ខេត្តបាត់ដំបង ៖ បុរសម្នាក់ត្រូវសមត្ថកិច្ចចុះឃាត់ខ្លួនភ្លាមៗ ក្រោយពីដកកាំភ្លើងខ្លីបាញ់គំរាមប្រពន្ធចំនួន០២គ្រាប់ កាលពីវេលាម៉ោង៧យប់ថ្ងៃទី០៦ កក្កដា នៅចំណុចភូមិរូង២ ឃុំព្រៃត្រឡាច ស្រុករុក្ខគិរី ដោយសារតែខឹងប្រពន្ធដែលចេះតែសួរដេញដោលរឿងលួចមានស្រីថ្មី។ របាយការណ៍របស់អធិការនគរបាលស្រុករុក្ខគិរីបានដឹងថា ជនសង្ស័យឈ្មោះ ហ៊ាន វិទ្ធី អាយុ៤៩ឆ្នាំ រីឯប្រពន្ធឈ្មោះ ឆោម អេម អាយុ៥៣ឆ្នាំ មានមុខរបរកសិករ រស់នៅក្នុងភូមិ ឃុំ កើតហេតុខាងលើ។
របាយការណ៍បានឲ្យដឹងទៀតថា បុរសនេះបានដកអាវុធខ្លីម៉ាក K59 ដែលគ្មានច្បាប់អនុញ្ញាតបង្ហាញនិងគំរាមកំហែងប្រពន្ធ ហើយក្រោយមកក៏បានបាញ់ដីខាងមុខផ្ទះចំនួន០២គ្រាប់ ជាការគំរាមបន្ថែមទៀត ដែលធ្វើឲ្យអ្នកភូមិភ្ញាក់ផ្អើលពេញភូមិ ហើយការផ្ទុះអាវុធនេះ ទំនងប្ដីប្រពន្ធនេះមិនចុះសម្រុងក្នុងគ្រួសារ ដោយសារលោកប្ដី លួចមានស្នេហាជាមួយស្រីក្មេងខាងក្រៅ។
លោក រើន សុខរ៉ាវ នាយប៉ុស្តិ៍រដ្ឋបាលព្រៃត្រឡាចបានឲ្យដឹងថា បើតាមចម្លើយបឋម ជនសង្ស័យឈ្មោះ ហ៊ានរិទ្ធី បានសារភាពថា ខ្លួនពិតជាបានប្រើប្រាស់កាំភ្លើងខ្លី បាញ់ដីគំរាមប្រពន្ធមែន។ ជននេះ បានសារភាពទៀតថា កាំភ្លើងនោះខ្លួនទើបទិញជាងកន្លះខែមុន នៅពេលខ្លួនទៅលេងស្រុកកំណើត នៅខេត្តកណ្ដាល។ ហើយខ្លួនទិញកាំភ្លើងយកមកលាក់ទុកនេះ គ្រាន់តែទុកសម្រាប់ដកបន្លាចប្រពន្ធ ដែលតែងរករឿងខ្លួនមិនឈប់ឈរ រឿងខ្លួនលួចមានស្រីខាងក្រៅ។
ដោយឡែក ការបំភ្លឺពីស្ត្រីជាប្រពន្ធវិញ បើតាមលោក រើន សុខរ៉ាវ ដែលបានដកស្រង់សំដី បានបញ្ជាក់ថា គាត់បានដឹងថា ប្ដីបានលួចស្និទ្ធិស្នាលយ៉ាងស៊ីជម្រៅជាមួយស្រីខាងក្រៅផ្ទះ ។ គាត់បានតាមដាន និង បានសួរនាំរឿងនេះ តែប្ដីរបស់គាត់តែងគំរាមកំហែងគាត់យ៉ាងធ្ងន់ធ្ងរត្រឡប់មកវិញ រហូតឈានទៅលួចទិញកាំភ្លើងយកមកលាក់ទុកក្នុងផ្ទះ ដើម្បីទុកបាញ់គំរាមគាត់ទៀតផង។
របាយការណ៍អធិការស្រុករុក្ខគិរី បានឲ្យដឹងថា ជាមួយនឹងការឃាត់ខ្លួននេះ សមត្ថកិច្ចដកហូតបានវត្ថុតាងរួមមាន កាំភ្លើងខ្លីម៉ាក K59 មួយដើម បង់០២ និង គ្រាប់ចំនួន០៣គ្រាប់។ ក្រោយឃាត់ខ្លួនយកទៅសួរនាំ ពេលនេះមន្ត្រីជំនាញ បានរៀបចំសំណុំរឿងបញ្ជូនជនសង្ស័យប្រើប្រាសកាំភ្លើងគ្មានច្បាប់ និង បាញ់គំរាមអាយុជីវិតប្រពន្ធខាងលើនេះ ទៅកាន់ស្នងការដ្ឋានខេត្តហើយ ដើម្បីចាត់ការតាមនីតិវិធី៕
ចែករំលែកព័តមាននេះ