រាជធានីភ្នំពេញ ៖ ក្នុងឆ្នាំ២០១៤កន្លងទៅមានភ្ញៀវទេសចរអន្តរជាតិ ប្រមាណជា១០០លាននាក់បានចូលសម្រាកកំសាន្តនៅក្នុងប្រទេសជាសមាជិកអាស៊ាន ក្នុងនោះទាំងទេសចរណ៍នៅក្នុងអាស៊ាន និងទេសចរណ៍មកពីខាងក្រៅសហគមន៍អាស៊ាន។
នេះជាការអះអាងរបស់លោក ទិត្យ ចន្ថា រដ្ឋលេខាធិការក្រសួងទេសចរណ៍ នៅក្រោយកិច្ចប្រជុំក្រុមការងារកាលពីថ្ងៃទី០១ ធ្នូ ២០១៥ នៅសណ្ឋាគាររ៉េស៊ីដង់សុខាភ្នំពេញ។
លោក ទិត ចន្ថា បានថ្លែងថា បើទោះជាចំនួននេះត្រូវបានគេមើលឃើញថា មានការកើនឡើងពីមួយឆ្នាំទៅមួយឆ្នាំក៏ដោយ ក៏អាស៊ានមានមហិច្ឆិតាធ្វើឱ្យទេសចរណ៍ មកកាន់តែច្រើនថែមទៀត ដើម្បីឱ្យអាស៊ានក្លាយជាទេសចរណ៍លំដាប់ពិភពលោក មានភាពកក់ក្តៅទាំងការទស្សនា ទាំងគុណភាព បដិសណ្ឋារកិច្ច សេវា រួមទាំងផលិតផលទាំងអស់ ត្រូវបានលើកកម្ពស់ និងមានលក្ខណៈស្តង់ដា។
លោករដ្ឋលេខាធិការបានបញ្ជាក់ថា ភាពជោគជ័យទាំងនោះ គឺអាស្រ័យដោយអាស៊ាន មានយុទ្ធសាស្ត្រជម្រុញនូវភាពរួបរួមគ្នាអនុវត្តប្រកបដោយភាពទទួលខុសត្រូវ និងធ្វើយ៉ាងណាឱ្យទេសចរណ៍មកកំសាន្ត នៅអាស៊ាននាពេលខាងមុខនេះបានជាង១០០លាននាក់ ឬអាចនិយាយបានថា ឱ្យមានកំណើន ជាង១០ភាគរយពីមួយឆ្នាំទៅមួយឆ្នាំតាមរយៈការដូរវេនគ្នាធ្វើជាប្រធានអាស៊ានដើម្បីឱ្យអាស៊ានមានការរីកចំរើន ពិសេសទាក់ទាញការវិនិយោគលើវិស័យទេសចរណ៍ពីផ្នែកដៃគូអភិវឌ្ឍក៏ដូចជាអង្គការសង្គមស៊ីវិលផ្សេងៗទៀត៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