កោតតែអ្នកតំណាងរាស្ត្រគណបក្សសង្គ្រោះជាតិ ជ្រើសរើសយកការធ្វើពហិការមិនចូលប្រជុំអនុម័តថវិកាឆ្នាំ២០១៦ និងយកសភាធ្វើជាចំណាប់ខ្មាំង និងការដាក់សម្ពាធលើគណបក្សកាន់អំណាច ដែលជាវិធីមួយពុំគួរគណបក្សប្រឆាំងយកមកអនុវត្តនោះទេ ។
ទោះបីជាតំណាងរាស្ត្រទាំងអស់របស់គណបក្សសង្គ្រោះជាតិមិនចូលប្រជុំសភាក្តី ក៏នៅថ្ងៃទី៣០ ខែវិច្ឆិកា ឆ្នាំ២០១៥ មិនមានអ្វីបង្កជាឧបសគ្គរាំងស្ទះឡើយ គឺអង្គសភាដែលជាសំឡេងមកពីគណបក្សប្រជាជនកម្ពុជា បានប្រជុំពិភាក្សា និងសម្រេចអនុម័តសេចក្តីព្រាងច្បាប់ដ៏មានសារសំខាន់នោះ ដោយសំឡេង៦៦ លើ៦៦ ដែលស្មើនឹង១០០ភាគរយ នៃសមាជិកសភាដែលបានចូលប្រជុំ ។
យោងលើគេហទំព័រហ្វេសប៊ុកផេកផ្លូវការរបស់សម្តេចតេជោនាយករដ្ឋមន្ត្រី ហ៊ុន សែន បានឱ្យដឹងថា ច្បាប់ថវិកាឆ្នាំ២០១៦ គឺជាផ្នែកមួយនៃការលុបចោលផងដែរនូវពន្ធតាមរបបម៉ៅការ ដើម្បីសម្រួលដល់អាជីវករខ្នាតតូចដែលលក់ដូរបន្តិចបន្តួចដើម្បីចិញ្ចឹមជីវិត ។ សម្តេចតេជោ ហ៊ុន សែន បានបន្ថែមថា ច្បាប់នេះក៏នឹងលុបចោលពន្ធលើមធ្យោបាយដឹកជញ្ជូន និងយានជំនិះមួយចំនួន ដើម្បីកាត់បន្ថយចំណាយ និងលើកកម្ពស់ជីវភាពប្រជាជនបានមួយកម្រិត។ ប៉ុន្តែអ្វីដែលសំខាន់ជាងនេះទៅទៀតនោះ តាមរយៈការអនុម័តថវិកាឆ្នាំ២០១៦នេះ ក៏រក្សាបាននូវស្ថិរភាពនយោបាយ និងស្ថិរភាពមា៉ក្រូសេដ្ឋកិច្ច ដើម្បីធានាកំណើនសេដ្ឋកិច្ចខ្ពស់ និងអតិផរណាទាបផងដែរ ។
ក្រៅពីនេះថវិកាឆ្នាំ២០១៦ ក៏នឹងផ្តល់លទ្ធភាពដល់រាជរដ្ឋាភិបាល ដឹកនាំចាត់ចែងការងារលើគ្រប់វិស័យ និងផ្តល់ជូនទៅក្រសួងសំខាន់ៗមួយចំនួនជាអាទិភាពក្នុងការអភិវឌ្ឍ ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងសង្គម ក្នុងនោះក៏មានការដំឡើងបៀវត្សរ៍ជូនមន្ត្រីរាជការ កងកម្លាំងប្រដាប់អាវុធ មន្ត្រីជាប់កិច្ចសន្យា និងនិវត្តជនផងដែរ ។ ទាំងនេះ គឺជាគោលបំណងដ៏សំខាន់បំផុតដែលសម្តេចតេជោនាយករដ្ឋមន្ត្រី ហ៊ុន សែន បានបង្ហោះផ្សាយមុនពេលសេចក្តីព្រាងច្បាប់ស្តីពីថវិកាឆ្នាំ២០១៦ ត្រូវបានសភាអនុម័ត ។
