រាជធានីភ្នំពេញ ៖ ក្រោយបញ្ចប់ពិធីភ្ជាប់ពាក្យជាលក្ខណៈគ្រួសារកាលពីថ្ងៃទី២៩ វិច្ឆិកា ឆ្នាំ២០១៥ កីឡាករល្បីឈ្មោះផ្នែកអុកចត្រង្គ លោកឈាវ បូរ៉ា បានប្រាប់កោះសន្ដិភាពថា លោកនឹងរៀបការនៅដើមឆ្នាំ២០១៦នេះហើយ គឺជ្រើសយកកាលបរិច្ឆេទមុនថ្ងៃរៀបការរបស់កីឡាករ ឡុង សុភី នោះទៅទៀត។ អ្វីដែលគួរកត់សម្គាល់ គឺគូដណ្ដឹងជាអនាគតភរិយារបស់លោក ក្រៅពីជានារីវ័យក្មេងដ៏ស្រស់ស្អាតក៏ជាម្ចាស់ហាងកាហ្វេដែលមានជីវភាពរឹងមាំផងដែរ។
ឈាវ បូរ៉ា និយាយថា មុនឈានដល់ពិធីភ្ជាប់ពាក្យជាមួយគូដណ្ដឹងរវាងលោក និងនាងបានសិក្សាស្វែងយល់ចិត្តគ្នាប្រមាណជា៤ឆ្នាំមកហើយ គឺតាំងពីពេលដែលលោកមិនទាន់ប្រឡូកអាជីពជាកីឡាករលេងអុកនោះទៅទៀត ។ លោកបានស្គាល់នាង ដោយសារតែនាងគឺម្ចាស់ហាងកាហ្វេឈ្មោះ«កាហ្វេស្រីអូន»ដែលស្ថិតនៅម្ដុំបុរីកីឡា វិទ្យាល័យបាក់ទូក ក្នុងពេលដែលលោកឧស្សាហ៍ទៅសម្ងំលេងអុកដើម្បីហ្វឹកហាត់ជំនាញមុនសម្រេចចូលប្រឡងកីឡាអុកចត្រង្គថ្នាក់ប្រទេស ។ លោកថា គូដណ្ដឹងរបស់ខ្លួន គឺជានិស្សិតផង និងជាម្ចាស់ហាងកាហ្វេផង ដែលបានបើកមុខរបរនេះច្រើនឆ្នាំមកហើយ ក្រោមការជ្រោមជ្រែងពីសំណាក់ឪពុកម្ដាយរបស់នាងដែលជាអ្នករកស៊ី។
នាងបានស្រឡាញ់ពេញចិត្តលោកដោយចិត្តនិងចិត្ត ហើយដោយមានការឯកភាពពីសំណាក់ចាស់ទុំ ទើបពិធីភ្ជាប់ពាក្យរបស់លោក និងនាងត្រូវបានធ្វើឡើងកាលពីចុងខែវិច្ឆិកា ដោយនៅសល់ត្រឹមតែមួយខែគត់ គឺនឹងដល់ថ្ងៃរៀបការ ។ លោកថា ចាស់ទុំបានជ្រើសយកថ្ងៃទី៣ ខែមករា ដើមឆ្នាំ២០១៦ ដើម្បីរៀបការ ដោយសារតែការមើលវេលាគឺល្អនៅក្នុងថ្ងៃហ្នឹងជាជាងថ្ងៃខែផ្សេង។ ម្យ៉ាងមកពី លោក និងនាងមិនចង់ទុកពេលយូរក្រោយពីបានភ្ជាប់ពាក្យនោះផង ទើបសម្រេចចូលរោងភ្លាមៗ ក្រោយពីបានបំពាក់ចិញ្ចៀនឱ្យគ្នាទៅវិញទៅមក ក្នុងនាមជាគូដណ្ដឹង ។
ស្ដេចអុកចត្រង្គឈាវ បូរ៉ា បញ្ជាក់ថា គូស្នេហ៍របស់ខ្លួនមានឈ្មោះថា ហ៊ាង ទិត្យបុស្បា មានអាយុ២២ឆ្នាំ ជាកូនអ្នកខេត្តព្រៃវែង ដែលបានមករស់នៅភ្នំពេញយូរឆ្នាំមកហើយ។ លោកថា រវាងលោក និងនាងគឺបានភ្ជាប់គ្នាដោយសារតែកេរ្តិ៍ឈ្មោះរបស់លោកដែលបានក្លាយជាស្ដេចអុកចត្រង្គប្រចាំប្រទេសកម្ពុជា ។ លោកថាមិនមានចំណូលចិត្តបង្ហាត់បង្រៀនឲ្យអនាគតភរិយាចេះលេងអុកដើម្បីអាចជួយបង្ហាត់សិស្ស ឬជួយរៀបចំការបង្វឹករបស់ខ្លួននោះទេ ដោយសារតែនាងក៏មិនមានចំណូលចិត្តហើយក៏មានកិច្ចការផ្ទាល់ខ្លួនធ្វើដែរ ។ លោកនិយាយថា៖ «គូដណ្ដឹងខ្ញុំ គាត់ស្រឡាញ់ខ្ញុំរឿងខ្ញុំចេះលេងអុក ប៉ុន្តែគាត់អត់ចង់ចេះអាហ្នឹងទេ ហើយខ្ញុំក៏មិនអាចទៅបង្រៀនគាត់ដើម្បីឱ្យគាត់មកជួយខ្ញុំអីដែរ គឺខ្ញុំសុខចិត្តបង្រៀនសិស្សដែលចង់ចេះ ហើយមកជួយក្នុងពេលខ្ញុំបង្ហាត់សិស្សវិញ!»។
