ខេត្តកំពង់ចាម ៖ ក្រុមស្ម័គ្រចិត្តណាហ្គាវើលបេះដូងសប្បុរស បាននាំយកសម្ភារសិក្សា និងដើមឈើទៅចែកជូនដល់សិស្សានុសិស្ស និងដាំនៅក្នុងបរិវេណសាលាបឋមសិក្សា ហ៊ុន សែន ជីបាល ស្ថិតក្នុងឃុំជីបាល
ខេត្តកំពង់ចាម ៖ ក្រុមស្ម័គ្រចិត្តណាហ្គាវើលបេះដូងសប្បុរស បាននាំយកសម្ភារសិក្សា និងដើមឈើទៅចែកជូនដល់សិស្សានុសិស្ស និងដាំនៅក្នុងបរិវេណសាលាបឋមសិក្សា ហ៊ុន សែន ជីបាល ស្ថិតក្នុងឃុំជីបាល ស្រុកស្រីសន្ធរ ខេត្តកំពង់ចាម កាលពីថ្ងៃទី២៨ វិច្ឆិកា ២០១៥ ។
លោក James Ma បានមានប្រសាសន៍ថា «កុមារកម្ពុជា គឺជាអនាគតនៃប្រទេសកម្ពុជា។ នៅដើមឆ្នាំ ២០១៤ ក្រុមហ៊ុនណាហ្គាវើល បានបង្កើតកម្មវិធីការងារសង្គមក្នុងគោលបំណងដើម្បីផ្តល់ជំនួយចាំបាច់ដល់កុមារក្រីក្រ និងកុមារកំព្រាក្នុងវិស័យអប់រំនៅប្រទេសកម្ពុជា ជាពិសេសនៅតាមតំបន់ជនបទ ដូច្នេះពួកគេនឹងមានឱកាសដើម្បីធ្វើឲ្យប្រទេសកម្ពុជាមានការអភិវឌ្ឍន៍»។
លោកបានបន្ថែមទៀតថា «តាមរយៈកម្មវិធីអប់រំរបស់យើង យើងបានឧបត្ថម្ភសម្ភារសិក្សា និងសៀវភៅអានយ៉ាងច្រើនដល់សិស្សានុសិស្ស និងលោកគ្រូ អ្នកគ្រូនៅសាលារៀន និងអង្គការមិនមែនរដ្ឋាភិបាលប្រមាណជា៩០នៅតាមខេត្តមួយចំនូន និងរាជធានីភ្នំពេញផងដែរ។ បន្ថែមពីលើនេះទៀត យើងបានជួយកែលម្អហេដ្ឋា រចនា សម្ព័ន្ធសាលារៀនមួយចំនួនដូចជា សាលាបឋមសិក្សាហ៊ុនសែន ជីបាល សាលាបឋមសិក្សាពាមឃ្លៃ និងសាលាបឋមសិក្សារស្មីសាមគ្គី ដែលយើងសង្ឃឹមថា នឹងផ្តល់នូវបរិយាកាសសិក្សាល្អប្រសើរជាងមុនសម្រាប់កុមារ។ ក្នុងកិច្ចការងារជាដៃគូ យើងបាននឹងកំពុងធ្វើការជាមួយអង្គការមិនមែនរដ្ឋាភិបាល និងមជ្ឈមណ្ឌលកុមារកំព្រាមួយចំនួនក្នុងរាជធានីភ្នំពេញ និងខេត្តមួយចំនួន ក្នុងគោលបំណងដើម្បីជួយគាំទ្រដល់លក្ខខណ្ឌនៃការរស់នៅរបស់ស្ត្រីមេម៉ា កុមារកំព្រា និងកុមារផ្ទុកមេរោគអេដស៍ផងដែរ»។
លោកនាយកសាលាបឋមសិក្សា ហ៊ុន សែន ជីបាល បានមានប្រសាសន៍ថា «យើងសូមអរគុណដល់ក្រុមហ៊ុនណាហ្គាវើល ដែលតែងតែជួយសាលារៀនរបស់យើងយ៉ាងច្រើន។ កាលពីមុនណាហ្គាវើលបេះដូងសប្បុរស បានចាក់បេតុងបន្ទប់ថ្នាក់រៀនដែលបានបាក់បែក និងបានលាបថ្នាំអគារសាលារៀនរបស់យើងផងដែរ។ ណាហ្គាវើលបានកែប្រែសាលារៀនរបស់យើងឲ្យមានជីវិតថ្មី។ ម្យ៉ាងវិញទៀត ពួកគេបានឧបត្ថម្ភសម្ភារសិក្សាដល់សិស្សានុសិស្សរបស់យើង និងថែមទាំងបានលើកទឹកចិត្តកុមារឲ្យខិតខំរៀនសូត្រជាងមុនសម្រាប់អនាគតនៃប្រទេសកម្ពុជា។ ថ្ងៃនេះ ពួកគេបាននាំយកនូវសៀវភៅសរសេរ កូនកាបូបដាក់ប៊ិចខ្មៅដៃ និងប៊ិចមួយចំនួនធំ ដើម្បីយកទៅចែកជូនដល់សិស្សានុសិស្ស ព្រមទាំងដើមឈើ ដើម្បីដាំក្នុងបរិវេណសាលារៀនរបស់យើង។ សាជាថ្មីម្តងទៀត យើងសូមអរគុណដល់ណាហ្គាវើលបេះដូងសប្បុរស សម្រាប់ការឧបត្ថម្ភសម្ភារសិក្សាដល់សិស្សានុសិស្សក្រីក្រនៅតាមតំបន់ជនបទ។ នេះបង្ហាញថា ក្រុមហ៊ុនណាហ្គាវើល តែងតែចូលរួមក្នុងការអភិវឌ្ឍន៍វិស័យអប់រំនៅប្រទេសកម្ពុជា»។
សំអឿន ជាសិស្សថ្នាក់ទី៦ បាននិយាយថា គ្រួសារបស់គាត់ក្រីក្រណាស់ និងមិនអាចផ្គត់ផ្គង់សម្ភារសិក្សាដល់រូបគាត់បានទេ។ គាត់សូមអរគុណដល់ក្រុមហ៊ុនណាហ្គាវើល សម្រាប់សម្ភារសិក្សាទាំងនេះ។ គាត់សប្បាយរីករាយខ្លាំងណាស់ ដែលបានទទួលសវៀវភៅ និងប៊ិចជាច្រើនពីណាហ្គាវើលបេះដូងសប្បុរស ក្នុងខណៈពេលដែលគាត់កំពុងត្រូវការជាចាំបាច់៕
ចែករំលែកព័តមាននេះ