ក្នុងន័យនេះ យើងខ្ញុំជាអ្នកនិពន្ធឯករាជ្យមួយរូប សូមទាញការចាប់អារម្មណ៍ពីសាធារណជន ឱ្យធ្វើការពិចារណាអំពីភាពត្រឹមត្រូវ និងហេតុផលមួយចំនួន ជុំវិញការធ្វើពហិការរបស់គណបក្សសង្គ្រោះជាតិថា តើជាទង្វើបម្រើផលប្រយោជន៍សង្គមជាតិ និងប្រជាពលរដ្ឋកម្ពុជា ឬមួយក៏ជាការបញ្ជាដាច់ខាតពីប្រធានស្តីទីគណបក្សសង្គ្រោះជាតិ និងពីទណ្ឌិតដែលកំពុងនិរទេសខ្លួន ដោយសារតែគំនុំនិងការសងសឹកចេញពីចេតនាទាមទារតំណែងខ្ពស់ក្នុងរដ្ឋសភាមកខ្លួនឯងវិញ ឬក៏ជាការប៉ុនប៉ងគាបសង្កត់ផ្នែកនយោបាយ ដើម្បីគោលបំណងបើកផ្លូវឱ្យលោក សម រង្ស៊ី បានវិលត្រឡប់ចូលមកមាតុប្រទេសវិញ រួចផុតពីការជាប់ពន្ធនាគារ ?
មន្ត្រីជាន់ខ្ពស់មួយរូបរបស់គណបក្សសង្គ្រោះជាតិ បាននិយាយថា ថ្នាក់ដឹកនាំគណបក្សសង្គ្រោះជាតិបានសម្រេចថា មិនចូលប្រជុំសភាទេ ដោយសារតែមិនទាន់មានការចរចាណាមួយក្នុងវប្បធម៌សន្ទនា ដើម្បីដោះស្រាយលើបញ្ហាមួយចំនួន ដែលគណបក្សប្រឆាំងមួយនេះថា ជាភាពអយុត្តិធម៌របស់ខ្លួន ក្នុងនោះមានទាំងការប្រើអំពើហិង្សាលើអ្នកតំណាងរាស្ត្រ ការដកតំណែងរបស់លោក កឹម សុខា និងការដកសិទ្ធិបុព្វសិទ្ធិរបស់លោក សម រង្ស៊ី ពីអ្នកតំណាងរាស្ត្រជាដើម ។ ប៉ុន្តែ អ្នកតំណាងរាស្ត្រទាំងនោះ មិនបាននិយាយសូម្បីតែមួយម៉ាត់អំពីទង្វើខុសឆ្គងរបស់មេដឹកនាំខ្លួន និងកំហុសរបស់បុគ្គលមួយចំនួនដែលពាក់ព័ន្ធក្នុងសំណុំរឿងព្រហ្មទណ្ឌ កើតចេញពីមាត់ឥតគម្រប ហើយបាននិងកំពុងប្រឈមចំពោះមុខច្បាប់នោះទេ ។
