ខេត្តកំពង់ចាម៖ ក្រុមគ្រូពេទ្យចំនួន ៧៦០នាក់ បានចុះនៅទីតាំងផ្ដល់វ៉ាក់សាំងប្រឆាំងកូវីដ១៩ នៅស្រុកចំនួនបួន និងក្រុងកំពង់ចាម នៅក្នុងយុទ្ធនាការទ្រុងទ្រាយធំ ដែលបានធ្វើឡើងព្រមៗគ្នា ដើម្បីផ្ដល់ជូនប្រជាពលរដ្ឋប្រមាណ ៣៥ម៉ឺននាក់។ នេះបើតាមលោក អ៊ុន ចាន់ដា អភិបាលខេត្តកំពង់ចាម ថ្លែងនៅព្រឹកថ្ងៃទី២៩ ខែមិថុនា ឆ្នាំ២០២១ ក្នុងពេលបើកយុទ្ធនាការចាក់វ៉ាក់សាំង នៅបរិវេណសាលាបឋមសិក្សា-អនុវិទ្យាល័យអង្គរ ក្នុងស្រុកកំពង់សៀម។
ជាមួយនោះ អាជ្ញាធរបានក្រើនរំលឹកដល់ប្រជាពលរដ្ឋណា ដែលមិនទាន់ទទួលការចាក់វ៉ាក់សាំង សូមប្រញាប់រួសរាន់មកចាក់វ៉ាក់សាំង ដើម្បីឱ្យមានអង់ទីគ័រការការពារខ្លួនប្រឆាំងនឹងជំងឺកូវីដ១៩។
លោក គីមសួរ ភិរុណ ប្រធានមន្ទីរសុខាភិបាលនៃរដ្ឋបាលខេត្ត បានគូសបញ្ជាក់ថា សម្រាប់យុទ្ធនាការចាក់វ៉ាក់សាំងនេះ គឺធ្វើឡើងព្រមគ្នា នៅក្នុងស្រុកចំនួន៤ ក្នុងនោះ មាន៖ ស្រុកបាធាយ ជើងព្រៃ ក្រោមការរៀបចំរបស់ពេទ្យកងយុទ្ធពលខេមរៈភូមិន្ទ។ ចំណែកស្រុកព្រៃឈរ កំពង់សៀម និងក្រុងកំពង់ចាម គឺមានគ្រូពេទ្យមន្ទីរសុខាភិបាលនៃរដ្ឋបាលខេត្ត ដែលត្រូវចាក់ជូនដល់ប្រជាពលរដ្ឋ ចាប់ពីអាយុ ១៨ឆ្នាំឡើង។ សម្រាប់ក្រុមគ្រូពេទ្យរបស់សុខាភិបាល មានចំនួន ៧៦ក្រុម និងទីតាំង ដែលត្រូវចាក់ ចំនួន ២៧កន្លែង។
លោក អ៊ុន ចាន់ដា អភិបាលខេត្ត មានប្រសាសន៍ថា ការទន្ទឹងរង់ចាំរបស់បងប្អូនប្រជាពលរដ្ឋ រយៈពេលប៉ុន្មានខែមកហើយ ដើម្បីត្រៀមខ្លួនចាក់វ៉ាក់សាំងប្រឆាំង នៅទីបំផុត ក្រោមការយកចិត្តទុកដាក់ពីសំណាក់តេជោ សែន បានផ្ដល់អំណោយវ៉ាក់សាំងទាំងនេះ មកដល់ខេត្តកំពង់ចាម ដើម្បីចាក់ជូនដល់ប្រជាពលរដ្ឋ ដោយធ្វើឡើង តាមការស្នើសុំរបស់រដ្ឋបាលខេត្ត។
លោក អ៊ុន ចាន់ដា បន្តថា ជំងឺនេះ បានបង្កការលំបាកដល់សមីខ្លួន និងសមាជិកក្រុមគ្រួសារ ហើយបើមានការធ្វេសប្រហែសនោះ បន្តឆ្លងទៅដល់អ្នកដទៃ រួមទាំងឆ្លងចូលក្នុងសហគមន៍។ ទន្ទឹមនឹងនោះ ក៏មានបុគ្គលមួយចំនួនធំ បានអនុវត្តនូវវិធានការការពារតាមការណែនាំរបស់ក្រសួងសុខាភិបាល បានត្រឹមត្រូវ ព្រមទាំងបានធ្វើឲ្យសមាជិកក្រុមគ្រួសារមានភាពកក់ក្តៅ។ ចំពោះបងប្អូន ដែលបានមកទទួលចាក់វ៉ាក់សាំងដុសទី១ នៅសាលាបឋមសិក្សាអង្គរ ត្រូវតែអនុវត្តតាមការណែនាំរបស់គ្រូពេទ្យឲ្យបានល្អ ដើម្បីឈានទៅចាក់នូវដូសទី២ ធ្វើយ៉ាងណាឱ្យមានអង់ទីក័រ សម្រាប់ ប្រឆាំងនឹងជំងឺកូវីដ១៩។
ការផ្ដល់វ៉ាក់សាំងទ្រង់ទ្រាយធំ នៅស្រុកចំនួនបួន និងក្រុងកំពង់ចាម ដែលមានប្រជាពលរដ្ឋប្រមាណ ៣៥ម៉ឺននាក់ នឹងត្រូវប្រើរយៈពេលមួយខែ។
កន្លងមក ប្រជាពលរដ្ឋ មន្ត្រីរាជការ ព្រះសង្ឃ និងកងកម្លាំងប្រដាប់អាវុធគ្រប់ប្រភេទ រួមទាំងថ្នាក់ដឹកនាំខេត្តកំពង់ចាម បានចូលរួមវិភាគទានជូនរាជរដ្ឋាភិបាល ដើម្បីទិញវ៉ាក់សាំងនេះផងដែរ។
ក្នុងនាមអាជ្ញាធរខេត្តកំពង់ចាម លោក អ៊ុន ចាន់ដា បានប្រកាសថ្លែងអំណរគុណយ៉ាងជ្រាលជ្រៅ ចំពោះសម្ដេចអគ្គមហាសេនាបតីតេជោ ហ៊ុន សែន ដែលបានផ្ដល់អំណោយនូវវ៉ាក់សាំងប្រឆាំងកូវីដ១៩ ដើម្បីចាក់ជូនដល់ប្រជាពលរដ្ឋ នៅក្នុងខេត្តកំពង់ចាម ចំនួនប្រមាណ ៣៥ម៉ឺននាក់ ក្នុងជំហ៊ានដំបូងនេះ។ នេះគឺជាការគិតគូររបស់ថ្នាក់ដឹកនាំ ដើម្បីលើកកម្ពស់សុខមាលភាពរបស់ប្រជាជន ឱ្យកាន់តែប្រសើរឡើង ក៏ដូចជាការស្ដារនូវសេដ្ឋកិច្ចជាតិ ឲ្យមានសម្ទុះរីកចម្រើន៕ ចាន់ ថេត
ចែករំលែកព័តមាននេះ