រាជធានីភ្នំពេញ ៖ ក្រុមការងារចល័តចម្រុះ បានឆ្មក់ត្រួតពិនិត្យយានយន្តលើសទម្ងន់កម្រិតកំណត់ ហើយបានឃាត់រថយន្ត ដឹកលើសទម្ងន់កម្រិតកំណត់ ចំនួន ៦គ្រឿង ដែលដឹកលើសទម្ងន់ចាប់ពី៥តោន រហូតដល់…
រាជធានីភ្នំពេញ ៖ ក្រុមការងារចល័តចម្រុះ បានឆ្មក់ត្រួតពិនិត្យយានយន្តលើសទម្ងន់កម្រិតកំណត់ ហើយបានឃាត់រថយន្ត ដឹកលើសទម្ងន់កម្រិតកំណត់ ចំនួន ៦គ្រឿង ដែលដឹកលើសទម្ងន់ចាប់ពី៥តោន រហូតដល់ ២១តោន ។
ប្រតិបត្តិការឆ្មក់ចាប់យានយន្តលើសទម្ងន់នេះ ចាប់ផ្តើមពីម៉ោង១២ថ្ងៃត្រង់ ថ្ងៃទី៩ ខែកក្កដា ឆ្នាំ២០២១ រហូតដល់ម៉ោង ៣រសៀល លើផ្លូវព្រែកហូរ ត្រង់ភូមិសាស្ត្រព្រំប្រទល់រាជធានីភ្នំពេញ-ខេត្តកណ្តាល ។
ក្នុងនោះចាប់បាន រថយន្ត ២គ្រឿង ដែលជារថយន្តដឹកជញ្ជូន បានដឹកលើសទម្ងន់លើសពី២០% នៃទម្ងន់ដែលបានអនុញ្ញាត ត្រូវបានយកមករក្សាទុក ចំនួន ១ឆ្នាំ ដោយអនុលោមតាមច្បាប់ស្តីពីផ្លូវថ្នល់ មាត្រាទី៦០ និងតាមសេចក្ដីជូនដំណឹងលេខ០៤៩ ស្តីពីការពង្រឹងវិធានការយ៉ាងតឹងរ៉ឹងបន្ថែម ចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់ ។
ក្រសួង សូមក្រើនរម្លឹកដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ សារជាថ្មីម្តងទៀតថា ក្រសួងនឹងបន្តអនុវត្តតាមច្បាប់ និងសេចក្ដីជូនដំណឹងខាងលើយ៉ាងតឹងបំផុត ដោយគ្មានការលើកលែងឡើយ ៕
ចែករំលែកព័តមាននេះ