គេនៅចងចាំថា ក្រោយការបោះឆ្នោតឆ្នាំ២០១៣ កន្លងទៅ គណបក្សសង្គ្រោះជាតិ បន្ទាប់ពីចាញ់ឆ្នោត បានចោទប្រកាន់ដោយមិនសមហេតុផលជាច្រើន មកលើគណបក្សកាន់អំណាច អំពីភាពមិនប្រក្រតីនៃការរាប់សន្លឹកឆ្នោត វាយប្រហារលើស្ថាប័ន គ.ជ.ប និងរហូតដល់ចោទមកលើគណបក្សប្រជាជនកម្ពុជា ថាជាចោរ ទាំងដែលគណបក្សប្រជាជនខ្លួនឯងបាត់បង់អាសនៈពី៩០ មកនៅត្រឹម៦៨អាសនៈប៉ុណ្ណោះ ។ តើរបៀបដឹកនាំរបស់គណបក្សប្រជាជនកម្ពុជា ដែលមានថ្នាក់ដឹកនាំកំពូលៗជាច្រើនរូប ជាស្ថាបនិក នាំមកនូវសុខសន្តិភាព និងការអភិវឌ្ឍប្រទេសមកដល់សព្វថ្ងៃ ហេតុអ្វីក៏ត្រូវបក្សប្រឆាំងចោទថា ជាចោរ ដែលហាក់ដូចជាចោរល្ងង់ មិនចេះលួច0x017d7 ក្នុងន័យថា បើជាចោរមែននោះ គេលួចពីតិចទៅច្រើន មិនមែនធ្លាប់បានការគាំទ្រកាលពីអាណត្តិមុនចំនួន៩០អាសនៈ លួចគេមកនៅត្រឹម៦៨អាសនៈដូចនេះឡើយ ។ ដូច្នេះពាក្យថាជោ«ចោរ» គឺមិនសមទាល់តែសោះ ដែលការពិតនេះគ្រាន់តែជាល្បិចកល យកការចោទប្រកាន់ធ្វើជាលេស ដើម្បីវាយប្រហារមកលើបក្សកាន់អំណាចរបស់សម្តេចតេជោ ហ៊ុន សែន និងញុះញង់ កៀរគរប្រមូលផ្ដុំ បំផុសកម្លាំងមហាជន ក្នុងទិសដៅផ្តួលរំលំរាជរដ្ឋាភិបាលស្របច្បាប់របស់សម្ដេចតេជោ ហ៊ុន សែន តែប៉ុណ្ណោះ ។ ក្នុងពេលដំណាលគ្នានោះ គណបក្សសង្គ្រោះជាតិបានប្រើឧបាយកលទុច្ចរិតគ្រប់បែបយ៉ាង ដូចជាដឹកនាំធ្វើបាតុកម្មតាមដងផ្លូវយ៉ាងអនាធិបតេយ្យ រហូតក្លាយជាកុបកម្មហិង្សា ដុតបំផ្លាញទ្រព្យសម្បត្តិសាធារណៈ និងឯកជន នាំឲ្យមាននូវភាពចលាចលវឹកវរធ្ងន់ធ្ងរក្នុងសង្គម ហើយថែមទាំងបានធ្វើពហិការមិនចូលប្រជុំសភាទៀត ។ មិនត្រឹមតែប៉ុណ្ណោះទេ គណបក្សសង្គ្រោះជាតិ បានចោទមកលើរដ្ឋសភា ដែលដឹកនាំដោយបក្សប្រជាជនកម្ពុជា ថាជាសភាចោរ សភាឯកបក្ស សភាប្រថាប់ត្រា សភាគូទមាន់ និងប្រកាសថាមិនព្រមចូលប្រជុំសភាជាដាច់ខាត ដែលកាលណោះស្របពេលដែលសន្ទុះនៃការតវ៉ាកាន់តែឡើងកម្តៅខ្លាំងឡើងៗ ដើម្បីតថ្លៃតុល្យភាពអំណាចនៅក្នុងសភា ។
