ខេត្ដកំពត ៖ មន្ដ្រីរដ្ឋបាលព្រៃឈើ សង្កាត់កែប រួមទាំងមន្ដ្រីរដ្ឋបាលព្រៃឈើ ស្រុកកំពង់ត្រាច និងអាជ្ញាធរមូលដ្ឋានបានរក ឃើញឈើអារ៦ម៉ែត្រគូប ដែលសង្ស័យថា ក្រុមឈ្មួញដេប៉ូឈើធំៗនៅស្រុកកំពង់ត្រាច បានដឹកយកមកលាក់ទុកនៅបរិវេណផ្ទះ ប្រជាពលរដ្ឋឈ្មោះណាំ វូច នៅភូមិកំពង់ ត្រាចទី១ ឃុំកំពង់ត្រាច កាលពីសបា្ដហ៍មុន។គេបានដឹងថា លោកអ៊ិន ជីវ៉ា ស្នងការរង នគរបាលខេត្ដ និងលោកគឹម សំលេង ព្រះរាជអាជ្ញារងសាលាដំបូងខេត្ដ រួមជាមួយមន្ដ្រី នគរបាលសេដ្ឋកិច្ចខេត្ដបានចុះមកពិនិត្យម្ដងហើយ។ តាមការអះអាងពីប្រជាពលរដ្ឋថា ឈើនេះត្រូវបានគេដឹកចេញមកពីដេប៉ូឈើ ហើយមកលាក់ទុកតាមផ្ទះប្រជាពលរដ្ឋ ។
លោកសេង សុគន្ធចាត មន្ដ្រីនគរបាល សេដ្ឋកិច្ចខេត្ដបានមានប្រសាសន៍ឱ្យដឹងថា ចំនួនឈើអារ៦ម៉ែត្រគូបនេះ ត្រូវគេលួចផ្ដល់ ព័ត៌មានឱ្យសមត្ថកិច្ចដឹងថា ជាឈើគ្មានច្បាប់ ហើយម្ចាស់ដេប៉ូឈើបានលួចដឹកមកដាក់នៅផ្ទះប្រជាពលរដ្ឋនៅពេលយប់ ប៉ុន្ដែម្ចាស់ផ្ទះ ដែលគេផ្ញើឈើនោះបានអះអាងប្រាប់សមត្ថកិច្ចថា ឈើនេះជាឈើរបស់ខ្លួនដែលបានទិញ យកមកធ្វើផ្ទះ ។ លោកហុក សុកល់ ប្រធានរដ្ឋបាលព្រៃ ឈើស្រុកកំពង់ត្រាច បាននិយាយថា ឈើ ដែលលាក់ទុកនេះ ត្រូវបានអាជ្ញាធរហៅ ម្ចាស់ផ្ទះមកធ្វើកិច្ចសន្យារួចហើយ ហើយឱ្យ រក្សាឈើទុកនៅផ្ទះប្រជាពលរដ្ឋដដែល ។
ទោះបីជាយ៉ាងណាអាជ្ញាធរមានសមត្ថកិច្ច នឹងធ្វើការស៊ើបអង្កេតបន្ដ ហើយបើរកឃើញថា ឈើនេះពិតជាឈើដែលដេប៉ូគេដឹកមក លាក់ទុកមែន ម្ចាស់ផ្ទះត្រូវតែទទួលខុសត្រូវ ចំពោះមុខច្បាប់ ។ គេឃើញដេប៉ូឈើនៅ ស្រុកកំពង់ត្រាចមាន៣កន្លែងធំៗជាងគេ ហើយឈើត្រូវបានគេដឹកយកទៅលាក់តែ៣យប់អស់ពីដេប៉ូ បន្ទាប់ពីអាជ្ញាធរបានចុះរឹប អូសឈើពីដេប៉ូឈើនៅខេត្ដកំពត កាលពី ដើមខែមេសា ។
ចែករំលែកព័តមាននេះ