ខេត្តតាកែវ ៖ ដើម្បីចៅប្រុសម្នាក់ដែលឪពុក ម្តាយបង្កើតហើយទុកចោល លោកយាយទុរគតម្នាក់ឈ្មោះជុំ សុគន្ធ អាយុ៦៤ឆ្នាំ រស់នៅភូមិដូនពែង សង្កាត់បារាយណ៍ ក្រុងដូនកែវ បានតស៊ូចិញ្ចឹមចៅយ៉ាងលំបាក
ខេត្តតាកែវ ៖ ដើម្បីចៅប្រុសម្នាក់ដែលឪពុក ម្តាយបង្កើតហើយទុកចោល លោកយាយទុរគតម្នាក់ឈ្មោះជុំ សុគន្ធ អាយុ៦៤ឆ្នាំ រស់នៅភូមិដូនពែង សង្កាត់បារាយណ៍ ក្រុងដូនកែវ បានតស៊ូចិញ្ចឹមចៅយ៉ាងលំបាកវេទនាតាំងពីអាយុ៣ខែរហូតដល់អាយុ៨ឆ្នាំ បានចូលរៀននឹងគេ។
លោកយាយបានរៀបរាប់ថា គាត់មានប្តី និងកូនចំនួន៣នាក់ តែប្តីរបស់គាត់ និងកូនៗបានស្លាប់អស់ហើយតាំងពីជំនាន់ប៉ុល ពត លុះក្រោយមកគាត់រស់នៅតែម្នាក់ឯងតែលតោលគ្មានទីពឹងអ្វីទាំងអស់ តែគ្រានោះគាត់នៅមានកម្លាំងចេះតែដើររកស៊ីឈ្នួលច្រូតស្ទូងស្រូវឱ្យគេបានលុយគ្រាន់ចិញ្ចឹមជីវិតរហូតមក តែរហូតមកដល់ពេលនេះវ័យកាន់តែចាស់មានជំងឺប្រចាំកាយថែមទៀត គឺរស់នៅយ៉ាងលំបាកបំផុត។
លោកយាយ ជុំ សុគន្ធ បានរៀបរាប់បន្តទៀតថា កាលពី៨ឆ្នាំមុននេះ គាត់បានរស់នៅជាមួយក្មួយសាច់ថ្លៃ២នាក់ ប្តីប្រពន្ធ លុះពេលគេមានកូនប្រុសម្នាក់ អាយុទើបបាន៣ខែ ប្តីប្រពន្ធគេបានទុកឱ្យគាត់ចិញ្ចឹមដោយបានប្រគល់ផ្ទះខ្ទមនេះមកឱ្យគាត់នៅ២នាក់ចៅម្នាក់នេះចាប់តាំងពីប្តីប្រពន្ធគេចេញទៅបាត់ដំណឹងរហូតមិនដឹងជាទៅទីណា។
គាត់បានតស៊ូរស់នៅចិញ្ចឹមចៅប្រុសម្នាក់រហូតបានចូលរៀនថ្នាក់ទី១ ។ រាល់ថ្ងៃនេះគាត់ដើរកោសខ្យល់ឱ្យអ្នកភូមិទាំងឈឺ ទាំងជាដើម្បីបានលុយបន្តិចបន្តួចមកទិញម្ហូប និងអង្ករឱ្យដាំបាយឱ្យចៅហូប ហើយអ្នកភូមិមានការអាណិតអាសូរ ឱ្យតែពេលមានបុណ្យទាន ឬមង្គលការក្នុងភូមិតែងតែហៅគាត់ឱ្យទៅជួយលាងចាន គ្រាន់បានលុយមកចិញ្ចឹមចៅប្រុសឈ្មោះឆាយ គឹមហេង ។
លោកយាយបានអំពាវនាវដល់ក្មួយរបស់គាត់ដែលជាឪពុក ម្តាយក្មេងប្រុសអាយុ៨ឆ្នាំនេះ មកទទួលយកកូនទៅចិញ្ចឹមវិញផង ព្រោះពេលនេះគាត់កាន់តែចាស់ មានជំងឺប្រចាំកាយថែមទៀតមិនដឹងស្លាប់ពេលណាទេ។
តាមរយៈកោះសន្តិភាពសូមអំពាវនាវរកសប្បុរសជនជួយដល់លោកយាយទុរគតចិញ្ចឹមចៅប្រុសម្នាក់នេះផង៕
ចែករំលែកព័តមាននេះ