ប៉ុន្តែនៅពេលដែលសម្តេចតេជោ ហ៊ុន សែន យល់ព្រមផ្តល់ឱកាសបើកផ្លូវឱ្យមានការចរចា និងផ្តល់លទ្ធភាពឱ្យគណបក្សសង្គ្រោះជាតិ ទទួលបានតំណែងរហូតដល់អនុប្រធានទី១រដ្ឋសភា និងគណៈកម្មការជំនាញនានាក្នុងសភាផងនោះ បាតុកម្មក៏បានបញ្ចប់ ហើយពាក្យថា សភាឯកបក្សក៏បានបញ្ចប់ និងការយកលេសថា ការតវ៉ាធ្វើតាមឆន្ទៈប្រជាពលរដ្ឋក៏បានរលត់ផងដែរ ទាំងដែលពួកខ្លួនចូលសភាក៏មិនបានសុំយោបល់ឯកភាពពីប្រជាពលរដ្ឋ ឬសកម្មជនរបស់ខ្លួនផងនោះ ។
តំណែងបានបិទមាត់មេដឹកនាំ និងមន្ត្រីជាន់ខ្ពស់ជាច្រើនរូបរបស់បក្សសង្គ្រោះជាតិ ដែលធ្លាប់តែតវ៉ាឱ្យសម្ងំស្ងៀម ប៉ុន្តែក៏មានជនឆ្លៀតឱកាសម្តងៗ បង្កើតបញ្ហានៅខាងក្រៅ ដើម្បីបំពេញមហិច្ឆតាអំណាច និងលុយកាក់របស់ក្រុម និងបក្ខពួកខ្លួន មិនឆ្អែតឆ្អន់ ដោយអ្នកខ្លះទៅញុះញង់កម្មករនៅតាមរោងចក្រឱ្យបះបោរ ធ្វើបាតុកម្ម តំណាងរាស្ត្រខ្លះទៅគោះលុយពីថៅកែរោងចក្រ អ្នកវិនិយោគបរទេស និងក្រុមអ្នកមានលុយមួយចំនួន ជាថ្នូរនឹងការរក្សារឿងអាស្រូវខុសច្បាប់ មិនឱ្យបែកធ្លាយចេញទៅខាងក្រៅ ។ គ្រាន់តែមួយរយៈពេលខ្លីប៉ុណ្ណោះ ថ្នាក់ដឹកនាំជាន់ខ្ពស់ក្នុងបក្សសង្គ្រោះជាតិខ្លះ មានសេចក្តីរាយការណ៍មកថា បានសល់លុយរាប់លានដុល្លារពីជំនួញនយោបាយ និងការឃោសនាកៀរគរបោកប្រាស់ពីក្រុមអ្នកគាំទ្រ នៅឯក្រៅប្រទេស រហូតផ្ទុះការតវ៉ាចោទប្រកាន់គ្នាពាក់ព័ន្ធនឹងអំពើពុករលួយរវាងលោក កឹម សុខា និងលោក សម រង្សុី ក្នុងទឹកប្រាក់ពី៣០ ទៅ៤០លានដុល្លារអាមេរិក ។
ឥឡូវនេះ យើងងាកមកស្ថានការណ៍នយោបាយចុងក្រោយវិញម្តង តើបន្ទាប់ពីវប្បធម៌សន្ទនាដែលហាក់ដូចជាបានរលត់បាត់ទៅហើយនោះ បែរជាត្រូវគណបក្សប្រឆាំងទើបតែចាប់ផ្តើមលើកតម្កើងតម្លៃវប្បធម៌សន្ទនា ដែលសម្តេចតេជោ ហ៊ុន សែន ធ្លាប់បានអះអាងជាច្រើនលើកច្រើនសាមកហើយថា ក្នុងភាពជាអ្នកដឹកនាំនយោបាយនៅកម្ពុជា គឺជាងពាក់កណ្តាលជីវិតរបស់លោកទៅហើយបានប្រើវប្បធម៌សន្ទនានេះ ក្នុងការដោះស្រាយបញ្ហាធំៗ នាំមកនូវសុខសន្តិភាពជូនជាតិមាតុភូមិ ។ ដូច្នេះ អាចថា ជារឿងថ្មីថ្មោងបំផុតរបស់បក្សសង្គ្រោះជាតិ ឬគ្រាន់តែបែបលក្ខណៈជាក្មេងបៀមដៃ ហើយមកប្រកាសខ្លួនថា ជាបុគ្គលអស្ចារ្យលើវប្បធម៌សន្ទនា គឺមិនអាចយកប្រៀបឈ្នះលើអានុភាពពិតប្រាកដរបស់សម្តេចតេជោ ហ៊ុន សែន បានឡើយ ។ ពួកគេអាចបន្លំប្រជាពលរដ្ឋ និងបោកប្រាស់ខ្លួនឯងបាន ប៉ុន្តែនៅពេលពួកគេឆ្លុះកញ្ចក់ មុខមាត់អាក្រក់របស់ខ្លួននឹងបង្ហាញប្រាប់ថា ទង្វើនិងឆាកល្ខោនដែលពួកគេបាននិងកំពុងសម្តែង គឺជាការបោកប្រាស់ដ៏គួរឱ្យអៀនខ្មាសបំផុត ។
សន្លឹកបៀ កំពុងស្ថិតនៅលើដៃរបស់សម្តេចតេជោ ហ៊ុន សែន ដែលមានប្រៀបខ្លាំងបំផុតក្នុងស្ថានការណ៍នេះ ។ ពាក្យបណ្តឹងព្រហ្មទណ្ឌកាន់តែមានចំនួនច្រើនឡើងៗ ត្រូវបានយកមកអនុវត្តក្នុងអ្វីមួយដែលជាផ្នែកនៃការបង្ហាញនូវគោលជំហរឥតងាករេ ក្នុងការពង្រឹងនីតិរដ្ឋ ការវាយបំបាក់ដៃគូទុច្ចរិតនៃវប្បធម៌សន្ទនា ការទប់ស្កាត់ភាពចលាចលសង្គម ហាក់ដូចជាបិទច្រកទាំងស្រុង មិនផ្តល់លទ្ធភាពឬឱកាសល្អណាមួយសម្រាប់បក្សសង្គ្រោះជាតិ ដើម្បីការតថ្លៃអំណាច និងពន្លត់ពាក្យគ្រោតគ្រាតដែលបក្សប្រឆាំងធ្លាប់បានដៀលត្មះ នាពេលកន្លងមក លើរាជរដ្ឋាភិបាលបានឡើយ ។ និយាយជារួមទៅ ពេលវេលាសម្រាប់លុបលាងកំហុស គឺមិនមែនជាការចិញ្ចឹមចិត្តដាក់គំនាបមកលើបក្សកាន់អំណាច ដូចល្បែងដែលបក្សសង្គ្រោះជាតិធ្លាប់បានប្រើនោះទេ ។ ពេលវេលានេះអាក្រក់បំផុតសម្រាប់បក្សប្រឆាំង ។ យ៉ាងណាមិញ ការការពារខ្លួនឱ្យរួចផុតពីសំណាញ់ច្បាប់ ដែលកំពុងវ័ណ្ឌកបក្សសង្គ្រោះជាតិ ក៏ហាក់ដូចជានៅឆ្ងាយពីការសម្រេចចិត្តរបស់សម្តេចតេជោ ហ៊ុន សែន នៅឡើយ ដរាបណាថ្នាក់ដឹកនាំគណបក្សសង្គ្រោះជាតិ នៅតែប៉ុនប៉ងប្រើនយោបាយប្រជាភិថុត មកបំផ្លាញសន្តិភាពដែលកើតចេញពីស្នាដៃរបស់សម្តេចតេជោ ហ៊ុន សែន នោះ ។ ការហក់លោត ការបំពងសំឡងច្រៀងខុសចង្វាក់ភ្លេង និងការវាយប្រហារដោយប្រើដៃបរទេស ដើម្បីដាក់គំនាបមកលើរាជរដ្ឋាភិបាល មិនមែនជាមធ្យោបាយល្អសម្រាប់ដំណោះស្រាយបញ្ហាជាតិឡើយ ។ ផ្ទុយទៅវិញ វាហាក់បីដូចជាយកសាំងទៅជះលើភ្លើងដែលកំពុងតែឆេះ ឱ្យឆេះសន្ធោសន្ធៅកាន់តែខ្លាំងថែមទៀត ។
