រាជធានីភ្នំពេញ ៖ យ៉ាងហោចណាស់ មានក្រុមអាជីវករលក់ដូរនៅផ្សារបឹងកេងកងរហូតទៅដល់ចំនួន ២៤៦នាក់ឯណ្ណោះ ក្នុងចំណោមអ្នកដែលមកធ្វើតេស្តសរុបចំនួន ១២១១ នាក់ ដែលបានរកឃើញមានវិជ្ជមានជំងឺកូវីដ១៩ ក្រោយពីអាជ្ញាធរបានបិទខ្ទប់ផ្សារ មិនអោយលក់ដូរ ហើយតម្រូវអោយក្រុមអាជីវករទាំងអស់នាំគ្នាទៅយកសំណាក នៅក្នុងសាលាវិទ្យាល័យ ជា ស៊ីម បឹង កេងកង កាលពីថ្ងៃទី២៨ ខែមិថុនា ឆ្នាំ២០២១ តែរយៈពេលតែមួយថ្ងៃនោះ ។
តាមប្រភពព័ត៌មានបានប្រាប់ឱ្យដឹងថា ក្រោយពេលដែលអាជ្ញាធរបានធ្វើការបិទខ្ទប់ផ្សារបឹងកេងកង កាលពីព្រឹកថ្ងៃទី២៨ ខែមិថុនា ឆ្នាំ២០២១ ម្សិលមិញនេះ ដើម្បីតម្រូវអោយក្រុមអាជីវករលក់ដូរក្នុងផ្សារទាំងអស់នាំគ្នាទៅធ្វើសំណាក នៅក្នុងសាលាវិទ្យាល័យ ជា ស៊ីម បឹងកេងកងនោះ ។
កម្លាំងអាជ្ញាធរមូលដ្ឋានបានធ្វើការសហការជាមួយ និងក្រុមគ្រូពេទ្យស្ម័គ្រចិត្ត ក៏បានធ្វើសំណាកទៅលើក្រុមអាជីវកប្រុស ស្រី សរុបមានចំនួន ១២១១នាក់ បាននាំគ្នាមកធ្វើសំណាកវីរុសកូវីដ១៩ ។ ដោយចាប់តាំងព្រឹករហូតដល់យប់ ជាលទ្ធផលរកឃើញថា មានក្រុមអាជីវករលក់ដូរក្នុងផ្សាររហូតទៅដល់ ២៤៦ នាក់ ក្នុងចំណោមអ្នកដែលមកយកសំណាកក្នុងថ្ងៃនេះ ដែលជាចំនួនមួយយ៉ាងច្រើនរកនឹកស្មានមិនដល់ ហើយក៏នៅមានអាជីវករមួយចំនួនទៀត ក៏មិនទាន់បានមកយកសំណាកដែរ ។
ពាក់ព័ន្ធទៅ និងករណីផ្ទុះជំងឺកូវីដ ១៩ នៅផ្សារបឹងកេងកងនេះដែរ គេមិនអាចបានដឹងពីប្រភពនៃការចម្លងរីករាលដាលពីអ្នកណាម្នាក់ច្បាស់លាស់ឡើយ ដោយសារតែវីរុសដ៏កាចសាហាវមួយនេះ វាកំពុងតែឆ្លងរីករាលដាលទៅកាន់មនុស្សយ៉ាងច្រើននៅគ្រប់ទីកន្លែងនោះ ។ សំរាប់អ្នកដែលមកយកសំណាករកមេរោគកូវីដ១៩ ដែលរកឃើញមានវិជ្ជមានទាំង ២៤៦នាក់នេះត្រូវបានគេដឹកយកទៅធ្វើការព្យាបាលនៅ កន្លែងព្យាបាលនៅកោះពេជ្រទាំងអស់ ចំណែកឯអ្នកអវិជ្ជមានទាំង ៩៦៥នាក់ តម្រូវអោយធ្វើចត្តាឡីស័ករយៈពេល ១៤ថ្ងៃ នៅតាមផ្ទះរៀងៗខ្លួន រង់ចាំយកសំណាក់ជាលើកទី២ផងដែរ និងក្រុមអាជីវករណាដែលមិនបានមកធ្វើតេស្តនៅពេលនេះ ក៏សូមអោយទៅធ្វើនៅមន្ទីរពេទ្យមិត្តភាពខ្មែរ សូវៀត ឬក៏សាលាវិទ្យាល័យ បាក់ទូក ជាបន្តផងដែរ។
ទន្ទឹមនឹងនេះ ក្នុងថ្ងៃទី២៨ ខែមិថុនា ឆ្នាំ២០២១នេះដែរ អាជ្ញាធរក៏បានធ្វើការបិទកុដិ លេខ១៧ ស្ថិតនៅក្នុងវត្តមហាមន្ត្រី ដែលស្ថិតនៅក្នុងសង្កាត់អូឡាំពិក ខណ្ឌបឹងកេងកង១ផងដែរ និងតម្រូវអោយព្រះសង្ឃដែលពាក់ព័ន្ធចំនួន ១៣អង្គធ្វើចត្តាឡីស័ក ក្រោយពីមានសិស្សស្នាក់នៅក្នុងវត្តម្នាក់មានវិជ្ជមានជំងឺកូវីដ១៩ នៅពេលដែលទៅយកសំណាកនៅក្នុងសាលាវិទ្យាល័យ ជា ស៊ីម បឹងកេងកងដែរនោះ ៕
ចែករំលែកព័តមាននេះ