ខេត្តកំពង់ឆ្នាំង ៖ ស្នងការដ្ឋាននគរបាលខេត្តកំពង់ឆ្នាំង នៅព្រឹកថ្ងៃទី៩ ខែកក្កដា ឆ្នាំ២០២១នេះ បានបង្ហាញមុខសញ្ញាដែលសង្ស័យថា បានសម្លា.ប់ទៅលើប្រធានក្រុមតន្ត្រីសម័យ រួចយកស.ពទៅប្លុងចោលក្នុងទន្លេមួយនៅទីក្រុងតាខ្មៅ ខេត្តកណ្ដាល កាលពីជាង១០ថ្ងៃមុន ។
លោកឧត្តមសេនីយ៍ត្រី អៀរ ប៊ុនធឿន ស្នងការរងនគរបាលខេត្តកំពង់ឆ្នាំង និងជាអ្នកនាំពាក្យនៃស្នងការដ្ឋានបានឲ្យដឹងថា ដោយមានការចង្អុលបង្ហាញពីលោកឧត្តមសេនីយ៍ទោ ខូវ លី ស្នងការរដ្ឋាននគរបាលខេត្តកំពង់ឆ្នាំង និងមានការសម្របសម្រួលពីលោក អ៊ិត សុធា ព្រះរាជអាជ្ញាអមសាលាដំបូងខេត្តផង ក៏បានឈានដល់ការឃាត់ខ្លួនជនសង្ស័យម្នាក់មានឈ្មោះ ឃុន ឌីនឿន អាយុ៣៥ឆ្នាំ មានទីលំនៅភូមិរកាដុះ ឃុំក្រាំងតាយ៉ង ស្រុកពាមជរ ខេត្តព្រៃវែង ហើយឈ្មោះនេះបានមកស្នាក់នៅ និងបម្រើការងារនៅហាងសម្រស់កំពង់ឆ្នាំង ក្រុងកំពង់ឆ្នាំង ។
ប្រភពដដែលបានបន្តថា កាលពីល្ងាចថ្ងៃទី២៧ ខែមិថុនា ឆ្នាំ២០២១ ជនរងគ្រោះឈ្មោះចាន់ គៀន អាយុ៥៦ឆ្នាំ មានទីលំនៅភូមិឧទុម្ពរ ឃុំស្វាយជ្រុំ ស្រុករលាប្អៀរ ជាប្រធានក្រុមតន្ត្រីសម័យ បានបើករថយន្តផ្ទាល់ខ្លួនមួយគ្រឿងម៉ាកតាកូម៉ា ពណ៌ខ្មៅ ពាក់ស្លាកលេខ កំពង់ឆ្នាំង 2a 2626 មកហាងផឹកស៊ីយីហោ «សម្រស់កំពង់ឆ្នាំង« ក្រុងកំពង់ឆ្នាំង ។ លុះយប់ជ្រៅបន្តិច ឈ្មោះ ចាន់ គៀន (ជនរងគ្រោះ) ក៏បានទៅដេកផ្ទះសំណាក់ជាមួយជនសង្ស័យឈ្មោះ ឃុន ឌីនឿន នៅផ្ទះសំណាក់យីហោ «វ័ន្តណាញ» ស្ថិតនៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។
ប្រភពដដែលបានបន្តថា ដោយសម្រង់ចម្លើយរបស់ជនសង្ស័យថាពេលដេកជាមួយគ្នា រហូតដល់ម៉ោងជាង៤ជិតភ្លឺ ឈានចូលថ្ងៃទី២៨ ខែមិថុនានោះ ឈ្មោះ ចាន់ គៀន (ជនរងគ្រោះ) បានគាំងបេះដូងស្លា.ប់ ។ ក្រោយពេលជនរងគ្រោះស្លា.ប់ រូបគេ (ឃុន ឌីនឿន ជាជនសង្ស័យ) មានការភ័យខ្លាចក៏បានលើកស.ពបុរសឈ្មោះ ចាន់ គៀន (ជនរងគ្រោះ) ដាក់លើរថយន្ត រួចក៏បើកទៅរាជធានីភ្នំពេញ។
