សភាប្រទេសហូឡង់ និងន័រវេស ទើបតែបោះឆ្នោតយល់ព្រមឱ្យអនុវត្តកិច្ចព្រមព្រៀងដែលបានចុះហត្ថលេខា កាលពីកន្លះឆ្នាំមុន ចាប់ពីខែវិច្ឆិកា ២០១៥នេះតទៅ ។ កិច្ចព្រមព្រៀងនោះគឺហូឡង់យល់ព្រមឱ្យន័រវេស «នាំចេញ» អ្នកទោសទៅទទួលទោសនៅពន្ធនាគាររបស់ខ្លួន ។
កាលពីដើមខែមីនា ២០១៥ រដ្ឋមន្ត្រីក្រសួងយុត្តិធម៌ន័រវេស លោក Ander Anunsen និង លោករដ្ឋមន្ត្រីក្រសួងយុត្តិធម៌ហូឡង់ លោក Fred Teeven បានចុះហត្ថលេខាលើកិច្ចព្រមព្រៀងអនុញ្ញាតឱ្យន័រវេសបញ្ជូនអ្នកទោសរបស់ខ្លួនទៅទទួលទោសក្នុងពន្ធនាគារប្រទេស ហូឡង់ ។ តាមកិច្ចព្រមព្រៀងនោះ អ្នកទោសន័រវេស២៤២នាក់ ត្រូវបានបញ្ជូនដាក់ពន្ធនាគារ Norgerhaven ក្នុងប្រទេសហូឡង់ ។ មូលហេតុនាំឱ្យមានកិច្ចព្រមព្រៀងដូច្នេះ ព្រោះនៅប្រទេសហូឡង់ពន្ធនាគារមានកន្លែងទំនេរច្រើន ខណៈនៅន័រវេសពន្ធនាគារទាំងអស់កំពុងស្ថិតក្នុងស្ថានភាពលើសចំណុះ។ ស្ថិតិនៅក្រសួងយុត្តិធម៌ន័រវេសបានឱ្យដឹងថា សព្វថ្ងៃនៅន័រវេស មានអ្នកទោស ដែលតុលាការកាត់ទោសចំនួន១.៣០០នាក់ នៅផ្ទះយ៉ាងរំភើយ ព្រោះគ្មានកន្លែងដាក់ពន្ធនាគារ។ តាមកិច្ចព្រមព្រៀងនោះក្រៅពីទទួលយកអ្នកទោសន័រវេសដាក់ពន្ធនាគារ Norgerhavan ហូឡង់ក៏អនុញ្ញាតឱ្យអនុរក្សពន្ធនាគារន័រវេសទៅមើលការពារពួកអ្នកទោសរបស់ខ្លួនផងដែរ ។
កិច្ចព្រមព្រៀងរវាងន័រវេស និងហូឡង់នេះ ស្តាប់ទៅហាក់ដូចជារលូនល្អណាស់ ប៉ុន្តែតាមពិតជួបការតវ៉ាយ៉ាងខ្លាំងពីប្រជាជនន័រវេស ក៏ដូចជាអ្នកទោសហូឡង់ក្នុងពន្ធនាគារ Norgerhaven ។ ប្រជាជនន័រវេស ពិសេសសាច់ញាតិអ្នកទោសដែលត្រូវបញ្ជូនទៅហូឡង់ ប្រឆាំងប្តូរផ្តាច់ទាមទារឱ្យលុបកិច្ចព្រមព្រៀងចោល ព្រោះខ្លួនមិនអាចសួរសុខទុក្ខសាច់ញាតិក្នុងពន្ធនាគារដូច មុនៗបាន បើចង់សួរសុខទុក្ខបានទាល់តែចំណាយប្រាក់ច្រើនធ្វើដំណើររាប់រយ រាប់ពាន់គីឡូម៉ែត្រ ហើយថែមទាំងចំណាយពេលវេលាយូរទៀត ។ ទន្ទឹមនឹងការតវ៉ានៅន័រវេស អ្នកទោសហូឡង់នៅពន្ធនាគារ Norgerhaven ក៏តវ៉ាពុះកញ្ជ្រោលដូចគ្នា