ខេត្តព្រះសីហនុ៖ កាលពីព្រឹកថ្ងៃទី ២២ ខែមិថុនា ឆ្នាំ២០២១ លោក គួច ចំរើន អភិបាលនៃគណៈអភិបាលខេត្តព្រះសីហនុ អញ្ជើញអមដំណើរលោកនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានប្រតិបត្តិការយុទ្ធនាការចាក់វ៉ាក់សាំង បើកយុទ្ធនាការចាក់វ៉ាក់សាំង ជូនដល់ប្រជាពលរដ្ឋ និងកម្មករ កម្មការិនី នៅទូទាំងខេត្តព្រះសីហនុ។ យុទ្ធនាការចាក់វ៉ាក់សាំងនៅខេត្តព្រះសីហនុនេះ បានធ្វើឡើង ដំណាលគ្នានឹងខេត្ត ៣ទៀត គឺកោះកុង តាកែវ និងកំពង់ស្ពឺ ដោយមានប្រជាពលរដ្ឋ អាយុ ១៨ឆ្នាំឡើងទៅ ដែលត្រូវចាក់វ៉ាក់សាំង សរុប ១.២៤៤.០០០ នាក់។
លោកនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិការយុទ្ធនាការចាក់វ៉ាក់សាំង មានប្រសាសន៍ថា ថ្ងៃនេះ កងយោធពលខេមរភូមិន្ទ បានសហការជាមួយរដ្ឋបាលខេត្ត និងមន្ត្រីសុខាភិបាលខេត្តទាំង ៤ មានខេត្តព្រះសីហនុ កោះកុង កំពង់ស្ពឺ និងខេត្តតាកែវ បើកយុទ្ធនាការចាក់វ៉ាក់សាំងជូនប្រជាពលរដ្ឋ។
សូមជម្រាបជូនថា មន្ទីរសុខាភិបាលខេត្តព្រះសីហនុ កន្លងមក គឺបានចាក់វ៉ាក់សាំងជូនមន្ត្រីរាជការកងកម្លាំងប្រដាប់អាវុធ និងប្រជាពលរដ្ឋក្នុងខេត្ត បានមួយជំហ៊ានរួចមកហើយ។ ប៉ុន្តែពេលនេះ បើកយុទ្ធនាការចាក់វ៉ាក់សាំងព្រមៗគ្នាតែម្តង ទាំង ៤ខេត្ត។
ដោយឡែក ខេត្តព្រះសីហនុ មានប្រជាពលរដ្ឋ ត្រូវចាក់វ៉ាក់សាំងចំនួន ១៩៣.១៦៥នាក់ ក្នុងនោះ កងយោធពលខេមរភូមិន្ទទទួលភារកិច្ចចាក់ ១១៦.៩៣៥នាក់។ ក្រៅពីនោះ គឺមន្ទីរសុខាភិបាលខេត្ត ចាក់ជូន។
បន្ទាប់ពីការប្រកាសបើកយុទ្ធនាការចាក់វ៉ាក់សាំង ឃើញថា មានប្រជាពលរដ្ឋ ចង់ចាក់វ៉ាក់សាំង មកពីគ្រប់ទីកន្លែង។
ដោយអនុវត្តតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺចាក់វ៉ាក់សាំងជូនប្រជាពលរដ្ឋ កម្មករ កម្មការិនី ដើម្បីឱ្យវ៉ាក់សាំងជ្រាបចូលក្នុងខ្លួន។
កងយោធពលខេមរភូមិន្ទ នឹងចាក់វ៉ាក់សាំងជូនប្រជាពលរដ្ឋដោយមិនខ្លាចនឿយហត់ នេះជាកាតព្វកិច្ចសម្រាប់ជាតិរបស់យើង ដើម្បីកាត់ផ្តាច់ការឆ្លងជំងឺកូវីដ-១៩ ធ្វើឱ្យប្រទេសជាតិមានស្ថេរភាព និងសេដ្ឋកិច្ចមានការរីកចម្រើននាពេលខាងមុខ។
