រាជធានីភ្នំពេញ ៖ ក្រោយពីជ្រើសរើសបានកីឡាករជើងខ្លាំងក្នុងប្រភេទទម្ងន់៦០គីឡូក្រាម តាមរយៈការដណ្ដើមជើងឯករបស់ក្រុមហ៊ុន Tiffy ស្ថានីយទូរទស្សន៍ប៉ុស្ដិ៍លេខ៥ នៅមិនទាន់បើកឆាកប្រកួតដណ្ដើមជើងឯកវគ្គថ្មី សម្រាប់ព្រឹត្តិការណ៍ថ្ងៃអាទិត្យនៅចុងសប្ដាហ៍នេះទេ ។ អ៊ីចឹងហើយទើបកីឡាករហេង វិឆ័យ មកពីក្លិបកងពលតូចលេខ៧០ មានឱកាសបានឡើងសងសឹកជាមួយកីឡាករឡេះ តើក មកពីក្លិបពុទ្ធសេរីវង្សកីឡា ក្នុងជំនួបលើកទី៤ នៅសង្វៀន TV5 ARENA សម្រាប់យប់ថ្ងៃអាទិត្យ ទី៦ ខែធ្នូ ឆ្នាំ២០១៥នេះ ។
ឡេះ តើក និង ហេង វិច្ឆ័យ ត្រូវប្រកួតគ្នាក្នុងប្រភេទទម្ងន់៦៩គីឡូក្រាម ដោយការប្រកួតនេះ ក៏ជារឿងកម្រផងដែរសម្រាប់អ្នកទាំង២ បន្ទាប់ពីបានក្លាយខ្លួនជាជើងខ្លាំងនៅលើសង្វៀន និងខកខានសាកល្បងសមត្ថភាពគ្នាយូរក្រែល ។ ហេង វិច្ឆ័យ គឺជាកីឡាករល្អម្នាក់ដែលជាប់លេខខាងមានស្នៀតទាត់ល្អ និងធ្លាប់ផ្ដួលកីឡាករល្អនៅក្នុងជំនាន់ និងមុនជំនាន់ឲ្យចាញ់រាប់មិនអស់ផងដែរ ។ ជាក់ស្ដែងក្នុងជំនួបប៉ះ ឡេះ តើក ២លើកដំបូង កាលពីឆ្នាំ២០១២ និង២០១៣ កីឡាកររូបនេះសុទ្ធតែឈ្នះការប្រកួតទាំងអស់ បើទោះជាឈ្នះដោយត្រដាបត្រដួសបន្តិចក្ដី។
យ៉ាងណាក៏ដោយការប៉ះគ្នាកាលពីលើកទី៣ នៅអំឡុងឆ្នាំ២០១៤ កីឡាករឡេះ តើក បានទទួលជ័យជម្នះវិញ ដោយឈ្នះក្នុងលទ្ធផលមិនឈ្នះដាច់នោះទេ ទើបគេប៉ាន់ស្មានថាការប៉ះគ្នានៅថ្ងៃអាទិត្យនេះរបស់ពួកគេអាចនឹងពិបាកជាងមុន។ ម្យ៉ាងឡេះ តើកពេលនេះមិនដូចពីមុននោះទេ គឺល្អជាងមុនដាច់ឆ្ងាយ បើទោះជាវ័យរបស់គេកាន់តែជ្រេមិនដូចមុននោះក៏ដោយ។ កីឡាករហេង វិច្ឆ័យ ហាក់នៅតែមានជំនឿខ្ពស់សម្រាប់ការប៉ះគ្នានៅចុងសប្ដាហ៍នេះជាមួយឡេះ តើក ដោយសារធ្លាប់សាកថ្វីដៃ និងធ្លាប់ឈ្នះ២លើករួចមកហើយនៅលើសង្វៀន ។ ហេង វិច្ឆ័យ ប្រកួតចុងក្រោយឈ្នះពុទ្ធ ផនកុសល មកពីក្លិបពុទ្ធសេរីវង្សក្នុងទឹកទី៤ ក្នុងពេលដែលការប្រកួតប៉ុន្មានលើកចុងក្រោយរបស់គេ ក៏ទទួលបានលទ្ធផលល្អផងដែរ ។