លោកអះអាងថា មកទល់ពេលនេះ លោកបានដំណើរការបង្រៀនសិស្សលើផ្នែកកីឡាអុកបានប្រមាណជា៣០នាក់ហើយសម្រាប់ការបង្រៀននៅវគ្គបើកឆាក ។ លោកនឹងបន្ថែមម៉ោងបង្រៀននៅវគ្គផ្សេងទៀតនៅពេលគៀរគរបានកូនសិស្សថ្មីៗឱ្យចូលមករៀនបន្ថែមទៀត។ លោកនិយាយថា៖ «ឥឡូវហ្នឹងខ្ញុំបើកបង្រៀនអុកទើបតែបានមួយវគ្គទេ លុះដល់ខ្ញុំការហើយទើបខ្ញុំបើកវគ្គថ្មីបន្ថែមទៀត ព្រោះមួយរយៈហ្នឹងមានគេចាប់អារម្មណ៍ចង់រៀនច្រើនហើយ!»។ លោកអះអាងថា នឹងចាប់អាជីព៣មិនកែប្រែជំហរនោះទេ គឺធ្វើជាកីឡាករអុក បើកបង្រៀន និងធ្វើជាអ្នកគូរប្លង់ដែលលោកខំតស៊ូរៀនកន្លងមក ។ ចំណែកអនាគតភរិយារបស់លោក គឺនឹងពង្រឹងអាជីពបើកហាងកាហ្វេជាធម្មតា ដើម្បីស្វះស្វែងរកប្រាក់រៀងខ្លួនក្រោយពេលរៀបការរួច ។ មង្គលការរបស់លោកនឹងធ្វើឡើងចំនួន៤០តុ នៅមជ្ឈមណ្ឌលម៉ូដែន២ ដោយគ្រោងចំណាយប្រាក់រៀបចំឱ្យបានធំដុំផងដែរ បើទោះជាមិនបានធំដុំដូចមង្គលការរបស់អ្នកមានទ្រព្យស្ដុក ។
គួរបញ្ជាក់ផងដែរថា លោកឈាវ បូរ៉ា អាយុ២៦ឆ្នាំ គឺជាកីឡាករល្បីឈ្មោះផ្នែកអុក បន្ទាប់ពីឈ្នះជើងឯកសេ្ដចអុកចត្រង្គនៅក្នុងព្រឹត្តិការណ៍អង្គរសង្ក្រាន្ត២ឆ្នាំជាប់គ្នាកាលបុណ្យចូលឆ្នាំខ្មែរ ឆ្នាំ២០១៤ និង២០១៥មុននេះ ។ លោកក៏ជាក្មេងដែលមានការតស៊ូគួរឲ្យសរសើរផងដែរ ទម្រាំមានឈ្មោះបោះសំឡេងក្លាយជាបុគ្គលដែលជោគជ័យម្នាក់ទាំងការសិក្សា ទាំងការលេងអុករហូតយកធ្វើជាអាជីព និងជីវិតស្នេហានាពេលចុងក្រោយ។ លោកត្រូវគេដឹងថា បានពឹងអាស្រ័យនៅវត្តនាគវ័នជាមួយឪពុកធំដែលបួសជាសង្ឃនិងជាអ្នកចិញ្ចឹមផ្ចុងផ្ដើមឱ្យរៀនបន្ទាប់ពីជីវភាពគ្រួសាររបស់លោកនៅខេត្តកំពង់ចាមកាលពីអតីតកាលមិនសូវល្អប្រសើរ ។
លោកបានថ្លែងរំលឹកថា៖ «បើកុំតែបានលោកអ៊ំ ប្រហែលជាខ្ញុំមិនបានមករៀននៅភ្នំពេញទេ ហើយក៏មិនបានមកធ្វើជាអ្នកលេងអុកល្បីឈ្មោះអីដែរ អញ្ចឹងហើយទើបខ្ញុំយល់ថាខ្លួនជោគជ័យពេលនេះ គឺដោយសារតែបានបាយវត្ត!» ។ ក្នុងឆ្នាំ២០២៣ខាងមុខ លោកថានឹងត្រៀមខ្លួនចូលប្រកួតនៅក្នុងព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះ ដោយលោករំពឹងថា តម្រូវការបេក្ខជនដើម្បីឲ្យចូលរួមនៅក្នុងព្រឹត្តិការណ៍នេះ នឹងជួយឱ្យលោកទទួលបានសិស្សច្រើនក្នុងការបើកបង្រៀនលេងអុកក្រោយពេលរៀបការនោះផង ៕
ចែករំលែកព័តមាននេះ