ខេត្តកំពង់ចាម ៖ អ្នកជំងឺជាស្ត្រីមានផ្ទៃពោះគ្រប់ខែផ្ទុកកូវីដ១៩ រស់នៅតាមបណ្ដាស្រុកមួយចំនួននៅក្នុងខេត្តកំពង់ចាម និងមួយផ្នែកនៅខេត្តត្បូងឃ្មុំ បានសម្រាកព្យាបាលនៅមន្ទីរពេទ្យមេគង្គ ក្រុងកំពង់ចាម ។ ខណៈជំងឺមិនទាន់នឹងជាផងក៏បានសម្រាលកូនជាបន្តបន្ទាប់ ដោយសុវត្ថិភាពក្រោមការជួយជ្រោមជ្រែងយកចិត្តទុកដាក់ពីសំណាក់ក្រុមគ្រូពេទ្យ…
ខេត្តកំពង់ចាម ៖ អ្នកជំងឺជាស្ត្រីមានផ្ទៃពោះគ្រប់ខែផ្ទុកកូវីដ១៩ រស់នៅតាមបណ្ដាស្រុកមួយចំនួននៅក្នុងខេត្តកំពង់ចាម និងមួយផ្នែកនៅខេត្តត្បូងឃ្មុំ បានសម្រាកព្យាបាលនៅមន្ទីរពេទ្យមេគង្គ ក្រុងកំពង់ចាម ។
ខណៈជំងឺមិនទាន់នឹងជាផងក៏បានសម្រាលកូនជាបន្តបន្ទាប់ ដោយសុវត្ថិភាពក្រោមការជួយជ្រោមជ្រែងយកចិត្តទុកដាក់ពីសំណាក់ក្រុមគ្រូពេទ្យ ។
លោកស្រីវេជ្ជបណ្ឌិតចាប ច័ន្ទធីតា ប្រធានមន្ទីរពេទ្យ មេគង្គ ក្រុងកំពង់ចាម មានប្រសាសន៍ឱ្យដឹង នារសៀលថ្ងៃទី៣០ ខែមិថុនា ឆ្នាំ២០២១ថា អ្នកជំងឺក្មេងចាស់ប្រុសស្រីរស់នៅតាមស្រុកមួយចំនួនក្នុងខេត្តកំពង់ចាម ត្រូវបានរកឃើញទុកវិជ្ជមានកូវីដ១៩ ត្រូវបានបញ្ជូនមកព្យាបាលនៅមន្ទីរពេទ្យមេគង្គ ក្នុងនោះមានអ្នកខ្លះជាស្ត្រីមានផ្ទៃពោះស្ទើរគ្រប់ខែ ហើយជំងឺមិនទាន់ជាសះស្បើយផងនោះក៏ឈឺពោះសម្រាលកូន ។
ប្រធានមន្ទីរពេទ្យមេគង្គ មានប្រសាសន៍បន្តឲ្យដឹងទៀតថា ក្រុមគ្រូពេទ្យវះកាត់នៃមន្ទីរពេទ្យមេគង្គមាន : វេជ្ជ រៀម វិបុល វេជ្ជ សាន សំអាត លោក ស៊ុន តារា លោក កេង វ៉ាន់ឡេង លោកស្រី នូ ថារី បានធ្វើការវះកាត់ជូនស្ត្រី ដែលមានផ្ទៃពោះឈ្មោះ យឹម រ៉ានី អាយុ៣១ឆ្នាំ មកពីស្រុកពញាក្រែក ខេត្តត្បូងឃ្មុំ បានកូនស្រីទម្ងន់៣.៦ គីឡូក្រាម នៅម៉ោង៦និង២៥នាទីល្ងាច ថ្ងៃទី២៩ ខែមិថុនា ឆ្នាំ ២០២១ ។
លុះមកដល់វេលាម៉ោង៦និង៣០នាទីព្រឹក ថ្ងៃទី៣០ ខែមិថុនា ឆ្នាំ ២០២១ ស្ត្រីផ្ទៃពោះគ្រប់ខែឈ្មោះ ឈៀក ឈុនឡេង បានធ្វើការសម្រាលធម្មតា ភេទប្រុស ទំងន់២.៨គីឡូក្រាម ដោយមានការជួយសង្គ្រោះពីសំណាក់ វេជ្ជបណ្ឌិត សាន សំអាត និងកញ្ញា ថៃ ស្រីមាន ។
ចំពោះស្ត្រីដែលសម្រាលកូនទាំងពីរនាក់នេះ គឺក្រោមការយកចិត្តទុកដាក់ពីសំណាក់ក្រុមគ្រូពេទ្យជួរមុខបានធ្វើឲ្យសុខភាពទាំងម្ដាយនិងកូនមានសុវត្ថិភាព និងសុខភាពល្អទៀតផង ។
សូមបញ្ជាក់ថា ចាប់តាំងពីពេលដែល ឯកឧត្តមអ៊ុន ចាន់ដា អភិបាលខេត្ត រួមនឹងលោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្តប្រែក្លាយសណ្ឋាគារមកជាមន្ទីរពេទ្យសម្រាប់ព្យាបាលអ្នកជំងឺកូវីដ១៩ មកដល់ពេលនេះ អ្នកជំងឺដែលសម្រាលកូនសរុបចំនួន១៣នាក់ហើយ ក្នុងនោះវះកាត់៤នាក់ និងវះកាត់ខ្នែងពោះវៀនចំនួន២នាក់ផងដែរ ៕
ចែករំលែកព័តមាននេះ