ការរស់រានមានជីវិតយូរអង្វែងក្លាយជាការចាប់អារម្មណ៍ពីអ្នកវិទ្យាសាស្ត្រ និងអ្នកជំនួញ ហើយពួកគេតែងតែផ្តោតសំខាន់លើការស្វែងរកវិធីសាស្ត្រដើម្បីពន្យារជីវិតរបស់មនុស្សឱ្យរស់បានយូរឆ្នាំទៀត ។ យ៉ាងណាមិញក្រុមហ៊ុនមានមូលដ្ឋាននៅក្រុងឡូសអេនចឺឡេសសហរដ្ឋអាមេរិកឈ្មោះ «Humai» ចង់បង្កើតគំនិតថ្មីមួយឈានទៅរកដំណាក់កាលបន្ទាប់ ពោលគឺពួកគេកំពុងព្យាយាមប្រើប្រាស់ភាពឆ្លាតវៃសិប្បនិមិត្ត Artificial Intelligence (AI) ដើម្បីធ្វើឱ្យមនុស្សដែលស្លាប់ហើយរស់ឡើងវិញជារៀងរហូត ។
គំនិតនៃការធ្វើឱ្យមនុស្សរស់ឡើងវិញដោយប្រើប្រាស់AI ហាក់បីដូចជាយកគំនិតចេញពីខ្សែភាពយន្តប្រឌិតបែបវិទ្យាសាស្ត្រ ប៉ុន្តែលោកចូស បូកាណេហ្គ្រា ស្ថាបនិកក្រុមហ៊ុន Humai ធានាដល់ប្រព័ន្ធផ្សព្វផ្សាយថា លោកមានជំនឿចិត្តខ្ពស់ពីអាជីវកម្មធ្វើឱ្យមនុស្សស្លាប់រស់ឡើងវិញ ។ លោកមានជំនឿថា វាអាចនឹងក្លាយជាការណ៍ពិតអំឡុងពេល៣ទសវត្សទៀត ។ សេចក្តីថ្លែងការណ៍បេសកកម្មរបស់ក្រុមហ៊ុនគឺជាការឆ្ពោះទៅមុខដែលនឹងឈានទៅរក «ពួកយើងចង់នាំជីវិតអ្នកត្រឡប់មកវិញបន្ទាប់ពីអ្នកបានស្លាប់ទៅហើយនោះ » ។
យោងតាមគេហទំព័ររបស់ក្រុមហ៊ុន Humai ឱ្យដឹងថា AI និងបច្ចេកវិទ្យាណាណូ (Nanotechnology) អាចនឹងប្រើប្រាស់ដើម្បីផ្ទុកទិន្នន័យនៃបែបបទការសន្ទនា (Conversational Styles) និងគំរូអាកប្បកិរិយា ។ តាមរយៈដំណើការ និងព័ត៌មានពីរបៀបមុខងាររាងកាយរបស់មនុស្សពីទាំងខាងក្នុង និងការសម្តែងចេញទៅមជ្ឈដ្ឋានខាងក្រៅ ។ ទិន្នន័យនេះអាចត្រូវបានបញ្ចូលទៅក្នុងបច្ចេកវិទ្យាបន្ទះ Sensor មួយចំនួនដែលសង់ឡើងក្នុងរាងកាយសិប្បនិមិត្តដែលផ្តល់ថាមពលដោយខួរក្បាល ពិតៗរបស់មនុស្សស្លាប់ ។ នៅពេលដែលខួរក្បាលគ្រប់អាយុ (បញ្ចូលទិន្នន័យរួចរាល់) នោះក្រុមហ៊ុននឹងទាញយកវាមកវិញ ដោយប្រើប្រាស់បច្ចេកវិទ្យាណាណូក្លូនមនុស្ស ។ ដូច្នេះហើយវាអាចនាំជីវិតមនុស្សត្រឡប់មកវិញ ពោលគឺមនុស្សអាចរស់នៅជាបានរៀងរហូត ។
រហូតទាល់តែបច្ចេកវិទ្យាត្រូវបានអភិវឌ្ឍន៍ពេញលេញ ក្រុមហ៊ុន Humai មានគម្រោងធ្វើឱ្យអតិថិជនរបស់ខ្លួនមានការភ្ញាក់ផ្អើលប្រើប្រាស់បច្ចេកវិទ្យាត្រជាក់ ។ លោកបូកា ណាហ្គ្រា ពន្យល់ថា «យើងនឹងប្រមូលយកទិន្នន័យយ៉ាងទូលំទូលាយជាលើកដំបូងលើសមាជិករបស់ពួកយើងដែលបានស្លាប់តាមរយៈកម្មវិធី ផ្សេងៗដែលពួកយើងកំពុងតែផលិតឡើង ។ បន្ទាប់ពីស្លាប់យើងនឹងធ្វើឱ្យខួរក្បាលមនុស្សត្រជាក់ ។ នៅពេលបច្ចេកវិទ្យាត្រូវបានអភិវឌ្ឍន៍ពេញលេញយើងនឹងដាក់បញ្ចូលខួរក្បាលមនុស្សទៅកាន់រាងកាយសិប្បនិមិត្ត ។ រាងកាយសិប្បនិមិត្តនឹងត្រូវបានត្រួតពិនិត្យដោយគំនិតរបស់មនុស្ស និងរលកខួរក្បាល ។ រាងកាយសិប្បនិមិត្តអាចចូលរួមចំណែកក្នុងបទពិសោធន៍មនុស្ស ។ ទោះជាយ៉ាងណាក៏ដោយបច្ចេកវិទ្យានេះអាចនឹងលេចរូបរាងនាពេលអនាគត ហើយវានឹងនាំមនុស្សស្លាប់មកកាន់ពិភពមនុស្សវិញ » ៕
ចែករំលែកព័តមាននេះ