ខេត្តកំពង់ចាម ៖ ដោយសារតែការឆ្លងជំងឺកូវីដ១៩ ជាច្រើននាក់ អាជ្ញាធរសម្រេចបិទភូមិតាណេង ក្នុងសង្កាត់សំបួរមាស ក្រុងកំពង់ចាម មួយផ្នែកដែលមានប្រមាណ៧០គ្រួសារ ជាមួយគ្នានោះ និងត្រូវឱ្យមន្ត្រីសុខាភិបាលចុះធ្វើតេស្តតាមឧបករណ៍រហ័សលើប្រជាពលរដ្ឋជាង៣០០នាក់…
ខេត្តកំពង់ចាម ៖ ដោយសារតែការឆ្លងជំងឺកូវីដ១៩ ជាច្រើននាក់ អាជ្ញាធរសម្រេចបិទភូមិតាណេង ក្នុងសង្កាត់សំបួរមាស ក្រុងកំពង់ចាម មួយផ្នែកដែលមានប្រមាណ៧០គ្រួសារ ជាមួយគ្នានោះ និងត្រូវឱ្យមន្ត្រីសុខាភិបាលចុះធ្វើតេស្តតាមឧបករណ៍រហ័សលើប្រជាពលរដ្ឋជាង៣០០នាក់ ដើម្បីរកអ្នកវិជ្ជមាន covid 19 ។
នេះជាប្រសាសន៍លើកឡើងរបស់ ឯកឧត្តមអ៊ុនចាន់ដា អភិបាលខេត្តថ្លែងក្នុងពិធីចែកអំណោយជូនដល់ប្រជាពលរដ្ឋដែលមានជីវភាពខ្វះខាតប្រមាណ១៧០គ្រួសារ នាព្រឹកថ្ងៃទី៣ កក្កដា ឆ្នាំ២០២១ នៅសួនគ្រញូង ក្នុងក្រុងកំពង់ចាម ។
ឯកឧត្តមអ៊ុន ចាន់ដា អភិបាលខេត្តមានប្រសាសន៍ដោយគូសបញ្ជាក់ថា ទោះបីជាជំងឺកូវីដ១៩ ត្រូវបានរកឃើញជាបន្តបន្ទាប់ នៅក្នុងខេត្តកំពង់ចាម រហូតមកដល់ពេលនេះ គឺអាជ្ញាធររួម និងជំនាញសុខាភិបាលខេត្ត គឺអាចគ្រប់គ្រងស្ថានការណ៍បាន ។ ប្រសិនបើរកឃើញមានលើសមាជិកក្រុមគ្រួសារណាមួយនោះអ្នកផ្សេងទៀត នៅក្នុងក្រុមគ្រួសារ មិនបានចេញទៅប្រកបរបរលក់ដូរ ដើម្បីដោះស្រាយជីវភាពនោះទេ ដូច្នេះនឹងត្រូវរងផលប៉ះពាល់សេដ្ឋកិច្ចគ្រួសារ ។
ជាមួយនោះ គឺមានចៅសង្កាត់ នាយប៉ុស្តិ៍ ក្រុមគ្រូពេទ្យ មេភូមិ អង្គទាំងបួននេះ គឺមានសារៈសំខាន់ណាស់ ប្រសិនណាបើរកឃើញអ្នកណាម្នាក់វិជ្ជមានវីដ១៩ គឺត្រូវប្រញាប់យកទៅព្យាបាលជាបន្ទាន់ ។
ឯកឧត្តមអ៊ុន ចាន់ដា អភិបាលខេត្តមានប្រសាសន៍បន្តថា តាមរយ:មេភូមិត្រូវតែយកចិត្តទុកដាក់តាមដានអ្នកចំណូលស្រុកពិសេសលើបុគ្គល ដែលមកពីតំបន់ក្រហមជាកន្លែងដែលផ្ទុះឡើងនូវជំងឺកូវីដ១៩ បើសិនជាឃើញម្នាក់នោះចូលមក ស្នាក់នៅផ្ទះសាច់ញាតិណាមួយត្រូវប្រញាប់ នាំមកធ្វើតេស្តតាមឧបករណ៍រហ័ស ប្រសិនបើឃើញវិជ្ជមានកូវីដ១៩ ត្រូវបញ្ជូនទៅព្យាបាលជាបន្ទាន់ ។ ការធ្វើរបៀបនេះ គឺដើម្បីកាត់បន្ថយអត្រាមរណ និងសង្គ្រោះអ្នកជំងឺបានទាន់ពេលវេលា និងមួយថ្ងៃទៀតមិនឲ្យជំងឺនេះឆ្លងចូលក្នុងសហគមន៍ ។
