ខេត្តកំពង់ឆ្នាំង ៖ បុរសម្នាក់ ដែលគេស្គាល់ថា ប្រធានក្រុមតន្ត្រីសម័យបានបាត់ខ្លួន មួយសប្តាហ៍មកហើយ ដោយពុំដឹងទៅទីណានោះទេទំនាក់ទំនងតាមទូរស័ព្ទក៏បាន ធ្វើអោយក្រុមគ្រួសារ និងកូនក្រុមតន្ត្រីសម័យ មានអ្នកចម្រៀង អ្នកភ្លេង មានការព្រួយបារម្ភយ៉ាងក្រៃលែង និងខ្លះទៀតបានប្រកាសស្វែងរកតាមប្រព័ន្ធបណ្ដាញសង្គមផងដែរ ។
តាមការបញ្ជាក់ពីអ្នកចម្រៀងស្រីម្នាក់ ដែលជាកូនក្រុមតន្ត្រីសម័យ ដោយសុំមិនបញ្ចេញឈ្មោះបានឲ្យដឹងថា ប្រធានក្រុមតន្ត្រីសម័យ ដែលបានបាត់ខ្លួនមានឈ្មោះ ចាន់ កៀន អាយុជាង៥០ ឆ្នាំ មានទីលំនៅភូមិឧទ្ទុម្ពរ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
ប្រភពដដែលបានបញ្ជាក់ថា កាលពីថ្ងៃទី២៧ ខែមិថុនា ឆ្នាំ២០២១ បុរសឈ្មោះ ចាន់ កៀន បានធ្វើដំណើរតាមរថយន្តម៉ាកតាកូមាផ្ទាល់ខ្លួនមួយគ្រឿងពីភូមិឧទម្ពរមកកាន់ខេត្តកំពង់ឆ្នាំងតែម្នាក់ឯង នឹងមិនឃើញវិលត្រឡប់ទៅលំនៅឋានវិញទេ ។ លុះព្រឹកឡើងថ្ងៃទី២៨ ខែមិថុនា កូនក្រុមតន្ត្រីសម័យ ដែលជាអ្នកភ្លេង និងអ្នកចម្រៀងបានទូរស័ព្ទរកប្រធានក្រុម តែខលមិនចូល ហើយក៏បាត់រហូតមកដល់រសៀលថ្ងៃទី០៣ ខែកក្កដានេះ នៅមិនទាន់បានដំណឹងនៅឡើយ ។
ជាមួយគ្នានេះ ក្នុងនាមក្រុមតន្ត្រីសម័យរបស់លោក ចាន់ កៀន ក៏បានអំពាវនាវដល់ប្រជាពលរដ្ឋ បើបានឃើញរូបគាត់ដូចមានក្នុងរូបថតដែលភ្ជាប់មកជាមួយនេះ សូមរាយការណ៍ទៅសមត្ថកិច្ចនឹងផ្ដល់ដំណឹងមកក្រុមគ្រួសារផង ។
ដោយឡែក បើតាមការបញ្ជាក់ពីសមត្ថកិច្ចមូលដ្ឋានបានប្រាប់ឲ្យដឹងថា បុរសឈ្មោះ ចាន់ កៀន គឺជាម្ចាស់ឧបករណ៍តន្ត្រីសម័យកាលមុនគាត់នៅភូមិក្រោយមកផ្លាស់មកនៅភូមិឧទុម្ពរជាបុរសពោះម៉ាយ នៅតែឯងគ្មានកូនចៅនៅជាមួយនោះទេ ។ គាត់បានបាត់ខ្លួន ចាប់ពីថ្ងៃទី២៧ មិថុនា មកដល់ពេលនេះ នៅមិនទាន់ទទួលដំណឹងនៅឡើយនោះទេ ។
យ៉ាងនេះក្តី មន្ត្រីនគរបាលព្រហ្មទណ្ឌនៃស្នងការដ្ឋាននគរបាលខេត្តក៏បានបញ្ជាក់ដែរថា បានទទួលពាក្យបណ្ដឹងពីក្រុមគ្រួសារហើយពេលនេះ សមត្ថកិច្ចកំពុងតែបន្តស្រាវជ្រាវយ៉ាងយកចិត្តទុកដាក់ ៕
ចែករំលែកព័តមាននេះ