រាជធានីភ្នំពេញ៖ ក្រោយបញ្ចប់វេទិកាសន្និសីទកាសែតកាលពីថ្ងៃ៥វិច្ឆិកាកន្លងទៅ អ្នករៀបចំព្រឹត្តិការណ៍ប្រដាល់ដាក់ទ្រុងរបស់One FC កាន់តែពង្រីកសម្មភាពផ្សព្វផ្សាយពីព្រឹត្តិការណ៍នេះទ្វេដង ដើម្បីឲ្យការរៀបចំលើកទី២
រាជធានីភ្នំពេញ៖ ក្រោយបញ្ចប់វេទិកាសន្និសីទកាសែតកាលពីថ្ងៃ៥វិច្ឆិកាកន្លងទៅ អ្នករៀបចំព្រឹត្តិការណ៍ប្រដាល់ដាក់ទ្រុងរបស់One FC កាន់តែពង្រីកសម្មភាពផ្សព្វផ្សាយពីព្រឹត្តិការណ៍នេះទ្វេដង ដើម្បីឲ្យការរៀបចំលើកទី២ នៅថ្ងៃទី៥ ខែធ្នូខាងមុខ ទទួលបានជោគជ័យពេញទំហឹង ទាំងកីឡាករកម្ពុជា និងព្រឹត្តិការណ៍ទាំងមូល។ មន្ត្រីគម្រោងបានអះអាងថា ចាប់ពីដើមខែនេះតទៅ ព្រឹត្តិការណ៍MMA នឹងធ្វើសកម្មភាពជាប់ដៃរហូត គឺរហូតដល់ថ្ងៃប្រកួតទើបបញ្ចប់សកម្មភាព ដើម្បីឱ្យមានការចាប់អារម្មណ៍លើសពីការរៀបចំលើកទី១ ដោយមិនមែនគ្រាន់តែធ្វើសន្និសីទកាសែតមួយលើក ហើយក៏ប្រកួតនោះទេ ។
លោក Victor Cui នាយកប្រតិបត្តិរបស់ One Championship បានថ្លែងប្រាប់ថា ប្រទេសកម្ពុជាគឺជាទីផ្សារមួយដែលមានការគាំទ្រកីឡាប្រដាល់ចម្រុះដាក់ទ្រុង មិនចាញ់បណ្ដាប្រទេសដែលមានកីឡាប្រភេទនេះរីកចម្រើននោះទេ ។ ជាក់ស្ដែង ការរៀបចំព្រឹត្តិការណ៍ MMA កាលពីថ្ងៃទី៩ កញ្ញា ឆ្នាំ២០១៤ ដែល One FC បានយកប្រទេសកម្ពុជាធ្វើជាម្ចាស់ផ្ទះជាលើកទី១ ហើយទទួលបានជោគជ័យ គឺជាហេតុផលដែលជំរុញឱ្យក្រុមការងារសម្រេចមកធ្វើនៅក្នុងប្រទេសកម្ពុជាជាលើកទី២ទៀតនៅថ្ងៃទី៥ ខែធ្នូ នាប៉ុន្មានថ្ងៃទៀតនេះ ។ កីឡាករកីឡាការិនីកម្ពុជាចំនួន៨រូប នឹងត្រូវបង្ហាញខ្លួនក្នុងព្រឹត្តិការណ៍នេះ ។
ក្នុងនោះរួមមាន កីឡាករចាន់ រតនា កីឡាករចាន់ រាជ កីឡាករសំអាង ឌុន កីឡាការិនីសំ ថារ័ត្ន កីឡាការិនីវី ស្រីឆាយ កីឡាការិនីអេ យ៉ានុត កីឡាករចាន់ ហេង និងកីឡាករមាស ម៉ើ ជាដើម។ ក្រៅពីវត្តមានរបស់កីឡាករ-កីឡាការិនីកម្ពុជា ជើងខ្លាំងមកពីបរទេសដែល One FC សម្រិតសម្រាំងឡើង ក៏នឹងបង្ហាញថ្វីដៃនៅក្នុងព្រឹតិ្តការណ៍នោះផងដែរ។
