រាជធានីភ្នំពេញ ៖ ក្រោយក្លាយជាម្ចាស់ពានជើងឯកក្នុងប្រភេទទម្ងន់៦០គីឡូក្រាមកាលពីយប់ថ្ងៃទី២៩ វិច្ឆិកា ឆ្នាំ២០១៥ មន្ត្រីទទួលបន្ទុកព្រឹតិ្តការណ៍ប្រដាល់ប្រចាំនៅប៉ុស្ដិ៍លេខ៥ បានអះអាងថា កីឡាករផៃ គឹមហឿត នឹងក្លាយជាកីឡាករជួរមុខល្បីម្នាក់ថ្មីក្នុងពេលដ៏ខ្លី បន្ទាប់ពីគេបានផ្ដួលគូប្រកួតហើយឈ្នះតំណែងជាម្ចាស់ពាននេះ ។ កីឡាករដែលទើបទទួលបានការចាប់អារម្មណ៍ខ្លាំងរូបនេះនឹងក្លាយជាធនធានថ្មីសម្រាប់ព្រឹត្តិការណ៍ស៊ីហ្គេមឆ្នាំ២០២៣ នៅពេលកម្ពុជាធ្វើជាម្ចាស់ផ្ទះ ហើយដាក់បញ្ចូលវិញ្ញាសាប្រដាល់ក្បាច់គុនខ្មែរធ្វើជាវិញ្ញាសានោះផង ដោយផ្អែកតាមភាពលេចធ្លោដែលទើបនឹងកើតឡើង ។
លោកសេង កដិកា អ្នករៀបចំការប្រកួតប្រចាំនៅស្ថានីយទូរទស្សន៍ប៉ុស្ដិ៍លេខ៥ បានអះអាងថា ក្រោយជ័យជម្នះរបស់ផៃ គឹមហឿត មកពីក្លិបគីសែមានរិទ្ធអាជ្ញាធរជាតិអាវុធគីមី កាលពីយប់ម្សិលម្ងៃ៉លើកីឡាករឡុង សំណាង មកពីក្លិបសាលវ័ន្តកីឡា បានធ្វើឲ្យលោកក្នុងនាមជាអ្នកចាត់ចែងព្រឹត្តិការណ៍សាទរ និងរំភើបចិត្តជំនួសចំពោះលទ្ធផលដែលកីឡាកររូបនេះសម្រេចបាន ។ លោកថា ការប្រកួតបិទបញ្ចប់រវាងផៃ គឹមហឿត និងឡុង សំណាង មានការចាប់អារម្មណ៍ពេញទំហឹងពីអ្នកទស្សនា ដោយសូម្បីលទ្ធផលក៏មានការយកចិត្តទុកដាក់ជាពិសេសដើម្បីកុំឲ្យកើតមានភាពលម្អៀងណាមួយនាំឲ្យមានការរិះគន់ផងដែរ។ លោកថា ការប្រកួតផ្ដាច់ព្រ័ត្រមានការឃ្លាំមើលយ៉ាងខ្លាំងពីមន្ត្រីជាន់ខ្ពស់របស់សហព័ន្ធ ពីម្ចាស់ស្ថានីយទូរទស្សន៍ និងពីតំណាងជាន់ខ្ពស់របស់ក្រុមហ៊ុនឧបត្ថម្ភដើម្បីឲ្យការប្រកួតសម្រេចបានដោយយុត្តិធម៌មិនមានលាយឡំបក្ខពួក ឬខ្សែទុយោនៅលើសង្វៀន ។
លោកពេញចិត្តនឹងលទ្ធផលដែលផៃ គឹមហឿត ឈ្នះពានដោយសារតែផ្អែកតាមភាពជាក់ស្ដែង គឺកីឡាកររូបនេះមានប្រៀបល្អជាង ហើយល្អជាងដាច់តែម្ដងក្នុងទឹកទី២ ខណៈដែលការប្រកួតបើកឆាក និងទឹកចុងក្រោយ គឺពួកគេមានលក្ខណៈប្រដំប្រសងគ្នា ឬអាចនិយាយបានថាឡុង សំណាង មានប្រៀបជាងតែបន្តិចបន្តួច ។
