រាជធានីភ្នំពេញ ៖ នារីវ័យក្មេងម្នាក់បានបង្កឲ្យមានការភ្ញាក់ផ្អើលយ៉ាងខ្លាំង ទៅដល់អ្នកដំណើរតាមដងផ្លូវ និងកម្លាំងនគរបាលចរាចរណ៍ប្រចាំការនៅគោលដៅក្បែរស្ពានអាកាសក្បាលថ្នល់ទៅជួយចាប់ឃាត់ មិនឱ្យលោតចូលទៅក្នុងទឹក ខណៈដែលរូបនាងឡើងទៅលើបង្កាន់ដៃស្ពានព្រះមុនីវង្សចាស់ ប៉ងលោតទឹកធ្វើអត្តឃាត ។ នារីម្នាក់នេះ កាលពី១ខែមុន បានបង្កការភ្ញាក់ផ្អើលម្ដងរួចទៅហើយ ដោយប៉ងលោតទឹកសម្លាប់ខ្លួនពីលើស្ពានជ្រោយចង្វា និងត្រូវបានគេចាប់ឃាត់ទាន់ ហើយប៉ុន្មានថ្ងៃមុននេះនៅក្នុងខណ្ឌដង្កោម្ដងដែរ ត្រូវបានគេនាំគ្នារៃអង្គាសបានលុយមួយចំនួន ឲ្យនាងក៏បន្តដំណើរចេញទៅបាត់ទៀតទៅ ។
ករណីនេះបានបង្កការភ្ញាក់ផ្អើលកើតឡើង កាលពីវេលាម៉ោង៣និង៤៥នាទីរសៀលថ្ងៃទី២៤ ខែមិថុនា ឆ្នាំ២០២១ នៅចំណុចស្ពានព្រះមុនីវង្សចាស់ ក្នុងសង្កាត់ទន្លេបាសាក់ ខណ្ឌចំការមន ។ មន្ត្រីនគរបាលចរាចរណ៍ ប្រចាំការនៅក្បែរស្ពានអាកាសក្បាលថ្នល់បានប្រាប់ឲ្យដឹងថា មុនពេលកើតហេតុ គេបានឃើញនារីវ័យក្មេងម្នាក់នេះមានទឹកមុខស្រងូតស្រងាត់ បានដើរទៅលើស្ពានព្រះមុនីវង្សចាស់ ដោយក្នុងដៃមានកាន់ថង់ខោអាវមួយថង់ផងដែរ ។ លុះទៅដល់ជិតពាក់កណ្ដាលស្ពាន ក៏បានឡើងលើបង្កាន់ដៃស្ពានឈរប្រឹងប៉ងលោតចូលក្នុងទឹកទន្លេ ។
តាមប្រភពដដែលបានប្រាប់បន្តទៀតថា ពេលឃើញបែបនេះក៏បង្កការភ្ញាក់ផ្អើលទៅដល់អ្នកធ្វើដំណើរតាមផ្លូវចោមរោមមើល និងរាយការណ៍មកដល់ពួកគាត់ ដែលជាកម្លាំងមានសមត្ថកិច្ចប្រចាំការនៅគោលដៅខាងលើ ឲ្យទៅជួយឃាត់នាំមករក្សាទុក១កន្លែង ហើយបានរាយការណ៍ទៅកាន់កម្លាំងមានសមត្ថកិច្ចមូលដ្ឋានឱ្យបានដឹងពីរឿងនេះផងដែរ ។ ក្រោយពេលមានការភ្ញាក់ផ្អើលកើតឡើង ទើបត្រូវបានគេស្គាល់ថា រូបនាងកាលពីមួយខែមុនធ្លាប់បង្កការភ្ញាក់ផ្អើលម្ដងដែរ ដោយប៉ងលោតទឹកសម្លាប់ខ្លួនពីលើស្ពានជ្រោយចង្វា ហើយត្រូវបានគេឃាត់ទាន់ និងមានការរៃអង្គាសលុយគ្នាបានមួយចំនួនឱ្យនាងក៏ចេញបាត់ទៅម្ដងរួចមកហើយ ។
មិនតែប៉ុណ្ណោះនៅប៉ុន្មានថ្ងៃមុននេះ រូបនាងក៏បង្កការភ្ញាកផ្អើលនៅឯខណ្ឌដង្កោម្ដងដែរ និងត្រូវបានគេរៃអង្គាសបានប្រាក់មួយចំនួនឲ្យទៅនាងជាការជួយលួងចិត្តក៏បន្តដំណើរចេញបាត់ទៅដែរ ព្រោះអ្នកមិនដឹងក៏មានការអាណិត ។ លុះមកដល់ពេលនេះក៏ស្រាប់តែលេចមុខនាងចេញមក បង្កការភ្ញាក់ផ្អើលសាជាថ្មីម្ដងទៀត នៅលើស្ពានព្រះមុនីវង្សចាស់នេះម្តងទៀតដូចលើកមុនដដែល ហាក់ដូចជាយកមុខរបរនេះលេងសើចពេកហើយ ៕
ចែករំលែកព័តមាននេះ