សារព័ត៌មានបរទេសកាលពីពេល ថ្មីៗកន្លងមកផ្សាយថា សភាកូរ៉េខាងត្បូងបានឆ្លងសេចក្តីព្រាងច្បាប់ស្តីពីការកំណត់អត្រាពន្ធលើផ្នែកសាសនាដល់អ្នកបួស ដោយច្បាប់ថ្មីនេះជាកំណែទម្រង់មួយនៅក្នុងប្រទេស
សារព័ត៌មានបរទេសកាលពីពេល ថ្មីៗកន្លងមកផ្សាយថា សភាកូរ៉េខាងត្បូងបានឆ្លងសេចក្តីព្រាងច្បាប់ស្តីពីការកំណត់អត្រាពន្ធលើផ្នែកសាសនាដល់អ្នកបួស ដោយច្បាប់ថ្មីនេះជាកំណែទម្រង់មួយនៅក្នុងប្រទេស និងចូលជាធរមានជាផ្លូវការនៅដើមឆ្នាំ២០១៨។
លោកកាំង សាំងហ៊ុន សមាជិកសភាពីគណបក្សក្នុងរដ្ឋាភិបាលនិយាយថា រដ្ឋាភិបាលចង់ឱ្យគម្លាតរយៈពេលនោះ គឺជារយៈពេលសម្របសម្រួល ព្រោះច្បាប់នេះនឹងចូលជាធរមានដាក់ឱ្យប្រើប្រាស់ទៅលើអ្នកបួសគ្រប់សាសនាមានប្រហែល៣៦០.០០០រូប នៅទូទាំងប្រទេស ដើម្បីឱ្យមន្ត្រីរដ្ឋមានឱកាសចរចាសម្រុះសម្រួលជាមួយមេដឹកនាំសាសនា និងឱ្យច្បាប់អាចមានសុពលភាពយ៉ាងរលូន ។
ក្នុងសេចក្តីព្រាងច្បាប់បញ្ជាក់ឱ្យកែប្រែលើពាក្យប្រាក់បរិច្ចាគ ដែលសាសនិកជនបង់ដោយសុទ្ចចិត្ត និងកាលពីមុនហៅថា «ប្រាក់សទ្ធា» ឱ្យក្លាយជា «ចំណូលផ្នែកសាសនា» ។ បព្វជិតដែលមានចំណូលមិនលើសពី៤០លានវ៉ុន ក្នុងមួយឆ្នាំ ឬប្រហែល៣៤.០០០ដុល្លារ ត្រូវបង់ពន្ធក្នុងអត្រា២០% ចំណែកអ្នកបួសដែលមានចំណូលច្រើនជាង១៥០លានវ៉ុន ក្នុងមួយឆ្នាំ ឬប្រហែល១២៧.០០០ដុល្លារ ត្រូវពន្ធក្នុងអត្រា៨០% ។
បញ្ហានៃការបង់ពន្ធរបស់អ្នកបួសនៅកូរ៉េខាងត្បូង បានកើតមានការតវ៉ាគ្នាតាំងពីឆ្នាំ១៩៦៨កន្លងមក ដោយលោកអីុ ណាក់យ៉ុន នាយកផ្នែកធនធានមនុស្សដំបូងនៅក្នុងប្រទេសបាននិយាយថា ជនជាតិកូរ៉េខាងត្បូងដែលមានការងារធ្វើគ្រប់រូបត្រូវបង់ពន្ធ ទោះបីជាបម្រើការក្នុងផ្នែកសាសនាក៏ដោយ ។
រដ្ឋាភិបាលជាច្រើនអាណត្តិក្រោយបានលើកយកករណីនេះពិភាក្សាវែកញែកជាបន្តបន្ទាប់ និងមានលក្ខណៈដ៏ប្រាកដប្រជាមួយនៅក្នុងអាណត្តិរបស់លោកប្រធានាធិបតីប៉ាក គីនហេ គឺមានការជំទាស់ខ្លាំងពីក្រុមដែលមាន «ឥទ្ធិពល» ផ្នែកសាសនា ៕
ចែករំលែកព័តមាននេះ