ការប្រកួតនៅវគ្គផ្ដាច់ព្រ័ត្ររវាងកីឡាករទាំង២ និងកីឡាករដែលត្រូវប្រកួតយកលេខ៣ និងលេខ៤ ចំនួន២រូបទៀតកំណត់យកតែ៣ទឹកប៉ុណ្ណោះតាំងពីដើមទីរហូតមក ។ លោកថា កីឡាករផៃ គឹមហឿត នឹងក្លាយជាសមាសភាពថ្មីល្បីឈ្មោះដោយមិនពិបាកនោះទេ បន្ទាប់ពីគេឡើងអង្គុយកៅអីលេខ១ ឬជើងឯកនៅក្នុងព្រឹត្តិការណ៍ដែលមានជើងខ្លាំងចូលរួមប្រកួតរហូតដល់៣២រូប។ លោកថា គឺជារឿងពិបាកខ្លាំងដែលកីឡាករម្នាក់អាចឈានដល់វគ្គចុងក្រោយ ហើយទទួលបានជ័យលាភីនាំមុខគេក្នុងពេលដែលការប្រកួតទាំងមូលត្រូវហែលឆ្លងដោយការប្រជែងជាច្រើនដំណាក់កាល ដូចជាបានឆ្លងកាត់តាំងពីវគ្គ៣២នាក់យក១៦នាក់ ពីវគ្គ១៦នាក់យក៨នាក់ និងពីវគ្គ៨នាក់យក៤នាក់ ផ្អែកតាមរូបមន្តចាញ់ធ្លាក់ៗ ។ លោកមានប្រសាសន៍៖ «គ្រាន់តែគិតរឿងផៃ គឹមហឿត យកលេខ១បានហ្នឹង គឺមានន័យថាគាត់ជាកីឡាករវ័យក្មេងថ្មីមិនធម្មតារួចទៅហើយ ត្រង់ហ្នឹងហើយដែលខ្ញុំហ៊ានអះអាងថា កូនហ្នឹងនឹងល្បីកាន់តែខ្លាំងក្រោយពីឈ្នះពានហ្នឹង ។
បើតាមគម្រោងប៉ុស្ដិ៍លេខ៥នឹងរៀបចំឲ្យគាត់ឡើងប្រកួតនៅក្នុងព្រឹត្តិការណ៍ធំឲ្យបានច្រើនដើម្បីឲ្យគេស្គាល់គាត់កាន់តែច្រើនថែមទៀត គឺអត់បញ្ចប់ត្រឹមហ្នឹងទេ!»។ លោកថា កីឡាកររូបនេះមិនមែនបានត្រឹមពាន ហើយក៏ត្រូវដេកផ្ទះនៅក្រោយប្រកួតចប់នោះទេ ដោយបេសកកម្មបន្តបន្ទាប់របស់គេគឺប្រឹងហ្វឹកហាត់ឲ្យខ្លាំងដើម្បីទទួលយកការប្រកួតកម្រិតជាតិ និងជាមួយបរទេសបន្ទាប់ពីបានកាន់ពានជើងឯក ។ លោកមានគម្រោងបណ្ដុះកីឡាកររូបនេះឲ្យក្លាយជាជើងខ្លាំងល្បីឈ្មោះ និងធ្វើឲ្យក្លាយជាធនធានថ្មីសម្រាប់ព្រឹត្តិការណ៍ស៊ីហ្គេមឆ្នាំ២០២៣ ដោយសារទម្រាំដល់ពេលនោះវ័យ សមត្ថភាព និងបទពិសោធន៍របស់កីឡាកររូបនេះ គឺសមល្មមនឹងឱកាសឡើងប្រកួតតែម្ដង ។