ដូចគ្នានេះដែរ ការធ្វើពហិការមិនចូលប្រជុំសភា ដើម្បីអនុម័តថវិកាជាតិឆ្នាំ២០១៦ គឺមានតម្លៃស្មើនឹងការខកខានក្នុងការបំពេញភារកិច្ចរបស់ខ្លួនជាអ្នកតំណាងរាស្ដ្រ ដែលត្រូវចូលរួម និងការសម្រេចចិត្តក្នុងការរួមចំណែកជំរុញការអភិវឌ្ឍប្រទេសជាតិ ក៏ដូចជាការកាត់បន្ថយភាពក្រីក្ររបស់ប្រជាពលរដ្ឋ បែរជាបក្សសង្គ្រោះជាតិមិនបានចូលរួមចំណែកក្នុងបេសកកម្មដ៏ត្រឹមត្រូវនេះទៅវិញ ។
ម្យ៉ាងវិញទៀត កាមិនចូលពហិការមិនចូលប្រជុំសភារបស់អ្នកតំណាងរាស្ដ្រគណបក្សប្រឆាំង ត្រូវបានគេចោទសួរអំពីបញ្ហាប្រាក់បៀវត្សរ៍របស់អ្នកតំណាងរាស្ដ្រទាំងនោះ តើពួកគាត់មុខក្រាស់បើកប្រាក់បៀវត្សរ៍ប្រចាំខែដែរឬទេ បើថវិកាឆ្នាំ២០១៦ ក៏អនុម័តដើម្បីបើកប្រាក់ខែឱ្យពួកគាត់ផងនោះ ខណៈដែលអ្នកតំណាងរាស្ដ្រទាំងនោះមិនបានចូលប្រជុំសភា និងមិនបានលើកដៃអនុម័តផង ។
ប្រាក់បៀវត្សរ៍ប្រចាំខែរបស់អ្នកតំណាងរាស្ដ្រ ត្រូវបានគេបង្ហើបឱ្យដឹងថា ម្នាក់ៗទទួលបានចន្លោះពី៩លានទៅ១២លានរៀល ឬស្មើនឹងជាង២ពាន់ដុល្លារអាមេរិក ក្នុង១ខែៗ អាស្រ័យឋានៈ ជាសមាជិក លេខាធិកា អនុប្រធាន និងប្រធានកម្មការនានាក្នុងរដ្ឋសភា នេះមិនបូកបញ្ចូលនូវប្រាក់បេសកកម្ម និងប្រាក់ផ្សេងៗទៀត ដែលអ្នកតំណាងរាស្ដ្រត្រូវទទួលបានផង ។ ចុះបើអ្នកតំណាងរាស្ដ្រូរូបណាមិនបានចូលរួមប្រជុំ ពិភាក្សា និងអនុម័តច្បាប់ផងនោះ តើស័ក្តិសមនឹងគួរត្រូវបើកប្រាក់បៀវត្សរ៍ទាំងនោះឱ្យដែរឬទេ ? ហើយតើ ពួកគាត់ខ្មាសអៀនខ្លះដែរទេ នៅពេលចាយថវិកាជាតិ ទាំងដែលខ្លួនឯងមិនបានចូលរួមធ្វើអ្វីមួយដែលជាប្រយោជន៍ជូនជាតិនោះ ?
