រាជធានីភ្នំពេញ ៖ សហព័ន្ធកីឡារាំកម្ពុជា កាលពីថ្ងៃអាទិត្យ ទី២៩ វិច្ឆិកា កន្លងមកនេះ បានរៀបចំការប្រកួតជ្រើសរើសជើងឯកពានរង្វាន់Revive កីឡារាំជាលើកទី១នៅសាលដំបូលទូកក្នុងពហុកីឡដ្ឋានជាតិ ។
រាជធានីភ្នំពេញ ៖ សហព័ន្ធកីឡារាំកម្ពុជា កាលពីថ្ងៃអាទិត្យ ទី២៩ វិច្ឆិកា កន្លងមកនេះ បានរៀបចំការប្រកួតជ្រើសរើសជើងឯកពានរង្វាន់Revive កីឡារាំជាលើកទី១នៅសាលដំបូលទូកក្នុងពហុកីឡដ្ឋានជាតិ ។ ការប្រកួតនេះធ្វើឡើងដើម្បីសម្រិតសម្រាំងរកអ្នកដែលមានសមត្ថភាពពិតប្រាកដទៅចូលរួមប្រកួតនៅក្នុងព្រឹត្តិការណ៍អន្តរជាតិ ។
លោកស្រីញ៉ែម មរកត ប្រធានសហព័ន្ធកីឡារាំកម្ពុជា បានឱ្យដឹងថា ការប្រកួតកីឡារាំនេះធ្វើឡើងគឺដើម្បីអភិវឌ្ឍ ផ្សព្វផ្សាយកីឡារាំកម្ពុជាឱ្យមានការរីកចម្រើនដូចបណ្ដាប្រទេសដទៃទៀតដែរ ។ មិនតែប៉ុណ្ណោះក៏ដើម្បីបង្កឱកាសឱ្យយុវជនបង្ហាញនូវជំនាញពិតប្រាកដរបស់ខ្លួន ។ លោកស្រីបានបន្តឱ្យដឹងទៀតថា ពួកគេទាំងអស់ដែលមកចូលរួមប្រកួតក្នុងពេលនេះមិនត្រឹមតែទទួលបានការលើកទឹកចិត្តប៉ុណ្ណោះនោះទេ ផ្ទុយទៅវិញថែមទាំងទទួលបាននូវការបណ្ដុះបណ្ដាលបន្ថែមឱ្យក្លាយទៅជាកីឡាករជម្រើសជាតិនៅក្នុងសហព័ន្ធកីឡារាំ និងមានឱកាសទៅចូលរួមប្រកួតនៅលើឆាកអន្តរជាតិទៀតផង ។ ទោះបីជាកីឡារាំគេទទួលស្គាល់តែក្បាច់រាំរបៀបអន្តរជាតិមែន ប៉ុន្តែការប្រកួតលើកនេះសហព័ន្ធបានបើកទូលាយឱ្យមានការប្រកួតទាំងក្បាច់រាំបរទេសនិងក្បាច់រាំរបស់ខ្មែរយើងផងដែរ ដើម្បីឱ្យមានការចាប់អារម្មណ៍ពីក្នុងចំណោមយុវជនដែលចូលចិត្តរាំ ។ ជាក់ស្ដែង ការប្រកួតនេះទោះបីទើបតែប្រព្រឹត្តទៅជាលើកទី១មែន ក៏ប៉ុន្តែទទួលបានការចាប់អារម្មណ៍យ៉ាងខ្លាំងនិងមានអ្នកមកចូលរួមប្រកួតយ៉ាងច្រើនកុះករ ។
គួររំលឹកផងដែរថា សហព័ន្ធកីឡារាំកម្ពុជាត្រូវបានទទួលស្គាល់ដោយគណៈកម្មាធិការជាតិអូឡាំពិកកម្ពុជា នៅថ្ងៃទី១៨ តុលា ឆ្នាំ២០១៣ និងទទួលស្គាល់ដោយក្រសួងអប់រំយុវជន និងកីឡា នៅថ្ងៃទី១២ មិថុនា ឆ្នាំ២០១៤ ។ គោលបំណងសំខាន់ដែលសហព័ន្ធកីឡារាំរៀបចំឱ្យមានការប្រកួតរាំនេះឡើង គឺដើម្បីរកអ្នកដែលមានជំនាញពិតប្រាកដទៅចូលរួមប្រកួតនៅលើឆាកអន្តរជាតិ និងត្រៀមប្រកួតកីឡាស៊ីហ្គេមឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ ។
ការប្រកួតរាំនេះបានបែងចែកជា៣វិញ្ញាសា គឺការប្រកួតរាំក្បាច់អន្តរជាតិ ដែលមានទាំងអស់១៦គូ ការប្រកួតរាំលើកទឹកចិត្ត មាន៣ក្រុម និងការប្រកួតរាំក្បាច់ Hip Hop មាន៨ក្រុម ។ ជាលទ្ធផលវិញ្ញាសាប្រកួតរាំក្បាច់អន្តរជាតិជាគូ លេខ១បានទៅលើឈ្មោះវីញ ប្រ៉ុនេម៉ា និងទូច សុធារ័ត្ន មកពីក្លិបរាំអន្តរជាតិ លេខ២បានទៅលើឈ្មោះ សាន រ៉ូស្សា និងសេង សុគីម មកពីសហព័ន្ធកីឡារាំ និងលេខ៣បានទៅលើឈ្មោះ ងួន ស្រីហយ និងឡាយ ពៅ មកពីក្លិបរាំ PSE។
វិញ្ញាសាប្រកួតរាំលើកទឹកចិត្ត លេខ១បានទៅលើក្រុម Smart GB មកពីសហព័ន្ធកីឡារាំ លេខ២បានទៅលើក្រុម PSE 2 និងលេខ៣បានទៅលើក្រុម PSE1 ។ ចំណែកវិញ្ញាសាប្រកួតរាំក្បាច់ Hip Hop វិញ លេខ១បានទៅលើក្រុម Cambo លេខ២បានទៅលើក្រុម SATAN និងលេខ៣បានទៅលើក្រុម CA Crew ៕
ចែករំលែកព័តមាននេះ