លោកមានប្រសាសន៍ថា ៖«ទម្រាំដល់ឆ្នាំ២០២៣ ខ្ញុំយល់ថា កីឡាករខ្លាំងជើងចាស់គាត់ចង់ហួសពេលហើយ អញ្ចឹងហើយទើបខ្ញុំយល់ថាមានតែបណ្ដុះក្មេងៗស៊េរីក្រោយប៉ុណ្ណោះ ហើយខ្ញុំមើលឃើញថា ផៃ គឹមហឿត គឺត្រូវនឹងកាលៈទេសៈហ្នឹងល្មម ទើបគិតថាក្រោយពីគេបានពានហើយ យើងនឹងរៀបចំការប្រកួតឲ្យគ្នាឲ្យបានច្រើនដើម្បីបានល្បីឈ្មោះនឹងគេនឹងឯង!» ។ លោកថា ចំណាត់ការរបស់ប៉ុស្ដិ៍លេខ៥ ធ្លាប់ធ្វើឲ្យកីឡាករច្រើនរូបក្លាយជាធនធានជួរមុខនៅក្នុងពិភពប្រដាល់រួចហើយ ដូច្នេះហើយទើបជារឿងមិនប្លែកនោះទេសម្រាប់ជំហានធ្វើឲ្យកីឡាករផៃ គឹមហឿត ដែលបានទទួលពានជើងឯកកាលពីថ្ងៃអាទិត្យម្សិលម៉្ងៃ ក្លាយជាកីឡាករជួរមុខម្នាក់ក្នុងពេលខាងមុខ ។
យ៉ាងណាមិញ លោកក៏សម្ដែងទឹកចិត្តអាណិតដល់ឡុង សំណាង ផងដែរ ដែលប្រឹងអស់ពីសមត្ថភាពទៅហើយ ប៉ុន្តែបានត្រឹមលេខ២នោះ ។ លោកមានគម្រោងលើកស្ទួយដូចគ្នា ដោយបានទាំងអះអាងថា នៅក្នុងចំណោមកីឡាករដែលបានជាប់លេខទាំង៤ គឺឲ្យតែអ្នកណាប្រឹងប្រែងបង្កើនសមត្ថភាព នោះប៉ុស្ដិ៍លេខ៥នឹងស្វាគមន៍សម្រាប់ការរៀបចំព្រឹត្តិការណ៍ទាំងជាតិ និងអន្តរជាតិ ដើម្បីឲ្យបានលេចធ្លោមុខមាត់ ។
គួរបញ្ជាក់ថា កីឡាករផៃ គឹមហឿត ម្ចាស់ជើងឯកបានទទួលទឹកប្រាក់សុទ្ធ៤ពាន់ដុល្លារ អមដោយពានជើងឯកមួយ ។ កីឡាករឡុង សំណាង ដែលចាញ់ពិន្ទុហើយបានត្រឹមចំណាត់ថ្នាក់លេខ២ ទទួលបាន២ពាន់ដុល្លារអមដោយពានកិត្តិយសមួយ ។ កីឡាករឌុន ប៊ុនធឿន មកពីក្លិបខេត្តព្រៃវែង ដែលទទួលបានចំណាត់ថ្នាក់លេខ៣ បានទឹកប្រាក់៧៥០ដុល្លារអមដោយពានកិត្តិយសមួយ និងកីឡាករញ៉េ សិទ្ធ មកពីក្លិបអេភូថងកីឡា បានចំណាត់ថ្នាក់លេខ៤ ទទួលបានទឹកប្រាក់៥០០ដុល្លារអមដោយពានកិត្តិយសមួយ ។ ទោះជាក្នុងចំណោមពួកគេ មានតែកីឡាករផៃ គឹមហឿត ម្នាក់លេចធ្លោជាងគេ ប៉ុន្តែផ្អែកតាមសមត្ថភាពទម្រាំឈានដល់វគ្គ៤នាក់ចុងក្រោយនោះ គឺពួកគេនឹងបានលេចធ្លោមិនខុសគ្នា បន្ទាប់ពីធ្វើឲ្យមហាជនកត់សម្គាល់ក្រោយពីអាចយកឈ្នះលើគូប្រកួតជាច្រើនក្នុងចំណោម៣២រូបតាំងពីចាប់ផ្ដើមការប្រកួតនោះ ៕
ចែករំលែកព័តមាននេះ