ខេត្តសៀមរាប ៖ ព្រឹត្តិការណ៍រត់ពាក់កណ្ដាលម៉ារ៉ាតុង និងប្រណាំងកង់អន្ដរជាតិសៀមរាបអង្គរឆ្នាំនេះ កីឡាករបរទេសចូលរួមមានការកើនឡើង២០% បើប្រៀបធៀបទៅនឹងឆ្នាំ២០១៤ ។ នេះបើតាមលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាប្រាប់កោះសន្តិភាពឱ្យដឹងកាលពីព្រឹកម្សិលមិញ ។ ព្រឹត្តិការណ៍ខាងលើនេះ ធ្វើឡើងរយៈពេល២ថ្ងៃគឺនៅថ្ងៃសៅរ៍ និងអាទិត្យទី៥ និងទី៦ ធ្នូ ។
លោកវ៉ាត់ ចំរើន បានប្រាប់ឱ្យដឹងទៀតថា អ្វីដែលជាការកត់សម្គាល់នោះ គឺកីឡាករបរទេសដែលជាភ្ញៀវទេសចរមកលេងនៅតំបន់សៀមរាបអង្គរ បានមកចុះឈ្មោះចូលរួមប្រកួតមានការកើនឡើងយ៉ាងខ្លាំង។ ក្នុងចំណោមអ្នកមកចុះឈ្មោះចូលរួមប្រកួតរត់សរុប៨.៥០០នាក់ គឺមានកីឡាករបរទេសជាង៤.០០០នាក់មកពី៧៥ប្រទេសនៅលើពិភពលោក ។ ចំណែកការប្រកួតប្រណាំងកង់វិញ គឺធ្វើនៅថ្ងៃអាទិត្យទី៦ ធ្នូ មានកីឡាករចូលរួមចំនួន៤០០នាក់ ក្នុងនោះកីឡាករបរទេសមានរហូតដល់ទៅ៣០០នាក់ ។ លោកមិនទាន់ដឹងថា កីឡាករបរទេសទាំងនោះ មកពីប្រទេសណាខ្លះទេ ព្រោះថាពេលនេះ លោកកំពុងតែមានការមមាញឹកលើការងារបច្ចេកទេសប្រកួត ។
តាមការកត់សម្គាល់របស់លោកវ៉ាត់ ចំរើន គឺពីមួយឆ្នាំទៅមួយឆ្នាំ កំណើនភ្ញៀវបរទេសដែលមកចុះឈ្មោះចូលរួមព្រឹត្តិការណ៍ប្រកួតរត់ពាក់កណ្ដាលម៉ារ៉ាតុងនៅសៀមរាបអង្គរ មានការកើនឡើងយ៉ាងខ្លាំង បើទោះជាគណៈកម្មការរៀបចំការប្រកួតតម្រូវឱ្យបង់ប្រាក់ចូលរួមប្រកួតច្រើនយ៉ាងណាក៏ដោយ ។ កត្តាទាំងនេះបង្ហាញឱ្យឃើញថា ប្រាសាទអង្គរវត្តខ្មែរយើងបាននិងកំពុងត្រូវបានគេទទួលស្គាល់ទូទាំងពិភពលោក ។ ក្រសួងទេសចរណ៍ដែលមានតួនាទីយ៉ាងសំខាន់ក្នុងការអូសទាញភ្ញៀវទេសចរឱ្យចូលមកលេងនៅក្នុងប្រទេសកម្ពុជានោះ បានសហការជាមួយគណៈកម្មាធិការជាតិអូឡាំពិកកម្ពុជា ខិតខំរៀបចំឱ្យមានកម្មវិធីកម្សាន្ដជាហូរហែនៅតាមតំបន់ទេសចរណ៍ដ៏មានសក្ដានុពលរបស់កម្ពុជាជាច្រើនកន្លែងដែលពីមុនមិនដែលមានទាល់តែសោះ ។ ការធ្វើបែបនេះគឺដើម្បីទាក់ទាញភ្ញៀវទេសចរឱ្យមកលេងប្រទេសកម្ពុជាកាន់តែច្រើនឡើងថែមទៀត ៕
ចែករំលែកព័តមាននេះ