ខេត្តឧត្តរមានជ័យ ៖ ធនាគាអេស៊ីលីដាមួយទីតាំង រួមទាំងទីតាំងលំនៅឋាន២ទីតាំងទៀត ត្រូវបានបិទខ្ទប់ ដោយសារជាប់ពាក់ព័ន្ធនឹងមនុស្ស៨នាក់ ដែលត្រូវបានគ្រូពេទ្យធ្វើចត្តាឡីស័ក រកឃើញមានវិជ្ជមានកូវីដ១៩ នៅថ្ងៃទី៥ ខែកក្កដា ឆ្នាំ២០២១នេះ។
លោក នៅ សំអន ប្រធានប្រតិបត្តិស្រុកអន្លង់វែង និស្រុកត្រពាំងប្រាសាទ បានឱ្យដឹងថា ក្នុងថ្ងៃទី៥ ខែកក្កដា ឆ្នាំ២០២១ នេះ គ្រូពេទ្យចត្តាឡីស័ក បានខិតខំធ្វើការចុះស្រាវជ្រាវតាមដានអ្នកដែលពាក់ព័ន្ធជាមួយអ្នកមានវិជ្ជមានកូវីដ១៩ ជាបន្តបន្ទាប់។
លោកបន្តថា ក្រោយពីបានចុះធ្វើការនៅក្នុងថ្ងៃទី៥ ខែកក្កដា ឆ្នាំ២០២១នេះ គ្រូពេទ្យបានពិនិត្យ និងវាស់កំដៅ រួមទាំងយកសំណាកអ្នកដែលពាក់ព័ន្ធជាមួយអ្នកវិជ្ជមានកូវីដ១៩នោះទៅពិនិត្យ ជាលទ្ធផល គឺរកឃើញអ្នកមានវិជ្ជមានកូវីដ១៩ ចំនួន៨នាក់ ក្នុងនោះមានគ្រូបង្រៀនមួយគ្រួសារចំនួន៣នាក់, នៅក្នុងឃុំត្រពាំងតាវ ចំនួន៣នាក់ និងបុគ្គលិតធនាគាអេស៊ីលីដាចំនួន២នាក់ ត្រូវបាននាំយកទៅព្យាបាលនៅវិទ្យាល័យអន្លង់វែង រួមទាំងមនុស្សប្រុសស្រីជាច្រើននាក់ តម្រូវឱ្យធ្វើចត្តាឡីស័ករយៈពេល១៤ថ្ងៃ ដើម្បីរង់ចាំយកសំណាកធ្វើតេស្តរកមេរោគកូវីដ១៩បន្តទៀត៕
ចែករំលែកព័តមាននេះ