បុរស៦នាក់លក់ប័ណ្ណចាក់វ៉ាក់សាំងក្លែងក្លាយ ត្រូវឃាត់ខ្លួន
- ព្រះសីហនុ
ខេត្តព្រះសីហនុ ៖ កម្លាំងអធិការដ្ឋាននគរបាលក្រុងព្រះសីហនុ ក្រោមបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការ
ខេត្តព្រះសីហនុ ៖ កម្លាំងអធិការដ្ឋាននគរបាលក្រុងព្រះសីហនុ ក្រោមបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ក្នុងនាមគណៈបញ្ជាការឯកភាពរដ្ឋបាលខេត្តព្រះសីហនុ នៅព្រឹកថ្ងៃ២៥ មិថុនា ឆ្នាំ២០២១ បានឃាត់ខ្លួនជនសង្ស័យចំនួន៦នាក់ ពាក់ពន្ធ័នឹងការលក់បណ្ណ័ស្នើសុំចាក់វ៉ាក់សាំងកូវីដ១៩ ក្លែងក្លាយ (បណ្ណ័ថតចម្លង) នាំយកមកសាកសួរ និងចាត់ការបន្តតាមនិតិវិធីផ្លូវច្បាប់។
បុរសជាជនសង្ស័យដែលត្រូវឃាត់ខ្លួនទាំង៦នាក់ខាងលើនេះ មិនស្គាល់អត្តសញ្ញាណនោះទេ ។
បើតាមចម្លើយសារភាពរបស់ជនសង្ស័យដែលជាអ្នកលក់បណ្ណ័ចាក់វ៉ាក់សាំងថតចម្លងក្លែងក្លាយនេះ បានប្រាប់សមត្ថកិច្ចថា បណ្ណ័មួយច្បាប់លក់បានតម្លៃ២ម៉ឺនរៀល ។
បច្ចុប្បន្នជនសង្សយ័ទាំង៦នាក់ពាក់ពន្ធ័ការលក់បណ្ណ័ចាក់វ៉ាក់សាំងក្លែងក្លាយខាងលើនេះ កម្លាំងជំនាញអធិការដ្ឋាននគរបាលក្រុងព្រះសីហនុមិនទាន់បង្ហាញអត្តសញ្ញាណនៅឡើយ និងកំពុងសាកសួរតាមនិតិវិធី ។
លោកឃាង ភារម្យ អ្នកនាំពាក្យរដ្ឋបាលខេត្តព្រះសីហនុថ្លែងថា សកម្មភាពជនសង្សយ័ដែលសមត្ថកិច្ចបានឃាត់ខ្លួនខាងលើនេះជាអំពើខុសច្បាប់ផ្ទុយទៅនឹងគោលនយោបាយរបស់រាជរដ្ឋាភិបាលដែលផ្តល់ប័ណ្ណចាក់វ៉ាក់សាំងជូនប្រជាពលរដ្ឋដោយមិនគិតប្រាក់ ក្នុងនោះថ្នាក់ដឹកនាំរដ្ឋបាលខេត្ត ដែលមានលោកគួច ចំរើន អភិបាលខេត្ត បានប្រកាសថា នឹងមិនលើកលែងឡើយចំពោះបុគ្គលដែលពាក់ពន្ធ័នឹងករណីខាងលើនេះ ។
លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍បញ្ជាក់បន្ថែមថា អ្នកមានសិទ្ធិចែកបណ្ណ័ចាក់វ៉ាក់សាំងនេះជូនប្រជាពលរដ្ឋតាមលំនៅដ្ឋាន ដើម្បីមកទទួលការចាក់វ៉ាក់សាំង គឺមានតែមន្ត្រីមូលដ្ឋាន ក្រុម ភូមិ តាមឃុំសង្កាត់និមួយៗ ដោយមិនតម្រូវឱ្យប្រជាពលរដ្ឋណាម្នាក់បង់ប្រាក់ឡើយ ហើយក្នុងករណីមានការតម្រូវឲ្យបង់ប្រាក់ពីបុគ្គលណាមួយ សូមបងប្អូនប្រជាពលរដ្ឋរាយការណ៍មកអាជ្ញាធរឃុំ សង្កាត់ ក្រុង ស្រុកដើម្បីចាត់ការបន្តតាមច្បាប់ ។ លោកបានបន្តថា សូមបងប្អូនប្រជាពលរដ្ឋគ្រប់រូប កុំព្រួយបារម្ភ វ៉ាក់សាំងមានគ្រប់គ្រាន់សម្រាប់ចាក់ជូនប្រជាពលរដ្ឋគ្រប់ៗគ្នា ៕
ចែករំលែកព័តមាននេះ