រាជធានីភ្នំពេញ ៖ សហគមន៍មូលនិធិនគរកាយវត្តព្រះពុទ្ធសាសនាកម្ពុជា រួមជាមួយអនុសាខាកាកបាទក្រហមកម្ពុជាខណ្ឌទួលគោក កាលពីព្រឹកថ្ងៃទី៥ ធ្នូ ២០១៥ បាននាំយកអំណោយទៅចែកជូនដល់ ប្រជាពលរដ្ឋរងគ្រោះដោយអគ្គិភ័យចំនួន២៥គ្រួសារ ដែលត្រូវអគ្គីភ័យឆាបឆេះផ្ទះកាលពីរសៀលថ្ងៃទី២៤ វិច្ឆិកា នៅតាមផ្លូវរទេះភ្លើង ក្នុងសង្កាត់បឹងកក់ទី១ ខណ្ឌទួលគោក ។
ពិធីចែកអំណោយនេះមានការអញ្ជើញចូលរួមពីលោកម៉ែន សិរី ប្រធានកិត្តិយសគណៈកម្មការអនុសាខាកាកបាទ ក្រហមខណ្ឌទួលគោក និងនិមន្តចូលរួមពីព្រះតេជគុណងិន ឃីម ព្រះអនុគណខណ្ឌទួលគោក និងជាចៅអធិការវត្តនាគវ័ន និងព្រះព្រះមង្គលរក្ខិត សុវណ្ណជោតិបណ្ឌិត ខឹម សម្បត្តិ ជាប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណ រង្សី ព្រមទាំងមន្ត្រីរាជការជុំវិញសាលាខណ្ឌផងដែរ។
អំណោយដែលនាំមកចែកជូននាឱកាសនោះរួមមាន សម្រាប់គ្រួសារដែលជាម្ចាស់ផ្ទះរងគ្រោះចំនួន៥គ្រួសារ ក្នុង១គ្រួសារទទួលបានអង្គរ៥០គីឡូក្រាម គ្រឿងឧបភោគ បរិភោគ សម្ភារប្រើប្រាស់ ព្រមទាំងថវិកាចំនួន២២ម៉ឺនរៀល ក្នុងនោះថវិកា១០ម៉ឺនរៀលជាអំណោយរបស់លោកណាត ប៊ុនរឿន ប្រធានក្រុមការងារចុះជួយសង្កាត់, ៥ម៉ឺនរៀលជាអំណោយអនុសាខាកាកបាទក្រហមខណ្ឌ , ២ម៉ឺនរៀលជាអំណោយរបស់ព្រះតេជគណងិន ឃីម និង៥ម៉ឺនរៀលជាអំណោយព្រះតេជគុណសុវណ្ណជោតិខឹម សម្បត្តិ។
សម្រាប់អ្នកជួលស្នាក់នៅចំនួន២៣គ្រួសារ ក្នុង១គ្រួសារទទួលបានអង្ករ២៥គីឡូក្រាម សារុង១ និងថវិកាចំនួន១១ម៉ឺនរៀល៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