ស្ទឹងត្រែង ៖ បន្ទាប់ពីមានការចុះផ្សាយពីការដង្ហោយហៅរកសប្បុរសជនរបស់អ្នកស្រីភឹម នួនស៊ី ដែលប្រឈមមុខនឹងជំងឺដុះសាច់ក្នុងពោះ ហើយមិនសង្ឃឹមថា នឹងអាចរស់បានយូរអង្វែងទៅមុខទៀតនោះ នៅព្រឹកថ្ងៃទី១៦ កញ្ញា អំណោយបន្ទាន់មួយរបស់លោកជំទាវបណ្ឌិតប៊ុន រ៉ានី ហ៊ុន សែន ក៏បានបញ្ជូនទៅដល់ភ្លាមៗ ចំនួន៥លានរៀល តាមរយៈលោកអភិបាលខេត្ត ហើយទឹកប្រាក់ឧបត្ថម្ភ៣០ម៉ឺនរៀលទៀត ជាប្រាក់ឧបត្ថម្ភរបស់លោកជំទាវង៉ែត ម៉ាលី ភរិយារបស់លោកម៉ៅ ច័ន្ទតារា ក៏ត្រូវបានប្រគល់ជូនតាមរយៈស្នងការរងនគរបាលខេត្ត លោក ស្រី វណ្ណា ផងដែរ ។
តាមលោកវេជ្ជបណ្ឌិតអ៊ុន សូវៀត ប្រធានមន្ទីរពេទ្យបង្អែកខេត្តស្ទឹងត្រែង មានប្រសាសន៍ថា ស្ត្រីរូបនេះ មិនមែនដុះសាច់ក្នុងពោះទេ តែជាជំងឺម្យ៉ាងមានទឹកក្នុងពោះ ហើយនៅម៉ោង៨ព្រឹកថ្ងៃទី១៧ កញ្ញា នេះ នឹងរៀបចំធ្វើការវះកាត់ហើយ ។ ជាមួយគ្នានេះ នៅព្រឹកថ្ងៃទី១៦ កញ្ញា លោកឧកញ៉ាលី ហួរ បានផ្តល់ការឧបត្ថម្ភដ៏មុតមាំមួយដល់កោះសន្តិភាពដោយលោកឧកញ៉ាធានាថា បើមន្ទីរពេទ្យខេត្តមិនមានលទ្ធភាពក្នុងការវះកាត់គឺអាចដឹកមកកាន់មន្ទីរពេទ្យមិត្តភាពខ្មែរ-សូវៀត ដើម្បីទទួលការវះកាត់ ដោយលោកឧកញ៉ាធានាចេញថវិកាទាំងអស់ក្នុងការជួយសង្គ្រោះជីវិតអ្នកស្រីភឹម នួនស៊ី ។
ជាមួយគ្នានេះដែរ កោះសន្តិភាពក៏បានទទួលនូវអំណោយជាទឹកប្រាក់មួយចំនួន ហើយដែលនឹងផ្ញើទៅនៅថ្ងៃនេះដែរ ។ នេះជាការផ្តល់នូវភាពកក់ក្តៅក្នុងកាយវិការមនុស្សធម៌គួរឱ្យគោរពចំពោះលោកជំទាវប៊ុន រ៉ានី ហ៊ុន សែន ប្រធានកាកបាទក្រហមកម្ពុជា លោកឧកញ៉ាលី ហួរ និងសប្បុរសជនមួយចំនួនទៀត ។ កោះសន្តិភាពក៏នឹងតាមដានការវះកាត់នៅថ្ងៃនេះដែរ ក្នុងការសង្គ្រោះស្ត្រីគួរឱ្យអាណិតនេះ ៕
ចែករំលែកព័តមាននេះ