Straits Times កាលពីពេល ថ្មីៗកន្លងមកផ្សាយថា តុលាការហុងកុងបានពិន័យស្ត្រីជនជាតិចិនម្នាក់ចំនួន២០០០ដុល្លារហុងកុងឬប្រហែល២៥០ដុល្លារ ពីបទលួចអាវពោងសុវត្ថិភាពលើយន្តហោះរបស់ក្រុមហ៊ុនអាកាសចរណ៍
Straits Times កាលពីពេល ថ្មីៗកន្លងមកផ្សាយថា តុលាការហុងកុងបានពិន័យស្ត្រីជនជាតិចិនម្នាក់ចំនួន២០០០ដុល្លារហុងកុងឬប្រហែល២៥០ដុល្លារ ពីបទលួចអាវពោងសុវត្ថិភាពលើយន្តហោះរបស់ក្រុមហ៊ុនអាកាសចរណ៍ «Cathay Pacific» ។
សារព័ត៌មានក្នុងស្រុកផ្សាយថា ស្ត្រីជនជាតិចិនអាយុ៦៤ឆ្នាំ រស់់នៅខេត្តសានស៊ី បានលួចអាវសុវត្ថិភាព ខណៈពេលធ្វើដំណើរតាមយន្តហោះរបស់ក្រុមហ៊ុន «Cathay Pacific» ពីតៃវ៉ាន់ទៅស៊ីអាន ប៉ុន្តែបានផ្ទេរយន្តហោះនៅហុងកុង ។ សមត្ថកិច្ចនៅអាកាសយានដ្ឋានហុងកុងឆែកឃើញអាវពោងតម្លៃ៣៥០ដុល្លារហុងកុង ឬ៤៥ដុល្លារលាក់ទុកក្នុងវ៉ាលីសរបស់ស្ត្រីនោះ ។
ក្នុងសវនាការស្ត្រីជាប់ចោទបានឆ្លើយថា គាត់មិនបានដឹងថា អំពើដែលគាត់ប្រព្រឹត្តគឺជារឿងខុសច្បាប់ទេ ព្រោះយល់ថា អាវពោងជាវត្ថុអនុស្សាវរីយ៍ និងចង់យកទៅស្រុកកំណើត ។
ចៅក្រមមិនបានចាប់អារម្មណ៍នឹងការឆ្លើយដោះសាថា មិនដឹងដើម្បីបដិសេធពីកំហុសរបស់ស្ត្រីនោះទេ ដោយបញ្ជាក់ថា អំពើនោះចាត់ទុកថាជាការ «លោភ» ហួសហេតុអាចធ្វើឱ្យជីវិតរបស់អ្នកផ្សេងស្ថិតក្នុងភាពគ្រោះថ្នាក់បាន ប្រសិនបើក្រុមហ៊ុនអាកាសចរណ៍មិនដឹងថាអាវពោងនៅលើយន្តហោះបាត់ដោយសារស្ត្រីនោះលួច ។
មេធាវីរបស់ចុងចោទបានតវ៉ានៅក្នុងសវនាការថា ក្រុមហ៊ុនអាកាសចរណ៍មានមន្ត្រីត្រួតពិនិត្យថា តើមានអាវពោងសុវត្ថិភាពនៅគ្រប់កៅអីឬអត់ ? ចំណែកចៅក្រមតបថា សូម្បីតែខាងក្រុមហ៊ុនប្រហែលជាមិនអាចនឹកឃើញថានឹងមាននរណាម្នាក់ដល់ថ្នាក់ហ៊ានលួចអាវពោងសុវត្ថិភាពបែបនេះទេ ។
សារព័ត៌មាន «អូរៀនថលដេលី» ផ្សាយថា នៅពេលតុលាការកាត់ទោសរួច ចុងចោទនៅតែបដិសេធបង់ថ្លៃពិន័យដោយអះអាងថាគាត់គ្មានប្រាក់ ប៉ុន្តែតុលាការប្រាប់ថា បើមិនបង់ត្រូវជាប់គុក ដូច្នេះហើយទើបគាត់យល់ព្រមបង់ ៕
ចែករំលែកព័តមាននេះ