ដោយខ្លាចអ្នកទោសបរទេសហូរចូលដណ្តើមយកភាពងាយស្រួលដែលខ្លួនកំពុងមានរាល់ថ្ងៃ ព្រោះនៅប្រទេសហូឡង់ពន្ធនាគារ Norgerhaven ជាពន្ធនាគារមានការបើកទូលាយជាងគេ អ្នកទោសមានសិទ្ធិដាំបន្លែ ចិញ្ចឹមមាន់ ទា និងដាំស្ល ហូបចុកខ្លួនឯងថ្មើរណាក៏បាន ។ គ្រប់បន្ទប់ឃុំឃាំងមានទូរទស្សន៍ខ្សែកាប មានរបស់ប្រើប្រាស់ ទំនើបៗផ្សេងទៀតជាច្រើន ពិសេសបើចង់លាបថ្នាំបន្ទប់តាមពណ៌ដែលខ្លួនស្រឡាញ់ ហើយតុបតែងដោយគ្រឿងលម្អ ផ្សេងៗទៀត គឺអាចធ្វើបានទាំងអស់ ។ អ្នកទោសហូឡង់នៅពន្ធនាគារ Norgerhaven ដែលខ្លះត្រូវជាប់ពន្ធនាគារ១០ឆ្នាំ ខ្លះត្រូវជាប់ពន្ធនាគារអស់មួយជីវិត គ្រាន់តែឮថាគេជិតអនុវត្តកិច្ចព្រមព្រៀងន័រវេស-ហូឡង់ ឆាប់ៗនេះ ពួកគេបះបោរតវ៉ាភ្លាម គឺតវ៉ាដោយស្រែកឆោឡោផង ដោយសរសេរលិខិតផ្ញើទៅលោករដ្ឋមន្ត្រីក្រសួងយុត្តិធម៌ហូឡង់ តាមរយៈលោកស្រីមេធាវី Hattie Kemers ផង ។ តាមការលើកឡើងរបស់លោកស្រីមេធាវី Hattie Kremers គឺអ្នកទោសទាំងនោះខ្លាចត្រូវគេបញ្ជូនទៅពន្ធនាគារផ្សេង ទុកកន្លែងដែលពួកខ្លួនធ្លាប់រស់នៅស្រួលឱ្យអ្នកទោសបរទេស ។
ការ«នាំចេញ» អ្នកទោសទៅប្រទេសផ្សេង មិនមែនជារឿងថ្មីសម្រាប់អឺរ៉ុបឡើយ ។ ឆ្នាំ២០១០ ប្រទេសបែលហ្ស៊ិកចុះហត្ថលេខាជាមួយប្រទេសហូឡង់ ជួលកន្លែងឃុំឃាំងចំនួន៦០០កន្លែង ដើម្បីឃុំឃាំងអ្នកទោសបែលហ្ស៊ិក ។ ឆ្នាំ២០១៤ ប្រទេសន័រវេស ស្នើប្រទេសស៊ុយអែត ដែលនៅជិតខាងគ្នា សុំឱ្យទទួលអ្នកទោសន័រវេស តែការចរចាមិនត្រូវរ៉ូវគ្នាទើបន័រវេសងាកទៅរកប្រទេសហូឡង់ ដែលនៅឆ្ងាយពីគ្នាទៅវិញ ។ ឆ្នាំ២០១៥នេះដែរ ប្រទេសស្វ៊ីស លើកឡើងពីបំណងរបស់ខ្លួនចង់«នាំចេញ» អ្នកទោសទៅដាក់ពន្ធនាគារនៅប្រទេសអាល្លឺម៉ង់ ឬប្រទេសបារាំង ។ គេដឹងថា នៅអឺរ៉ុប អត្រាអ្នកទោស៧១នាក់ ក្នុងចំណោមប្រជាជន១០០.០០០នាក់ជាអត្រាទាបបំផុត ។
ហេតុនេះពួកអ្នកឯកទេសក្នុងក្រសួងយុត្តិធម៌ហូឡង់ប៉ាន់ប្រមាណឃើញថា ក្នុងរយៈពេល៥ឆ្នាំទៀត ពន្ធនាគារនៅហូឡង់សល់កន្លែងទំនេរ៧០០កន្លែង អាចជួលឱ្យបរទេសបាន ៕
ចែករំលែកព័តមាននេះ