លោកនាយឧត្តមសេនីយ៍ ក៏បានបន្តថា ខេត្តទាំង០៤ មានប្រជាពលរដ្ឋ ត្រូវចាក់វ៉ាក់សាំងសរុបចំនួន ១.២៤៤.០០០ នាក់។ ដោយឡែក កងយោធពលខេមរភូមិន្ទទទួលភារកិច្ចចាក់វ៉ាក់សាំងចំនួន ៨១ម៉ឺននាក់។ យើងខិតខំចាក់វ៉ាក់សាំង ពីថ្ងៃទី២២ ដល់ថ្ងៃ៣០ មិថុនា ឆ្នាំ២០២១ ចាក់ឱ្យអស់ដូសទី១ គ្រប់ខេត្តទាំង០៤ ចំពោះវ៉ាក់សាំង យើងមានគ្រប់ចំនួន ក្នុងដៃរួចហើយ សម្រាប់ដូសទី១ និងដូសទី២ ដើម្បីចាក់ជូនប្រជាពលរដ្ឋ ១០០ភាគរយ។
លោក គួច ចំរើន អភិបាលខេត្តព្រះសីហនុ ក្នុងនាមប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ ព្រះសង្ឃគ្រប់ព្រះអង្គ សូមថ្លែងអំណរគុណសម្តេចតេជោ ដែលសម្តេចខិតខំរកវ៉ាក់សាំងដើម្បីចាក់ជូនប្រជាពលរដ្ឋរបស់យើង និងបានដាក់ចេញវិធានការចុះចាក់វ៉ាក់សាំងជូនប្រជាពលរដ្ឋ។
លោកអភិបាលខេត្តបន្តថា ពិសេសថ្ងៃនេះ សម្តេចបានដឹកនាំចាត់ចែងកងកម្លាំងចេញធ្វើសកម្មភាពដោយផ្ទាល់ គឺចាក់វ៉ាក់សាំងជូនប្រជាពលរដ្ឋខេត្តព្រះសីហនុ ក្នុងនាមអាជ្ញាធរខេត្ត បានធ្វើកិច្ចសហការជាមួយក្រុមការងារចាក់វ៉ាក់សាំង ព្រមទាំងបានដាក់ចេញនូវផែនការលម្អិត ចាត់ចែងអញ្ជើញបងប្អូនប្រជាពលរដ្ឋឱ្យពួកគាត់មកតាមការចាត់ចែងរបស់អាជ្ញាធរ ដើម្បីមានសណ្តាប់ធ្នាប់ អនុវត្តវិធានការណ៍ ៣.ការពារ និង៣.កុំ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីកាត់បន្ថយការឆ្លងជំងឺកូវីដ-១៩ ប្រសិនបើប្រជាពលរដ្ឋមកតាមការរៀបចំរបស់អាជ្ញាធរ អាចជួយពន្លឿនដល់ការចាក់វ៉ាក់សាំងបានកាន់តែលឿន ព្រោះបេសកកម្មរបស់កងយោធពលខេមរភូមិន្ទ មិនមែនមានតែខេត្តព្រះសីហនុមួយទេ មានរាជធានី ខេត្តទាំង២៥ ត្រូវបន្តបេសកកម្មចាក់វ៉ាក់សាំងជូនប្រជាពលរដ្ឋ ដូច្នេះគោលដៅនីមួយៗត្រូវខិតខំសហការគ្នា ដើម្បីឱ្យបេសកកម្មចាក់វ៉ាក់សាំងបានលឿន ហើយវ៉ាក់សាំងបានជ្រាបចូលក្នុងខ្លួនប្រជាពលរដ្ឋ។
ទន្ទឹមនោះ លោកអភិបាលខេត្តព្រះសីហនុ ក៏បានអំពាវនាវដល់ប្រជាពលរដ្ឋក្នុងពេលតែមួយយើងមិនអាចចាក់ជូនប្រជាពលរដ្ឋបានទាំងអស់គ្នានោះទេ ត្រូវតែមានអ្នកមុន និងអ្នកក្រោយបន្តបន្ទាប់តាមចំនួនក្រុមគ្រូពេទ្យចាក់វ៉ាក់សាំង ដូច្នេះសូមបងប្អូនប្រជាពលរដ្ឋត្រូវចូលរួមតាមការណែនាំរបស់អាជ្ញាធរ ទើបការរៀបចំរបស់យើងអាចដំណើរការទៅបានដោយរលូន និងទទួលបានមអត្ថប្រយោជន៍ទាំងអស់គ្នា៕ រស់ ភីណា
ចែករំលែកព័តមាននេះ