ប្រភពដដែលបន្តទៀតថា លុះពេលទៅដល់ផ្សារឧត្តុង ក៏បានទិញការ៉ុងចំនួន៥ និងខ្សែសម្រាប់ចង រួចហើយក៏បើកតាមផ្លូវភ្នំព្រះរាជទ្រព្យ ស្រុកឧដ្ដុង្គ ខេត្តកំពង់ស្ពឺ ។ ខណៈពេលទៅដល់កន្លែងស្ងាត់ ក៏បានយកការ៉ុងច្រកស.ពជនរងគ្រោះពីក្បាល និងពីចុងជើង រួចចងការុងផ្អោបគ្នារួចរាល់ ទើបបន្តដំណើរទៅ ដល់ទីក្រុងភ្នំពេញ ហើយបានបើកឆ្លងទៅទីក្រុងតាខ្មៅ ខេត្តកណ្ដាល ។ លុះទៅដល់ស្ពានមួយឈ្មោះស្ពានព្រែកសំរោង នៅវេលាម៉ោង៨យប់ថ្ងៃដដែល ឃើញមានឱកាសស្ងាត់ល្អ ក៏លើកស.ពទម្លាក់ចូលក្នុងទឹកទន្លេនោះតែម្តងទៅ រួចក៏បើករថយន្តត្រឡប់មកដេកផ្ទះសំណាក់នៅរាជធានីភ្នំពេញវិញ និងបានធ្វើសកម្មភាពដោះស្លាកលេខរថយន្តចេញ ។
ប្រភពដដែលបន្តទៀតថា លុះព្រឹកឡើងក៏យករថយន្តទៅលក់ ដោយប្រាប់អ្នកទិញថា ជារថយន្តអត់ពន្ធ ទើបយកពីប្រទេសវៀតណាម ដោយលក់បានក្នុងតម្លៃ ៥៧០០ ដុល្លារ រួចក៏គេចខ្លួនទៅសម្ងំដេកនៅផ្ទះសំណាក់ រហូតដល់សមត្ថកិច្ចចាប់ខ្លួនបាននៅថ្ងៃទី៧ ខែកក្កដានេះតែម្តង ។
បើតាមអ្នកនាំពាក្យនៃស្នងការដ្ឋាននគរបាលខេត្ត ក៏បានបញ្ជាក់ថា ចំណែកអ្នកទិញរថយន្តវិញ ពេលទិញរថយន្តបានហើយ ក៏យកទៅគយដើម្បីបង់ពន្ធ ប៉ុន្តែត្រូវបានមន្ត្រីគយប្រាប់ថា ជារថយន្តមានពន្ធ មានម្ចាស់ត្រឹមត្រូវ ទើបអ្នកទិញភ្ញាក់ខ្លួនថា ទិញរថយន្តមិនប្រក្រតី ក៏រាយការណ៍ប្រាប់សមត្ថកិច្ច ទើបឈានដល់ការស្រាវជ្រាវ និងចាប់ខ្លួនជនសង្ស័យបានតែម្តង ។
ទោះបីចម្លើយសារភាពរបស់ជនសង្ស័យដែលមានភាពមិនច្បាស់លាស់យ៉ាងណាក្តី តែយោងតាមចម្លើយសារភាព និងផ្អែកតាមវត្ថុតាង សមត្ថកិច្ចសម្រេចចោទប្រកាន់ពីបទ (ឃាត.កម្ម )និង (លាក់បាំងវត្ថុតាង) ដោយបានសម្រេចកសាងសំណុំរឿងបញ្ជូនទៅតុលាការនៅព្រឹកថ្ងៃទី០៩ ខែកក្កដានេះ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