រាជធានីភ្នំពេញ ៖ ប្រេងរំអិលចំនួន២៩៦ធុងសាំងត្រូវបានក្រុមសមត្ថកិច្ចគយចុះត្រួតពិនិត្យនៅកន្លែងស្តុកដ៏ធំមួយនៅផ្ទះលេខ២៦៥ ផ្លូវ១៨៣ សង្កាត់ទំនប់ទឹក ខណ្ឌចំការមន នាព្រឹកថ្ងៃទី២៨ មីនា ឆ្នាំ២០១១ដើម្បីត្រួតពិនិត្យពីបញ្ហាមិនបង់ពន្ធនាំចូលជូនរដ្ឋ ។ កិច្ចប្រតិបត្តិការនេះក៏មានការចូលរួមពីតំណាងអយ្យការអមសាលាដំបូងរាជធានីភ្នំពេញ ផងដែរ ។
តាមប្រភពព័ត៌មានមួយបានបង្ហើបឱ្យដឹងថា ប្រេងរំអិលខាងលើនេះ នាំចូលមកស្រុកខ្មែរពីប្រទេសវៀតណាម ដោយពុំបានបង់ពន្ធជូនរដ្ឋឡើយ។ ប្រភពដដែលបានបន្តថា មូលហេតុដែលប្រេងរំអិលទាំង២៩៦ធុងចូលក្នុងរាជធានីភ្នំពេញ បានគឺតាមរយៈការដឹកជញ្ជូនដោយរថយន្តដែលមានស្លាកលេខកងយោធពលខេមរភូមិន្ទ ។ ប្រភពមួយទៀតបាននិយាយថា ឈ្មួញនាំចូលបានបន្លំភ្នែកភ្នាក់ងារគយនៅច្រកព្រំដែន។
តាមប្រភពពីមន្ត្រីគយដែលចុះប្រតិបត្តិការត្រួតពិនិត្យឃ្លាំងស្តុកប្រេងខាងលើនេះបានឱ្យដឹងថា សមត្ថកិច្ចគ្រាន់តែមានការសង្ស័យទៅលើប្រភេទប្រេងរំអិលខ្លះពុំបានបង់ពន្ធជូនរដ្ឋតែប៉ុណ្ណោះ គឺពុំទាន់កំណត់ថា ប្រេងរំអិលទាំងអស់នោះសុទ្ធតែពុំបានបង់ពន្ធជូនរដ្ឋឡើយ ។ មន្ត្រីដដែលបន្តថា បញ្ហាដែលប្រេងរំអិលខ្លះមានបង់ពន្ធជូនរដ្ឋ ហើយខ្លះទៀតគ្មានពន្ធនោះ គឺអាស្រ័យទៅលើការផ្ទៀងផ្ទាត់គ្នាពេលក្រោយតែប៉ុណ្ណោះ។ ប៉ុន្តែបើតាមការពិនិត្យជាក់ស្តែងវិញនោះ គេពុំបានឃើញប្រេងរំអិលទាំង២៩៦ធុងសាំងនោះមានបិទតែមបង់ពន្ធនាំចូលឡើយ។ ប្រភពក្រៅផ្លូវការមួយបង្ហើបឱ្យដឹងថា ប្រេងរំអិលទាំងអស់ខាងលើ គឺគ្មានបង់ពន្ធជូនរដ្ឋទាំងអស់តែម្តង។ ពុំមានប្រភពព័ត៌មានណាមួយបញ្ជាក់ថា ម្ចាស់ទីតាំងខាងលើនេះជានរណាឡើយ ៕
ចែករំលែកព័តមាននេះ