ជាក់ស្ដែងកីឡាករជនជាតិឥណ្ឌា JeetToshi កីឡាកររុស្ស៊ី RasulYakhyaevកីឡាករថៃ AnatpongBunrad និងកីឡាករជប៉ុន Riku Shibuya គឺសុទ្ធតែជាជើងខ្លាំងរបស់ MMA ដែលមានឈ្មោះបោះសំឡេងនៅក្នុងវិស័យនេះ ជាយូរមកហើយ។ លោកមានគម្រោងរៀបចំព្រឹត្តិការណ៍ដែលមានទ្រង់ទ្រាយអន្តរជាតិនេះឱ្យបានមួយឆ្នាំម្ដងនៅក្នុងប្រទេសកម្ពុជា ។ លោកថា វត្តមានរបស់MMA នៅកម្ពុជានឹងជួយឱ្យប្រទេសកម្ពុជាកាន់តែមានចំណាប់អារម្មណ៍ទ្វេដងពីក្រុមអ្នកចូលចិត្តកីឡាទាំងអ្នកទស្សនា និងអ្នកភ្នាល់កីឡា ។ លោកមិនដឹងពីទំហំជោគជ័យនឹងមានកម្រិតណានោះទេ សម្រាប់ការរៀបចំជាលើកទី២នេះ។
យ៉ាងណាក៏ដោយ បើទោះជាមានលទ្ធផលបែបណា ក៏លោកនៅតែប្រកាន់ជំហររៀបចំការប្រកួតនេះឲ្យបានមួយឆ្នាំម្ដងយ៉ាងតិចនៅក្នុងប្រទេសកម្ពុជានោះដែរ ដើម្បីពង្រីកទីផ្សារMMA របស់One FC។ ម្យ៉ាងកម្ពុជាក៏ជាទីផ្សារចាប់អារម្មណ៍ថ្មីសន្លាងសម្រាប់ការប្រដាល់ដាក់ទ្រុង ដោយសារតែកីឡាករកីឡាការិនីក៏មានធនធានច្រើន ហើយជនជាតិខ្មែរក៏មានក្បាច់គុនជាប្រវត្តិសាស្ត្ររបស់ខ្លួនស្រាប់ ដែលមិនពិបាកក្នុងការពង្រីកខ្លួននៅក្នុងវិស័យនេះ។
លោកមានប្រសាន៍ថា ៖«ប្រសិនបើការរៀបចំលើកទី២របស់យើងទទួលជោគជ័យ នោះ One FCអាចធ្វើដល់២-៣លើកឯណោះ គឺមិនមែនត្រឹមតែធ្វើត្រឹម១ឆ្នាំម្ដង ដូចអ្វីដែលយើងកំពុងគ្រោងនេះទេ!» ។ លោកអះអាងថា ការរៀបចំសម្រាប់លើកទី២នេះ ធ្វើឲ្យលោកមានជំនឿចិត្តភាគច្រើនពីទំហំជោគជ័យ។ ក្នុងនោះសូម្បីកីឡាករកម្ពុជាមួយចំនួន ក៏ត្រូវបញ្ជូនឲ្យទៅហ្វឹកហាត់ប្រដាល់ដាក់ទ្រុងនៅក្នុងប្រទេសថៃ ដើម្បីឲ្យការប្រកួតនៅពេលខាងមុខ មិនមានចំណុចអវិជ្ជមានកើតឡើងនោះផងដែរ។ ក្ដីសង្ឃឹមនោះ គឺដោយសារតែមុនការប្រកួតចាប់ផ្ដើម គណៈកម្មការរៀបចំបានធ្វើសកម្មភាពពង្រីកការផ្សព្វផ្សាយពីការប្រដាល់ដាក់ទ្រុងយ៉ាងខ្លាំងក្លា ដើម្បីឲ្យមានការចាប់អារម្មណ៍ជាងមុន។ លោកថា ចាប់ពីថ្ងៃទី២ ធ្នូនេះ រហូតដល់ថ្ងៃប្រកួត សកម្មភាពផ្សព្វផ្សាយដោយផ្ទាល់នឹងធ្វើយ៉ាងពេញទំហឹង ដូចជានៅថ្ងៃនេះ មានការជួបជុំបង្ហាញសមាសភាពកីឡាករ និងពន្យល់ពីគោលបំណងក្នុងការរៀបចំនៅក្នុងបន្ទប់តាំងពិព័រណ៍របស់ម៉ូតូ Pulsar ។ នៅថ្ងៃទី៣ ធ្នូស្អែក នឹងមានការផ្សព្វផ្សាយអមដោយការជប់លៀងតាមទូករបស់One FC និងនៅថ្ងៃទី៤ ធ្នូខាងមុខ នឹងមានការជួបជុំធំមួយទៀតរវាងកីឡាករ អ្នករៀបចំ និងអ្នកគាំទ្រ នៅថ្ងៃថ្លឹងទម្ងន់ មុននឹងដល់វិនាទីត្រូវប្រកួត។ លោកថា ចំណាយចាត់ចែងទាំងនេះ គឺប្រើកញ្ចប់ថវិកាអស់ច្រើន ប៉ុន្តែវាបានចំណេញមកវិញនូវការចាប់អារម្មណ៍ និងជួយឱ្យវិស័យប្រដាល់ដាក់ទ្រុងនៅក្នុងប្រទេសកម្ពុជាមានជំហានទៅមុខបានរហ័ស។
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានអះអាងថា វត្តមានរបស់MMA នៅកម្ពុជាគឺជួយឲ្យកម្ពុជាទទួលបានផលចំណេញច្រើន ជាពិសេសគឺជួយឲ្យកីឡាករកីឡាការិនីបានឡើងប្រកួតនៅលើសង្វៀនអន្តរជាតិ និងជួយឲ្យបណ្ដាប្រទេសកាន់តែច្រើនស្គាល់ពីសមត្ថភាពរបស់កីឡាករកម្ពុជា។ ជាក់ស្ដែងក្នុងពេលកីឡាករប្រដាល់ និងកីឡាករជំនាញកាន់តែច្រើនបង្កើនការហ្វឹកហាត់ផ្នែកប្រដាល់ដាក់ទ្រុងបានធ្វើឱ្យកីឡាថ្មីមួយនេះ មានកម្រិតកើនឡើងនៅកម្ពុជា។
យ៉ាងណាក៏ដោយលោកថា កីឡាប្រដាល់ដាក់ទ្រុង គឺជាកីឡាដែលអ្នករៀបចំធ្វើដើម្បីជំនួញ ទើបវិញ្ញាសានេះបើទោះជាមានការរីកចម្រើនខ្លាំងក្លា ក៏មិនអាចក្លាយជាវិញ្ញាសាមួយសម្រាប់ការប្រកួតកម្រិតជាតិ ឬធ្វើជាវិញ្ញាសារបស់ស៊ីហ្គេមនៅពេលកម្ពុជាធ្វើជាម្ចាស់ផ្ទះក្នុងឆ្នាំ២០២៣នោះឡើយ។ លោកនិយាយថា ការប្រដាល់MMA ជាកីឡាដែលមានការពេញនិយមនៅតំបន់អាស៊ាន និងប្រទេសមួយចំនួន ។ សម្រាប់កម្ពុជាបើទោះជាសមាជិកដែលទើបចាប់អារម្មណ៍ ប៉ុន្តែសម្រាប់ធនធានអ្នកប្រកួត គឺកម្ពុជាមានគ្រប់គ្រាន់មិនចាញ់ប្រទេសដែលមានកីឡានេះជាយូរមកហើយនោះទេ ៕
ចែករំលែកព័តមាននេះ