តាមដឹងមកថា អ្នកតំណាងរាស្ដ្ររបស់គណបក្សប្រឆាំង បាននាំគ្នាមិនចូលប្រជុំសភាតាមការសម្រេច និងបញ្ជាពីថ្នាក់ដឹកនាំរបស់គណបក្សខ្លួនឯង ដោយមិនបានសុំច្បាប់ពីប្រធានរដ្ឋសភាឡើយ ។ យោងតាមប្រការ ៦៧, ៦៨, ៧០, ៧១ និង៧២ នៃបទបញ្ជាផ្ទៃក្នុងនៃរដ្ឋសភា បានចែងថា តំណាងរាស្ដ្រមិនអាចអវត្តមានដោយមិនមានការអនុញ្ញាតពីប្រធានរដ្ឋសភាបានឡើយ ។ ប្រធានអាចអនុញ្ញាតឱ្យសមាជិកសភាឈប់យ៉ាងយូរ១៥ថ្ងៃ ក្នុងសម័យប្រជុំនីមួយៗ ។ ការឈប់លើសពី១៥ថ្ងៃ ត្រូវសុំឱ្យអង្គសភាអនុម័តយល់ព្រម។ តំណាងរាស្ដ្រណាឈប់ខានមកប្រជុំលើសពី៣ថ្ងៃ ដោយគ្មានការអនុញ្ញាតត្រូវកាត់ប្រាក់បំណាច់រដ្ឋសភាចំពោះថ្ងៃដែលអវត្តមាន និងមានអំពើទណ្ឌកម្មខាងវិន័យជាទម្ងន់បន្ថែមលើការកាត់ប្រាក់បំណាច់តាមចំនួនថ្ងៃដែលអវត្តមាន គឺបណ្ដេញចេញពីការប្រជុំរយៈពេល១ខែ ប្រកាសផ្សាយដល់មហាជននៅក្នុងមណ្ឌលរបស់តំណាងរាស្ដ្រដែលបានប្រព្រឹត្តខុសនោះ ។
វិធីធ្វើពហិការ អាចគ្រាន់តែជាការសម្ញែងឫទ្ធិរបស់ក្រុមតំណាងរាស្ដ្រគណបក្សសង្គ្រោះជាតិ ដែលជានិច្ចកាលពួកគេតែតែមើលស្រាលលើផ្លូវច្បាប់ និងរំលោភលើបទបញ្ជាផ្ទៃក្នុងនៃរដ្ឋសភាជាហូរហែមកហើយ ដែលក្នុងនោះមានលោក កឹម សុខា ជាឧទាហរណ៍ស្រាប់ ដែលបានរបូតតំណែងដោយសារតែគាត់ប្រព្រឹត្តកំហុសនេះ ។
ដូច្នេះ ជំហានដែលបក្សសង្គ្រោះជាតិបាននិងកំពុងដើរអាចត្រូវចិត្តខ្លួនឯង ដើម្បីផ្គាប់ផ្គុនជំងឺចាស់ ជាជំងឺទារអំណាចកំពុងងើបរើឡើងវិញ ប៉ុន្តែវាបានប្រាសចាកទាំងស្រុងពីគោលការណ៍ច្បាប់ និងកំពុងតែដើរផ្ទុយស្រឡះពីគោលការណ៍លទ្ធិប្រជាធិបតេយ្យសេរីពហុបក្ស និងការពង្រឹងនីតិរដ្ឋនៅកម្ពុជា ។ ផ្ទុយទៅវិញ វាជាផ្លូវអាក្រក់កាន់តែខ្លាំងបំផុត អាចនាំឱ្យគណបក្សសង្គ្រោះជាតិបាត់បង់ប្រជាប្រិយភាពទាំងស្រុង និងខ្សោះខ្យល់ ប្រសិនណាបើថ្នាក់ដឹកនាំ និងមន្ត្រីជាន់ខ្ពស់គណបក្សប្រឆាំងមួយនេះ មើលរំលងនូវកំហុសរបស់ខ្លួន និងមិនបោះបង់ចោលនូវទម្លាប់យកបរទេសធ្វើជាខ្នងបង្អែក ដើម្បីគាបសង្កត់លើអំណាចឯករាជ្យ និងអធិបតេយ្យជាតិរបស់ប្រទេសខ្លួនឯងទេនោះ ៕
ដោយបណ្ឌិត ជុន ច័ន្ទចំរើន
ចែករំលែកព័តមាននេះ