សូមបញ្ជាក់ថា នៅក្នុងក្រុងកំពង់ចាម គឺមានមន្ទីរពេទ្យសម្រាប់ព្យាបាលជំងឺកូវីដ១៩ ចំនួន៣កន្លែង ក្នុងនោះរួមមាន ១.មន្ទីពេទ្យខេត្ត ២.មន្ទីពេទ្យមេគង្គក្រុងកំពង់ចាម ៣.វិទ្យាល័យព្រះសីហនុ ប្រសិនណាបើមន្ត្រីសុខាភិបាលធ្វើតេស្តរកឃើញអ្នកផ្ទុកវិជ្ជមានកូវីដ១៩ លើបុគ្គលណាមួយដែលមានលក្ខណៈស្រាលត្រូវបញ្ចូលមកព្យាបាលនៅវិទ្យាល័យព្រះសីហនុក្នុងករណីធ្ងន់ធ្ងរ ត្រូវបញ្ជូនព្យាបាលនៅមន្ទីរពេទ្យមេគង្គ។
មួយវិញទៀត ប្រសិនបើយើងមានការធ្វេសប្រហែសមិនគោរពតាមវិធានរបស់ក្រសួងសុខាភិបាល ជំងឺកូវីដ១៩ និងឆ្លងមកដល់រូបយើង ហើយអាចនឹងបន្តឆ្លងដល់សមាជិកក្រុមគ្រួសារ ។ សំខាន់ត្រូវតែអនុវត្តឲ្យបានពេលមុននឹងចេញទៅខាងក្រៅជួបអ្នកណាម្នាក់ ត្រូវតែពាក់ម៉ាសឱ្យបានជាប្រចាំឬមានអាកុលសម្រាប់លាងដៃ ហើយជំងឺដ៏កាចសាហាវនេះគឺវាច្រើនតែឆ្លងនៅកន្លែង ដែលមានមនុស្សច្រើនក្នុងនោះមានដូចជាទីប្រជុំជនផ្សារជាដើម។
សូមបញ្ជាក់ថា មួយរយៈចុងក្រោយនេះអាការៈនៃជំងឺកូវីដមិនបានចេញរកសញ្ញាឲ្យយើងបានដឹងដូចជា ក្អកក្តៅខ្លួនលើសពី៣៧អង្សារ ដូចគ្រាមុនទៀតនោះទេ ដែលមើលទៅហាក់បីដូចជា មានសុខភាពល្អធម្មតា លុះពេលដែលតេស្តតាមឧបករណ៍រហ័ស ទើបដឹងវិជ្ជមានកូវីដ១៩ ។
លោកចាន់ ផល្លី អភិបាលក្រុងកំពង់ចាម ប្រាប់ឱ្យដឹងដែលថា ដំបូងមានកម្មករនៅភូមិតាណេង បានទៅលើកត្រីចំហុយឲ្យគេគាត់ត្រូវបានរកឃើញវិជ្ជមានកូវីដ ។ ក្រោយមកទៀតមានបុរសម្នាក់បើករថយន្តដឹកដីនៅក្រុងតាខ្មៅ ខេត្តកណ្ដាល បានមួយខែ ពេលដែលឈឺមិនស្រួលខ្លួនក៏ត្រឡប់មកផ្ទះនៅភូមិតាណេង លុះពេលមន្ត្រីសុខាភិបាលពិនិត្យក៏ឃើញវិជ្ជមានកូវីដ ។
ដោយឡែកនៅថ្ងៃទី២ កក្កដា ក្មេងស្រីអាយុ៥ឆ្នាំម្នាក់ក្តៅខ្លួន ពេលទេឃើញវិជ្ជមានកូវីដ អ្នកប៉ះពាល់ផ្ទាល់ម្នាក់ក៏ឆ្លងកូវីដក្នុងនោះមានមនុស្ស៩នាក់ ត្រូវបានយកទៅធ្វើចត្តាឡីស័ក ។ នៅយប់ថ្ងៃទី២ កក្កដា អាជ្ញាធរខេត្តសម្រេចបិទខ្ទប់ភូមិតាណេងមួយផ្នែក ដើម្បីកុំឲ្យមានការរីករាលដាលនៃជំងឺកូវីត រហូតមកដល់ព្រឹកថ្ងៃទី៣ កក្កដា មន្ត្រីសុខាភិបាលបានធ្វើតេស្តដោយឧបករណ៍រហ័សលើប្រជាពលរដ្ឋជាង២០០នាក់ ក្នុងនោះគេឃើញមានវិជ្ជមាន១១នាក់ សរុបទាំងមុន និងក្រោយអ្នកផ្ទុកវិជ្ជមានកូវីដជាង២០នាក់ ត្រូវបាននាំទៅសម្រាកព្យាបាលនៅវិទ្យាល័យព្រះសីហនុក្រុងកំពង់ចាម ៕
ចែករំលែកព័តមាននេះ