រាជធានីភ្នំពេញ ៖ មិន សិលា មកពីសមាគមកីឡាប្រដាល់ក្រសួងការពារជាតិ និងជា សំនៀង មកពីក្លិបកងទ័ពឆត្រយោង៩១១ ដែលត្រូវជួបប្រកួតជាមួយកីឡាករឡាវ នៅក្នុងកម្មវិធីប្រកួតជម្រុះវិលជុំដណ្ដើមខ្សែក្រវាត់គោលជល់
រាជធានីភ្នំពេញ ៖ មិន សិលា មកពីសមាគមកីឡាប្រដាល់ក្រសួងការពារជាតិ និងជា សំនៀង មកពីក្លិបកងទ័ពឆត្រយោង៩១១ ដែលត្រូវជួបប្រកួតជាមួយកីឡាករឡាវ នៅក្នុងកម្មវិធីប្រកួតជម្រុះវិលជុំដណ្ដើមខ្សែក្រវាត់គោលជល់ នៅលើសង្វៀនស៊ីធីអិន ថ្ងៃសៅរ៍ទី៥ វិច្ឆិកា សប្ដាហ៍នេះមិនដឹងថាទៅរួចឬអត់នោះទេ ដោយសារកីឡាករឡាវសុទ្ធតែជាជើងខ្លាំងដែលធ្លាប់យកឈ្នះពួកគេទាំង២បែបនេះ ។ មិន សិលា ត្រូវជួបប្រកួតជាមួយកីឡាករឡាវឈ្មោះ អូរ៉ូណូ ចំប៉ាសក្តិ ចំណែកជា សំនៀង ត្រូវជួបប្រកួតជាមួយកីឡាករឡាវដូចគ្នាឈ្មោះ យ៉តឃុនភុន អេតបាងសៃ ។ ២គូនេះទើបតែឆ្លងកាត់ការប្រកួតវគ្គជម្រុះក្នុងពូលបានមួយលើកម្នាក់ប៉ុណ្ណោះ ហើយជាលទ្ធផលកីឡាករកម្ពុជាទាំង២នាក់នេះសុទ្ធតែទទួលការបរាជ័យយ៉ាងជូរចត់បំផុត ។
មិន សិលា កាលពីសប្ដាហ៍ទី១ត្រូវយ៉តឃុនភុន អេតបាងសៃ វាយឱ្យសន្លប់ធំនៅក្នុងទឹកទី២ ទើបការមកជួបអូរ៉ូណូ ចំប៉ាសក្តិ លើកនេះ ជ័យជម្នះហាក់ដូចជាស្ថិតនៅឆ្ងាយពីដៃរបស់កីឡាកររូបនេះខ្លាំងណាស់ ។ បើប្រៀបធៀបទៅលើមាឌ និងកម្ពស់មើលទៅគឺប្រដំប្រសងគ្នា ប៉ុន្តែផ្លែកីឡាករឡាវដែលមានកម្ពស់១,៧២ម៉ែត្រ ធ្លាប់ប្រកួតបាន៦២ដង ឈ្នះ៥១ដង ចាញ់១១ដង និងធ្លាប់ផ្ដួលគូប្រកួតឱ្យសន្លប់បាន៥ដងពិតជាល្អជាង ។ ជាពិសេសផ្លែកែងនិងជង្គង់របស់គេអាចប្រើការបានយ៉ាងស្ទាត់ជំនាញ បើនិយាយពីស្នៀតកណ្ដាប់ដៃនិងស្នៀតជើងវិញនោះកាន់តែសាហាវថែមទៀត រាល់ពេលម៉ាត់និងទាត់ចេញម្ដងៗរមែងចំគោលដៅល្អនិងមានទម្ងន់ធ្ងន់ទៀតផង ។ ចំណែក មិន សិលា បានតែស្នៀតកណ្ដាប់ដៃបន្តិចប៉ុណ្ណោះ ចលនាវាយចេញក៏មិនរហ័ស ចិត្តក៏តូចទៀត ទើបអ្នកគាំទ្រផ្ដល់ការជឿជាក់លើគេក្នុងភាគរយតិចបំផុត ។ ទោះជាយ៉ាងណាមានអ្នកជឿថា មិន សិលា ដែលមានកម្ពស់១,៧២ម៉ែត្រ ធ្លាប់ប្រកួតបាន៩០ដង ឈ្នះ៨០ដង ចាញ់៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់លើសង្វៀន២៣ដងនឹងប្រឹងប្រែងប្រកួតដើម្បីស្ដារការបរាជ័យកាលពីលើកមុនមិនខាន ។
ដោយឡែក ជា សំនៀង ជួបយ៉តឃុនភុនអេតបាងសៃ លើកនេះ កាន់តែយ៉ាប់ថែមទៀត ព្រោះកីឡាករឡាវរូបនេះពិតជាខ្លាំងមិនធម្មតាឡើយ ។ ជាក់ស្ដែងកាលពីសប្ដាហ៍ទី១ គេបានផ្ដួលមិន សិលា ឱ្យចាញ់សន្លប់ត្រឹមទឹកទី២ ប៉ុណ្ណោះ ។ ជា សំនៀង មានកម្ពស់១,៧០ម៉ែត្រ ធ្លាប់ប្រកួតបាន៩០ដង ឈ្នះ៨១ដង ចាញ់៨ដង ស្មើ១ដង និងធ្លាប់ផ្ដួលគូប្រកួតឱ្យសន្លប់១៧ដង។ ចំណែកយ៉តឃុនភុន អេតបាងសៃ មានកម្ពស់១,៧៣ម៉ែត្រ ធ្លាប់ប្រកួតបាន៨០ដង ឈ្នះ៦៥ដង ចាញ់១៣ដង និងស្មើ២ដង ។ ជា សំនៀង កាលពីសប្ដាហ៍ទី១ក៏ទ្រមខ្លួនដោយសារអូរ៉ូណូ ចំប៉ាសក្តិ មិនតិចដែររហូតត្រូវរាប់៨ ដល់ទៅ២ដងឯណោះ ប៉ុន្តែសំណាងល្អហើយដែលគេអាចស៊ូប្រកួតរហូតដល់ចប់ទឹកទើបចាញ់ត្រឹមពិន្ទុប៉ុណ្ណោះ ។ ចាំមើលលើកនេះវាសនារបស់គេនឹងទៅជាយ៉ាងណា ពេលជួបគូប្រកួតដែលខ្លាំងជាងមុនបែបនេះ ។
ក្រៅពីគូដណ្ដើមខ្សែក្រវាត់ ក៏មានគូមិត្តភាពរវាងកីឡាករកម្ពុជានិងកម្ពុជាដែលរំពឹងថានឹងល្អមើលដែរដូចជា កីឡាករទេស ឧត្តម មកពីក្លិបកងពលតូចលេខ៧០ ប្រកួតជាមួយកីឡាករផន ផល្លា មកពីក្លិបតាព្រហ្មមានជ័យបង្ក្រាបគ្រឿងញៀន និងកីឡាករ ប៊ិត ប៊ុនធឿន មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករថុល មករា មកពីក្លិបឃ្លាំងមឿងកីឡា ៕
ចែករំលែកព័តមាននេះ