ខេត្តកំពង់ចាម ៖ ជនសង្ស័យឈ្មោះ ផាត់ ធានី ហៅឡូញ ភេទប្រុស អាយុ២៣ឆ្នាំ រស់នៅក្នុងស្រុកកំពង់សៀម ត្រូវបានកម្លាំងសមត្ថកិច្ចចាប់ខ្លួនបញ្ជូនទៅកាន់សាលាដំបូងខេត្ត
ខេត្តកំពង់ចាម ៖ ជនសង្ស័យឈ្មោះ ផាត់ ធានី ហៅឡូញ ភេទប្រុស អាយុ២៣ឆ្នាំ រស់នៅក្នុងស្រុកកំពង់សៀម ត្រូវបានកម្លាំងសមត្ថកិច្ចចាប់ខ្លួនបញ្ជូនទៅកាន់សាលាដំបូងខេត្ត នាព្រឹកថ្ងៃទី១០ ធ្នូ ២០១៥ ដោយចោទប្រកាន់ពីបទរំលោភសេពសន្ថវៈ និងមនុស្សឃាតមិនបានសម្រេច ទៅលើស្ត្រីក្រមុំវ័យ៤៥ឆ្នាំម្នាក់ ។
លោកវរសេនីយ៍ទោ ជា ធារិទ្ធ អធិការនគរបាលស្រុកកំពង់សៀម បានឲ្យដឹងថា មុនពេលកើតហេតុ ស្ត្រីរងគ្រោះបានដឹកគោចំនួន៤ក្បាលយកទៅឱ្យស៊ីស្មៅនៅវាលស្រែ ដែលស្ថិតនៅមិនឆ្ងាយប៉ុន្មានពីភូមិ កាលពីវេលាម៉ោង២និង២០នាទីរសៀលថ្ងៃទី៨ ធ្នូ ២០១៥ ដែលជាកន្លែងស្ងាត់នោះ ស្រាប់តែត្រូវជនសង្ស័យ ឈ្មោះ ឡូញ ដែលដឹកគោចំននួន១៧ក្បាលយកទៅឱ្យស៊ីស្មៅនៅក្បែរគ្នានោះដែរ ធ្វើសកម្មភាពចាប់រំលោភសេពសន្ថវៈដើម្បីបំពេញកាមតណ្ហារួចហើយយកក្រមានិងខ្សែគោចងរឹតក ដើម្បីសម្លាប់បំបាត់ភស្តុតាង ។
លោកអធិការ បានបន្តថា ប៉ុន្តែសំណាងណាស់ ដោយទឹកដោះម្តាយថ្លៃ ស្រី្តរងគ្រោះមិនស្លាប់នោះទេគ្រាន់តែសន្លប់ ក្រោយពីដឹងខ្លួនក៏ដើរត្រឡប់មកផ្ទះដោយដឹកគោមកជាមួយផង ហើយប្រាប់ពីរឿងហេតុដែលបានកើតឡើងដល់ក្រុមសាច់ញាតិរួចរាយការណ៍ទៅនគរបាលប៉ុស្តិ៍រដ្ឋបាលជាបន្ទាន់ និងដាក់ពាក្យបណ្តឹងប្តឹងពីឈ្មោះ ផាត់ ធានី ហៅឡូញ លុះនៅវេលាម៉ោង៦និង៣០នាទីល្ងាច ជនសង្ស័យត្រូវបានសមត្ថកិច្ចមូលដ្ឋានកោះហៅមកសួរនាំនៅប៉ុស្តិ៍នគរបាលរដ្ឋបាល និងបញ្ជូនខ្លួនមកកាន់អធិការដ្ឋាននគរបាលស្រុកកំពង់សៀម ។
នៅចំពោះមុខសមត្ថកិច្ច ជនសង្ស័យរូបនេះ មិនបានឆ្លើយសារភាពពីទង្វើរបស់ខ្លួននោះទេ បើផ្អែកតាមការបំភ្លឺរបស់ស្ត្រីរងគ្រោះវិញ បានឲ្យដឹងថា នៅមុនពេលកើតហេតុជនសង្ស័យបានមកឈរនិយាយជាមួយគាត់ បន្ទាប់មកក៏ធ្វើសកម្មភាពចាប់រំលោភសេពសន្ថវៈតែម្តង ព្រមទាំងបានយកក្រមានិងខ្សែគោមករឹតកសម្លាប់ដើម្បីបំបិទមាត់ ប៉ុន្តែសំណាងល្អ គាត់មិនស្លាប់គ្រាន់តែសន្លប់ប៉ុណ្ណោះ ។
លោកអធិការនគរបាលស្រុកកំពង់សៀមបានបញ្ជាក់ថា ផ្អែកតាមភស្តុតាងដែលប្រមូលបាននៅកន្លែងកើតហេតុ និងការបំភ្លឺរបស់ស្ត្រីរងគ្រោះនោះ ករណីនេះពិតជាបង្កដោយជនសង្ស័យខាងលើប្រាកដមែន ។ ហើយពាក្យបណ្តឹងរបស់ស្ត្រីរងគ្រោះក៏បានប្តឹងជនសង្ស័យរូបនេះឲ្យចាត់វិធានការតាមផ្លូវច្បាប់ផងដែរ ៕
ចែករំលែកព័តមាននេះ