ងាកមកមើលកីឡាករឡេះ តើក ក៏មិនអន់នោះដែរ ព្រោះកម្រិតប្រកួត និងសមត្ថភាពជាក់ស្ដែងរបស់គេល្អជាងមុន ។ ផ្អែកតាមបទពិសោធន៍ កីឡាកររូបនេះក៏ជាជើងខ្លាំងចាស់វស្សា សម្បូរល្បិចកលច្រើនដែរ ទើបគេមើលឃើញថា មិនមែនជារឿងងាយស្រួលនោះទេសម្រាប់ឱកាសយកឈ្នះរបស់កីឡាករហេង វិច្ឆ័យ នៅប៉ុស្ដិ៍លេខ៥លើកនេះ ។ ម្យ៉ាងក្នុងពេលហេង វិច្ឆ័យ ឈ្នះ ឡេះ តើក គេឈ្នះដោយពិបាកបំផុត គឺមិនដូចការប្រកួតឈ្នះរបស់ឡេះ តើក ក្នុងជំនួបដែលអ្នកទាំងពីរប៉ះគ្នានៅឆ្នាំ២០១៤មុនទេ ។ ឡេះ តើក គឺជាកីឡាករម្នាក់ដែលចេះបត់បែនស្ថានការណ៍វាយលុកបានល្អបានគ្រប់កាលៈទេសៈ ដោយមិនសូវញញើតទៅលើគូប្រកួតនោះឡើយ ទើបជំនួបប៉ះគ្នាជាមួយកីឡាករថៃឈ្មោះ Thom Valek នៅប៉ុស្ដិ៍អាស៊ីអាគ្នេយ៍មុននេះ ទោះជាចាញ់ថៃដោយពិន្ទុ ប៉ុន្តែជាលទ្ធផលដែលអ្នកគាំទ្រយល់ថានៅខ្លាំង ។
នៅក្នុងព្រឹត្តិការណ៍នោះដែរ កីឡាករឆាយ ម៉េត មកពីក្លិបសំរោងកោងកីឡាខេត្តបាត់ដំបង ក៏ត្រូវគេឲ្យជួបប្រកួតសងសឹកជាមួយកីឡាករ យិន បូរិន មកពីក្លិបអាស៊ីកីឡា ក្នុងប្រភេទទម្ងន់៥៧គីឡូក្រាមដែរ ។ អ្នកប្រដាល់ទាំងពីរធ្លាប់ប្រកួតគ្នា៤ដងហើយ ដោយម្នាក់ៗធ្លាប់ឈ្នះចាញ់គ្នា២ដងម្នាក់ដូចគ្នា ។ យិន បូរិន គេមានស្នៀតប្រដាល់ល្អ និងរហ័សទាំងដៃ ទាំងជើង ប៉ុន្តែគេអន់កម្ពស់បន្តិច អញ្ចឹងហើយទើបបានយកឈ្នះលើ ឆាយ ម៉េត ក្នុងជំនួបប៉ះគ្នាលើកចុងក្រោយ។ ឆាយ ម៉េត ក៏មិនអន់នោះដែរសម្រាប់ការប្រកួត ប៉ុន្តែមកពីគេរាងស្ពឹកមិនសូវរហ័ស ហើយច្រើនតែទុកឲ្យគូប្រកួតសម្រុកសិនទើបប្រឹងវាយសន្ធាប់តបតទៅវិញ ។
យ៉ាងណាក៏ដោយ សម្រាប់លទ្ធផលរបស់កីឡាករទាំង៤ គឺមានតែការប្រកួតដែលនឹងធ្វើឡើងនៅប៉ុស្ដិ៍លេខ៥ ចាប់ពីម៉ោង៥ល្ងាចតទៅប៉ុណ្ណោះ ដែលអាចកាត់ក្ដីថាអ្នកណាឈ្នះឬចាញ់ម្ដងទៀត សម្រាប់ការប្រកួតប៉ះគ្នាលើកនេះ ៕
ចែករំលែកព័តមាននេះ