ខេត្តកំពង់ចាម ៖ ទោះបីជាច្បាប់ចរាចរណ៍ផ្លូវគោកត្រូវបានរឹតបន្តឹងយ៉ាងណាក្តី ក៏គេសង្កេតឃើញអ្នកបើកបរមួយចំនួននៅតែមិនគោរពច្បាប់ដដែលធ្វើឱ្យគ្រោះថ្នាក់ចរាចរណ៍កើតមានឡើងឥតឈប់ឈរបង្កឱ្យមានមនុស្សស្លាប់និងរបួសយ៉ាងច្រើន។ ជាក់ស្តែងឧប្បត្តិហេតុគ្រោះថ្នាក់ចរាចរណ៍ដែលបានកើតឡើងចំនួន៣ករណីនៅស្រុកអូររាំងឪ ស្រុកកំពង់សៀមនិងក្រុងកំពង់ចាម បានឆក់យកអាយុជីវិតប្រជាពលរដ្ឋអស់ចំនួន៣នាក់និងរងរបួសធ្ងន់ចំនួន៣នាក់ ត្រូវបាននាំមកសង្គ្រោះនៅមន្ទីរពេទ្យបង្អែកខេត្ត និងគ្លីនិកឯកជនផងដែរ។
ចំពោះករណីគ្រោះថ្នាក់ទី១ ត្រូវបានលោកអនុសេនីយ៍ឯកញ៉ែម សុខុម អធិការនគរបាលស្រុកអូររាំងឪបានឱ្យដឹងថា កើតឡើងកាលពីវេលាម៉ោង៧និង១០នាទីយប់ថ្ងៃទី២៣ មីនា ២០១១ នៅត្រង់ចំណុចភូមិលេខ៤ ឃុំអំពិល តាពក ស្រុកអូររាំងឪ រវាងម៉ូតូសេ១២៥ ពណ៌ខ្មៅ ពាក់ស្លាកលេខកំពង់ចាម 1D-7008 និងរថយន្ត ម៉ាក FUSO បណ្តាលឱ្យ២នាក់ប្តីប្រពន្ធស្លាប់ជាបន្តបន្ទាប់ ។
លោកអធិការបានប្រាប់បន្តថា រថយន្តនេះជាកម្មសិទ្ធិរបស់ឈ្មោះងិន ធុក ភេទប្រុស អាយុ៥៨ឆ្នាំ រស់នៅភូមិលេខ១ ឃុំគងជ័យ ស្រុកអូររាំងឪ បានឈប់ចតនៅលើផ្លូវថ្នល់ព្រោះតែខូច។ នៅវេលាម៉ោងខាងលើជនរងគ្រោះ២នាក់ប្តីប្រពន្ធបានជិះម៉ូតូក្នុងទិសដៅពីជើងមកត្បូងក៏បានបុករថយន្តនោះពីក្រោយយ៉ាងពេញទំហឹងតែម្តងបណ្តាលឱ្យបុរសជាប្តីឈ្មោះគីន ឃុនឡាក់ អាយុ២៦ឆ្នាំ រស់នៅភូមិព្រីង ឃុំចក ស្រុកអូររាំងឪស្លាប់ភ្លាមៗនៅនឹងកន្លែង ឯស្រ្តីជាប្រពន្ធឈ្មោះ ទ្រី គឹមលាង អាយុ២៤ឆ្នាំ ដែលអង្គុយពីក្រោយរងរបួសជាទម្ងន់ត្រូវបានសាច់ ញាតិនាំទៅសង្គ្រោះនៅមន្ទីរពេទ្យ ប៉ុន្តែជាអកុសលស្ត្រីនោះក៏បានស្លាប់ដែរ ។
ករណីគ្រោះថ្នាក់ទី២ ត្រូវបានលោកងិន ហេង ប្រធាននគរបាលចរាចរស្រុកកំពង់សៀមប្រាប់ថា កើតឡើងកាលពីវេលាម៉ោង៨និង៣០នាទីយប់ថ្ងៃទី២៣ មីនា ខណៈមានម៉ូតូម៉ាកសេ១២៥ ពណ៌ខ្មៅ១គ្រឿង ពាក់ស្លាកលេខកំពង់ចាម1C-2334 បើកបរដោយឈ្មោះ ជា បញ្ញា ភេទប្រុស អាយុ២០ឆ្នាំ រស់នៅភូមិទី៤ សង្កាត់ វាលវង់ ក្រុងកំពង់ចាម ឌុបឈ្មោះស៊ន ចាន់រិទ្ធ ភេទប្រុស អាយុ២៣ឆ្នាំ រស់នៅភូមិអណ្តូងច្រុះ ឃុំអំពិល ស្រុកកំពង់សៀម ក្នុងទិសដៅពីលិច មកកើត។ ពេលជិះមកដល់ភូមិអំពិលក្រោម ឃុំ អំពិល ស្រុកកំពង់សៀម ស្របពេលមេឃធ្លាក់ ភ្លៀងផងនោះ ស្រាប់តែមានរថយន្តមិនស្គាល់ ម៉ាកបានមកបុកម៉ូតូជនរងគ្រោះពីក្រោយពេញទំហឹង បណ្តាលឱ្យអ្នកជិះខាងក្រោយដួលបោក ក្បាលទៅនឹងថ្នល់ស្លាប់ភ្លាមនៅនឹងកន្លែង ឯអ្នក ឌុបបានរងរបួសធ្ងន់។ ក្រោយពីបង្កហេតុរថយន្ត បានបើករត់គេចបាត់ ។
ចំណែកលោកស៊ាម យូសេង ប្រធាននគរបាលចរាចរនៃអធិការដ្ឋានក្រុងកំពង់ចាមវិញបានប្រាប់ឱ្យដឹងដែរថា នៅលើកំណាត់ផ្លូវជាតិលេខ៧ ស្ថិតនៅភូមិទី៥ សង្កាត់វាលវង់ ក្រុងកំពង់ចាម មានករណីគ្រោះថ្នាក់ចរាចរណ៍មួយបានកើតឡើងនៅវេលាម៉ោង៥និង៥០នាទីល្ងាចថ្ងៃទី២៤ មីនា ។ មុនពេលកើតហេតុមានបុរស-ស្ត្រី២នាក់ជាគូស្នេហ៍បានជិះម៉ូតូម៉ាកស្មាស់រីវ៉ូ១គ្រឿងឌុបគ្នាដោយមិនពាក់មួកសុវត្ថិភាពទាំង២នាក់ ក្នុងទិសដៅពីកើតមកលិចក្នុងល្បឿនលឿន បានទៅបុកកន្ទុយរថយន្តស្ទូច១គ្រឿងមិនស្គាល់ម៉ាកនៅត្រង់ផ្លូវបំបែកជាបួន ពេលរថយន្តនោះបើកចេញពីលិចមកកើតរួចបត់ឡើងមកទិសខាងជើង។ ក្នុងហេតុការណ៍នេះបណ្តាលឱ្យគូស្នេហ៍ទាំង២នាក់រងរបួសធ្ងន់រហូតដល់សន្លប់នៅនឹងកន្លែង រីឯរថយន្តវិញបានបើករត់គេចបាត់ស្រមោល ៕
ចែករំលែកព័តមាននេះ