ពលករ នៅបន្តលួចឆ្លងដែន ខណៈប្រទេសថៃ កំពុងឆ្លងកូវីដខ្លាំង
- បន្ទាយមានជ័យ
បន្ទាយមានជ័យ៖ មេខ្យល់ និងអ្នកមើលផ្លូវ ជាជនថៃចំនួន ៣នាក់ រួមទាំងពលករខ្មែរ ២១នាក់ ត្រូវបានសមត្ថកិច្ចចម្រុះថៃ ឃាត់ខ្លួន ក្នុងចំការដំឡូងមីមួយកន្លែង…
បន្ទាយមានជ័យ៖ មេខ្យល់ និងអ្នកមើលផ្លូវ ជាជនថៃចំនួន ៣នាក់ រួមទាំងពលករខ្មែរ ២១នាក់ ត្រូវបានសមត្ថកិច្ចចម្រុះថៃ ឃាត់ខ្លួន ក្នុងចំការដំឡូងមីមួយកន្លែង នៅភូមិផឹតប្លយ ឃុំ និងស្រុកតាប្រាយ៉ា ខេត្តស្រះកែវជិតព្រំដែនកម្ពុជា ក្នុងស្រុកថ្មពួក កាលពីវេលាម៉ោងជិត ៥ទាបភ្លឺព្រឹកថ្ងៃទី២៥ ខែមិថុនា ឆ្នាំ២០២១។
ពលករខ្មែរ ទាំង ២១នាក់ មិនត្រូវបានគេស្គាល់អត្តសញ្ញាណនោះទេ គឺមានប្រុស ១២នាក់ និងស្រី ៩នាក់។ នេះបើយោងតាមការចុះផ្សាយរបស់គេហទំព័រ និងកាសែតក្នុងស្រុកថៃ។
ប្រភពថា ពលករទាំង ២១នាក់ខាងលើ ត្រូវបានសមត្ថកិច្ចចម្រុះថៃ ឃាត់ខ្លួនក្នុងចំការដំឡូងមីមួយកន្លែង ខណៈពួកគេ ទើបចេញពីកម្ពុជា គ្រោងទៅរកការងារធ្វើលើទឹកដីថៃ។
ពលករទាំងនេះ រួមទាំងអ្នកពាក់ព័ន្ធ ជាជនជាតិថៃ ៣នាក់ ក្រោយឃាត់ខ្លួន ត្រូវបានបញ្ជូនទៅបន្ទាយតម្រួតជាយដែន ក្នុងស្រុកកើតហេតុ ដើម្បីពិនិត្យសុខភាព តាមវិធានការរបស់ក្រសួងសុខាភិបាលថៃ។
ពលករទាំង ២១នាក់ នឹងត្រូវបញ្ជូនត្រឡប់ឲ្យកម្ពុជាវិញ តាមច្រករបៀងកិច្ចព្រមព្រៀង រវាងខេត្តបន្ទាយមានជ័យ និងខេត្តស្រះកែវ គឺច្រករបៀងអូរបីជាន់ ខណៈមេខ្យល់ និងអ្នកមើលផ្លូវ ៣នាក់ ជាជនជាតិថៃ កំពុងត្រូវបានសមត្ថកិច្ចជំនាញថៃ ចាត់ការបន្តតាមនីតិវិធីច្បាប់៕ មុត សារុន
ចែករំលែកព័តមាននេះ