*នៅអាណាចក្រខណ្ឌមានជ័យ រាជធានីភ្នំពេញ មានរឿងធំ២កន្លែង ដែលអាជ្ញាធរខណ្ឌបិទភ្នែកមិនដោះស្រាយឱ្យអ្នកភូមិ បានសុខស្រួលទេ ដែលសង្ស័យថា មានអ្វីនៅក្រោមតុសម្រាប់រំខាន ហើយមើលទៅ ។
*រឿងធំទី១ គឺទីតាំងកុងស៊ីកាប់ជូក នៅភូមិដំណាក់២ ស្ទឹងមានជ័យ ចោលក្លិនស្អុយសាយភាយរាប់ខែរាប់ឆ្នាំមកហើយ ។ បើមិនជឿ អញ្ជើញទៅជួយស្រង់ក្លិនផង ច្បាស់ជានៅមិនសុខ ដូចអ្នកនៅតំបន់នោះមិនខាន ។
*អ្នកស្រុកនិយាយថា ប្តឹងច្រើនដងហើយ ដូចប្តឹងឱ្យរដ្ឋអំណាចបានទទួលលាភ ។ ព្រោះមិនឃើញមានចំណាត់ការទេ នៅតែដដែល ។
*ឯរឿងធំទី២ គឺបណ្តោយឱ្យឧកញ៉ា ទី ពិសិដ្ឋ ចាក់ដីលុបយកប្រឡាយបឹងក្រពើ ។ គេចាក់ដីទាំងយប់ទាំងថ្ងៃ រាប់ខែ អត់រារាំងទេ សំងំធ្វើមិនដឹង មិនឮ ។
*ពួកគេនិយាយថា ពីមុនមក បើអ្នកស្រុកចាក់ដីលុបបន្តិចបន្តួច គេមកហាម មកគំរាមឱ្យឈប់ ។ ចំណែកសេដ្ឋី មកចាក់ដីលុប បែរជាស្ងៀមឈឹង ។
*អាជ្ញាធរខណ្ឌស្ទឹងមានជ័យ គួរយកចិត្តទុកដាក់ជាមួយប្រជាពលរដ្ឋមូលដ្ឋានដំណាក់ធំខ្លះផង ។ ប្រយ័ត្នដល់ពេលបោះឆ្នោត គេមិនបោះឱ្យនាំយ៉ាប់ទាំងអស់គ្នា ដោយសារតែរឿងបុគ្គល និងបុគ្គលលោភលន់ ។
ចែករំលែកព័តមាននេះ