រាជធានីភ្នំពេញ៖ ចូលមកដល់ដើមខែកក្កដាឆ្នាំ២០២១នេះ ក្រុមប្រឹក្សាអភិវឌ្ឍន៍កម្ពុជា ហៅកាត់ថាCDC បង្ហាញថាក្រុមហ៊ុនមកពីប្រទេសចិនមួយបានបណ្តាក់ទុនវិនិយោគប្រមាណ៣៥០លានដុល្លារអាមេរិកបង្កើតរោងចក្រផលិតសំបកកង់យានយន្ត នៅក្នុងតំបន់សេដ្ឋកិច្ចពិសេស ឈីលូ ជានពុចាយ នៅក្រុងបាវិត ខេត្តស្វាយរៀង មានគម្រោងទិញកៅស៊ូក្នុងស្រុកនៅឆ្នាំទី១ប្រមាណ៥ម៉ឺនតោន ហើយនៅឆ្នាំទី៥ឈានដល់១៥ម៉ឺនតោន។ការបណ្តាក់ទុននិងគម្រោងទិញកៅស៊ូក្នុងស្រុកនេះត្រូវបានអ្នកវិនិយោគក្នុងវិស័យកៅស៊ូ រំពឹងថាក្រៅពីមានទីផ្សារល្អ ការដាំដុះនឹងមានការកើនឡើងថែមទៀតនៅថ្ងៃខាងមុខ។
យោងតាមក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ក្រុមហ៊ុន Cart Tire Co.,Ltd ជាក្រុមហ៊ុនមកពីប្រទេសចិន និងធ្លាប់បានវិនិយោគនៅប្រទេសវៀតណាម តាំងពីឆ្នាំ២០១១ ហើយនៅឆ្នាំ២០២១នេះ ក្រុមហ៊ុនបានសម្រេចចិត្តមកបណ្តាក់ទុនវិនិយោគនៅកម្ពុជា បង្កើតរោងចក្រផលិតសំបកកង់យានយន្តក្នុងទុនវិនិយោគប្រមាណ៣៥០លានដុល្លារអាមេរិក លើផ្ទៃដី៥០ហិកតា នៅក្នុងតំបន់សេដ្ឋកិច្ចពិសេស ឈីលូ ជានពុចាយ នៅក្រុងបាវិត ខេត្តស្វាយរៀងដែលអាចបង្កើតការងាររហូតដល់៤០០០កន្លែងជូដល់កកម្មករនិយោជិត។
បើតាមឯកឧត្តម សុខ ចិន្តា សោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជាថា គម្រោងវិនិយោគរបស់ក្រុមហ៊ុននឹងចូលរួមដល់ការធ្វើពិពិធកម្មសេដ្ឋកិច្ចកម្ពុជា។
ឯកឧត្តម សុខ ចិន្តា សោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជាមានប្រសាសន៍គូសបញ្ជាក់ថា«ក្រុម៊ុន Cart Tire នឹងបញ្ជាទិញកៅស៊ូក្នុងស្រុក១០០% សម្រាប់ប្រើប្រាស់ជាវត្ថុធាតុដើម ក្នុងការផលិតសំបកកង់យានយន្ត ដោយនៅឆ្នាំទី១ ក្រុមហ៊ុននឹងត្រូវការកៅស៊ូប្រមាណ ៥០.០០០តោន ហើយនៅឆ្នាំទី៥ តម្រូវការនឹងកើនឡើងរហូតដល់១៥០.០០០តោន ស្មើនឹងប្រមាណ៤៣% នៃផលិតកម្មកៅស៊ូក្នុងស្រុកសរុបឆ្នាំ២០២០»។
លោកឧកញ៉ា លឹម ហេង អនុប្រធានសភាពាណិជ្ជកម្ម និងជាអ្នកវិនិយោគក្នុងវិស័យកៅស៊ូមួយរូបមានប្រសាសន៍ថា នេះគឺជាចំណុចល្អ ដែលរាជរដ្ឋាភិបាលក៏ដូចជាក្រុមប្រឹក្សាអភិវឌ្ឍន៍កម្ពុជា រួមនិងសភាពាណិជ្ជកម្មតែងតែទៅអំពាវនាវនៅខាងក្រៅដើម្បីឱ្យវិនិយោគិនមកចូលមកកម្ពុជា។ជាការឆ្លើយតប យើងឃើញថាមានក្រុមហ៊ុនវិនិយោគបានចូលមកហើយ ដើម្បីផលិតសំបកកង់យានយន្តនេះ ។
លោកឧកញ៉ា សង្កត់ធ្ងន់ថា« អ្នកដាំកៅស៊ូជាលក្ខណៈគ្រួសារ និងក្រុមហ៊ុន ទន្ទឹងរងចាំក្រុមហ៊ុនមកវិនិយោគ ដើម្បីទិញកៅក្នុងស្រុក ដើម្បីផលិតនៅក្នុងប្រទេសដែលអាចទទួលបានតម្លៃបន្ថែមក្រៅពីការនាំចេញ។នេះហើយគឺជាពិសេសហើយល្អ ដែលវិស័យឯកជនរួមនិងសភាពពាណិជ្ជកម្មសាទរដែលក្រុមហ៊ុនចូលមកវិនិយោគ។
បើតាមលោកឧកញ៉ា បើសិនមានក្រុមហ៊ុនច្រើនទៀតចូលមកបណ្តាក់ទុននៅកម្ពុជាថែមទៀត ប្រាកដណាស់កំណើននៃការដាំកៅស៊ូនឹងមានការកើនឡើង ដែលអាចធ្វើឱ្យការដាំកៅស៊ូលក្ខណៈគ្រួសារអាចរស់បាន ហើយក្រុមហ៊ុនវិនិយោគលើកៅស៊ូអាចពង្រីកខ្លួនបន្ថែមទៀត។
លោកឧកញ៉ា លើកឡើងថា«នៅប៉ុន្មានឆ្នាំចុងក្រោយនេះ ជ័រកៅស៊ូធ្លាក់ថ្លៃ បានធ្វើឱ្យកៅស៊ូគ្រួសារនិងក្រុមហ៊ុនមួយចំនួនបានកែប្រែផ្ទៃដីទៅដាំដំណាំផ្សេង ។តែបើឥលូវកៅស៊ូមានទីផ្សារល្អ មានក្រុមហ៊ុនទិញក្នុងស្រុកដោយមិនបាច់នាំចេញហើយបានតម្លៃបន្ថែមហើយអាចបង្កើតការងារនៅក្នុងប្រទេសនេះ គឺជារឿងល្អ ។យើងមានទីផ្សារកៅស៊ូក្នុងស្រុកស្រាប់ យើងនឹងមានលំនឹងក្នុងការលំហូរកៅស៊ូដោយមិនជាប់គាំងនៅលើទីផ្សារ»៕
ចែករំលែកព័តមាននេះ