រាជធានីភ្នំពេញ ៖ ព្រឹកថ្ងៃទី១១ មីនា ២០១១ សម្តេចតេជោនាយករដ្ឋមន្ត្រីហ៊ុន សែន បានអនុញ្ញាតឱ្យលោកវូ វ៉ាន់ហៀន ប្រធានវិទ្យុសំឡេងសាធារណរដ្ឋសង្គមនិយមវៀតណាម ចូលជួបសម្តែងការគួរសម និងពិភាក្សាការងារ ក្នុងកិច្ចសហប្រតិបត្តិការរវាងវិទ្យុវៀតណាម និងវិទ្យុជាតិកម្ពុជា នៅវិមានសន្តិភាពទីស្តីការនាយករដ្ឋមន្ត្រី។
លោកវូ វ៉ាន់ហៀន បានជម្រាបជូនសម្តេចតេជោនាយករដ្ឋមន្ត្រីថា ទស្សនកិច្ចរបស់គណៈប្រតិភូវិទ្យុវៀតណាមនៅកម្ពុជានាពេលនេះ គឺដើម្បីសហការជាមួយក្រសួងព័ត៌មានកម្ពុជា។ កាលពីថ្ងៃទី១០ មីនា កន្លងមកនេះ លោកបានប្រគល់សម្ភារមួយចំនួនជូនដល់ស្ថានីយវិទ្យុជាតិកម្ពុជានៅខេត្តសៀមរាប។ ឥឡូវនេះ វិទ្យុជាតិកម្ពុជា និងវិទ្យុសំឡេងវៀតណាមកំពុងតែធ្វើសហប្រតិបត្តិការជាមួយគ្នាដើម្បីស្រាវជ្រាវ និងតម្លើងប្រព័ន្ធ FM និង AM មួយទៀត។ នៅក្នុងន័យនេះ កាលណាតម្លើងប្រព័ន្ធនេះហើយ វិទ្យុជាតិកម្ពុជា នឹងអាចផ្សព្វផ្សាយយ៉ាងទូលំទូលាយគ្របដណ្តប់ទូទាំងប្រទេសតែម្តង។ លោកវូ វ៉ាន់ហៀន ក៏បានជម្រាបជូនសម្តេចតេជោនាយករដ្ឋមន្ត្រីផងដែរថា វិទ្យុសំឡេងវៀតណាម ត្រៀមខ្លួនជានិច្ចដើម្បីជួយដល់វិទ្យុជាតិកម្ពុជា ក៏ដូចជាការបណ្តុះបណ្តាលធនធានមនុស្សជាដើម។
ជាការឆ្លើយតប សម្តេចតេជោនាយករដ្ឋមន្ត្រី ហ៊ុន សែន បានថ្លែងអំណរគុណចំពោះវិទ្យុសំឡេងវៀតណាមដែលតែងតែជួយដល់វិទ្យុជាតិកម្ពុជា ទាំងជំនួយបច្ចេកទេស ទាំងការបណ្តុះបណ្តាលធនធានមនុស្ស។ ក្នុងន័យនេះផងដែរ សម្តេចតេជោនាយករដ្ឋមន្ត្រីសូមជំរុញឱ្យមានការពង្រីក និងពង្រឹងកិច្ចសហប្រតិបត្តិការនេះកាន់តែធំឡើង ហើយសូមឱ្យជួយបណ្តុះបណ្តាលធនធានមនុស្សកម្ពុជាឱ្យបានកាន់តែច្រើនថែមទៀត។ ទន្ទឹមនេះសម្តេចតេជោនាយករដ្ឋមន្ត្រី ធ្វើការណែនាំដល់វិទ្យុជាតិ ធ្វើយ៉ាងណាឱ្យនាំមុខក្នុងការផ្សព្វផ្សាយអំពីចរាចរណ៍ ឧតុនិយម និងស្ថានភាពផ្លូវថ្នល់នៅពេលមានទឹកភ្លៀងលិចម្តងៗ ដើម្បីជួយដល់ចរាចរណ៍៕
ចែករំលែកព័តមាននេះ