ខេត្តកំពង់ឆ្នាំង ៖ បន្ទាប់ពីរកឃើញអាជីវករលក់មាសក្នុងផ្សារឆ្នាំងក្នុងសង្កាត់ផ្សារឆ្នាំង ក្រុងកំពង់ឆ្នាំងម្នាក់វិជ្ជមានកូវីត19 កាលពីរសៀលថ្ងៃទី 7 នោះ នៅព្រឹកថ្ងៃទី០៨ កក្កដា ក្រុមគ្រូពេទ្យបានចុះយកសំណាកលើអាជីវករក្នុងផ្សារឆ្នាំង ជាលទ្ធផលបណ្ដោះអាសន្នរយៈពេលមួយព្រឹកបាន រកឃើញមានវិជ្ជមានជាង20នាក់ ក្នុងចំណោមជាង200នាក់ ដែលតួលេខនេះអាចបញ្ជាក់បានថា គួរព្រួយបារម្ភក្រៃលែង ។
នៅក្នុងកិច្ចប្រតិបត្តិការយកសំណាកលើអាជីវករផ្សារឆ្នាំងនោះផងដែរ គេសង្កេតឃើញវត្តមាន ឯកឧត្តម ស៊ុន សុវណ្ណារិទ្ធិ អភិបាលខេត្ត និង លោកជំទាវ ប៊ន សុភី អភិបាលរងខេត្តកំពង់ឆ្នាំង ក៏បានអញ្ជើញចូលរួមពិនិត្យមើលសកម្មភាពនេះផងដែរ ។
ជាលទ្ធផល បណ្ដោះអាសន្នលើតេស្តរហ័សរយៈពេលមួយព្រឹកនៃការយកសំណាកលើអាជីវករក្នុងផ្សារឆ្នាំង នៅព្រឹកថ្ងៃទី8 កក្កដា លើអាជីវករចំនួន 210 នាក់ ឃើញវិជ្ជមានកូវីត១៩ចំនួន23នាក់។ អាជីវករវិជ្ជមាន កូវីត19 ទាំងនោះ ត្រូវបានបញ្ជូនទៅព្យាបាលនៅមណ្ឌលព្យាបាល ស្រុកបរិបូណ៌។
ដោយឡែក នៅរសៀលថ្ងៃទី 8 ខែកក្កដា ដដែលនេះដែរ ក្រុមគ្រូពេទ្យ នឹងបោះទីតាំងនៅសួនច្បារកង្រី មុខមន្ទីរសុខាភិបាលខេត្តកំពង់ឆ្នាំង ដើម្បីយកសំណាក លើអាជីវករដែលនៅសេសសល់ និងអ្នកពាក់ព័ន្ធទាំងឡាយណា ដែលសង្ស័យថា អាចឆ្លងកូវី19 ក៍អាចយកសំណាក់នៅផ្សារនៅសួនច្បារនាងកង្រីបានដែរ ។
ជាមួយការផ្ទុះកូវីដ19 ក្នុងផ្សារឆ្នាំងនេះដែរ រដ្ឋបាលសាលាខេត្តកំពង់ឆ្នាំង ក៏បានចេញលិខិតជូនដំណឹងស្ដីពីការបិទជាបណ្ដោះអាសន្ន ក្នុងបរិវេណផ្សារឆ្នាំងនិងផ្លូវមុខផ្សារឆ្នាំង ចាប់ពីចំណុចផ្លូវលេខ 40 ទំនប់បារាំងរហូតដល់ កាច់ជ្រុងរបងវត្តយាយទេព ៕
ចែករំលែកព័តមាននេះ