តទៅតាមការណែនាំរបស់ក្រសួង និងរាជ រដ្ឋា ភិបាល ដើម្បីទប់ស្កាត់ការចម្លង រីករាល ដាលនៃជំងឺកូវីដ19 ។ ហេតុដូច្នេះសូមបងប្អូននៅតាមលំនៅដ្ឋានបន្តភាពអត់ ធ្មត់ និងចូលរួមទប់ស្កាត់ទាំងអស់គ្នា ។
នៅក្នុងឱកាសនោះស្ត្រីម្នាក់ ឈ្មោះ ស្រី ពេជ្រ ដែលរស់នៅផ្ទះជួល ក្នុងបរិវេណជាប់ផ្សារឆ្នាំងបានលើកសំណូមពរដល់ឯកឧត្តមអភិបាលខេត្តថា៖ចាប់តាំងពីបិទព័ទ្ឋការចេញចូលតំបន់ផ្សារឆ្នាំងមក អគ្គីសនីក៍ដាច់ដែរ .ចំណែកផ្ទះជួលមាន ១០ បន្ទប់ មានអ្នកស្នាក់នៅ១០គ្រួសារ ហើយក្នុងចំណោមនោះមានខ្លះវិជ្ជមាន កូវីត១៩ កំពុងតែទៅព្យាបាល ខ្លះត្រូវជាប់ធ្វើចត្តាឡីស័ក មិនអាចទៅណាបាន គ្មានលទ្ឋភាព បង់ថ្លៃបន្ទប់ជួល ១៥ម៉ឺនរៀលក្នុង១បន្ទប់ និងបានសំណូមពរ ទៅម្ចាស់ផ្ទះជួល សុំមិនបង់ថ្លៃផ្ទះ រយៈពេល ១ខែតែ ម្ចាស់ផ្ទះមិនព្រម សូមឯកឧត្តម អភិបាលខេត្តមេត្តាជួយដោះស្រាយ ។
ក្នុងឱកាសនោះដែរ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក៏បានជួយសម្រួលឱ្យខាងអគ្គីសនី បើកដំណើរការឡើងវិញ និងបានជួយឧបត្ថម ប្រាក់ចំនួន១លាន៥០ម៉ឺនសម្រាប់បង់ ថ្លៃបន្ទប់ជួលរយៈពេល១ខែ ជំនួសឱ្យអ្នកស្នាក់នៅទាំង១០បន្ទប់ ផងដែរ។
បងប្អូនរស់នៅបន្ទប់ជួលទាំង ១០ គ្រួសារ ក៏ដូចជាបងប្អូនដែលរស់នៅជុំវិញបរិវេណផ្សារឆ្នាំង ដែលកំពុងតែបិទខ្ទប់ បានថ្លែងអំណរគុណយ៉ាងជ្រាលជ្រៅដល់ឯកឧត្តមអភិបាលខេត្ត ដែលបានដោះស្រាយរាល់បញ្ហាដែលកំពុងជួបការលំបាកនេះ ។ ជាមួយគ្នានេះ បងប្អូនខ្លះ លើកឡើងថា៖ ចំពោះវិធានការបិទខ្ទប់នេះ ពិតជាល្អខ្លាំងណាស់ នឹងធ្វើឱ្យមានប្រសិទ្ធភាព ពួកគាត់សូមគាំទ្រទាំងស្រុង ព្រោះបើយើងម្នាក់ៗ មិនចូលរួមទេនោះ ជំងឺកូវីដ និងរាលដាលធំជាងនេះជាមិនខានឡើយ ។
គួរបញ្ជាក់ថា៖អំណោយដែលបានចែកជូននៅពេលនោះ មាន៖អង្ករ មី ទឹកក្រូច ទឹកត្រី ទឹកស៊ីអ៊ីវ និងថវិកាផងដែរ គឺសម្រាប់ប្រជាពលរដ្ឋខ្វះខាតខ្លាំង ចំណែកខ្លះទៀត នៅមានលទ្ឋភាព ត្រូវរង់ចាំវគ្គក្រោយ ។ ដោយឡែក កម្លាំងការពារការបិទខ្ទប់ មាន៣ក្រុម គឺក្រុមនគរបាលក្រុង ក្រុមរដ្ឋបាលសាលាក្រុង និងក្រុមស្នងការដ្ឋាននគរបាលខេត្ត កំពង់ឆ្នាំង ដោយក្នុងមួយក្រុមៗ ទទួលបានថវិកា ៤០ ម៉ឺនរៀលផងដែរ៕
ចែករំលែកព័តមាននេះ