ខេត្តកណ្តាល ៖ មនុស្សចំនួន៤នាក់បានរងរបួសធ្ងន់ និងស្រាលក្នុងហេតុការណ៍គ្រោះថ្នាក់ចរាចរណ៍រថយន្តកូរ៉េដឹកគ្រឿងស្ទូចផ្ទះបើកធ្លាក់ថ្នល់ជាតិក្រឡាប់ខ្លួនឯង កាលពីវេលាម៉ោង៨ និង២០នាទីព្រឹក ថ្ងៃទី១០ ធ្នូ តាមបណ្តោយផ្លូវជាតិលេខ១ ត្រង់ចន្លោះបង្គោលគីឡូម៉ែត្រលេខ៤៨-៤៩ ស្ថិតក្នុងភូមិពោធិ៍មៀវ ឃុំគគីរធំ ស្រុកកៀនស្វាយ ។
ជនរងគ្រោះទាំង៤នាក់ ១-ឈ្មោះគឹម សំអុន ភេទប្រុស អាយុ៧៦ឆ្នាំ ជាអ្នកបើកបររថយន្តកូរ៉េទម្ងន់១តោន ពណ៌ខៀវ ពាក់ស្លាកលេខភ្នំពេញ២B ៤៦២៩ របួសស្រាល ២-ឈ្មោះឆេង លី ភេទប្រុស អាយុ៤៥ឆ្នាំ អ្នករួមដំណើររបួសស្រាល ៣-ឈ្មោះឡាច ធន ភេទប្រុស អាយុ៣៥ឆ្នាំ អ្នករួមដំណើររបួសធ្ងន់ និង៤-ឈ្មោះឌឿន ភេទប្រុស អាយុ២៧ឆ្នាំ អ្នករួមដំណើររបួសធ្ងន់។
ជនរងគ្រោះទាំង៤នាក់សុទ្ធតែជាជាងស្ទូចផ្ទះ មានទីលំនៅភូមិព្រែកត្រែង ឃុំសំរោងធំ ស្រុកកៀនស្វាយជាមួយគ្នា ។
តាមអ្នកបើកបរបានរៀបរាប់ថា មុនពេលកើតហេតុ រូបគាត់ និងកូនក្មួយដែលជាកូនជាង៣នាក់ទៀតដែលរួមដំណើរជាមួយបានបើករថយន្តដឹកគ្រឿងស្ទូចផ្ទះ ចេញពីអ្នកលឿងយកមកផ្ទះនៅក្នុងឃុំសំរោងធំ ខណៈពេលមកដល់ចំណុចខាងលើរូបគាត់បានបើករថយន្តវ៉ាម៉ូតូមួយគ្រឿងមិនចាំម៉ាកដែលបើកស្របទិសគ្នា។
គាត់បន្តថា ពេលបើកវ៉ាម៉ូតូរួច គាត់ក៏បួងចង្កូតចូលមកខាងស្តាំដៃវិញស្រាប់តែជ្រុលចង្កូតធ្លាក់ចិញ្ចើមថ្នល់ក្រឡាប់រងរបួសតែម្តងទៅ៕
ចែករំលែកព័តមាននេះ