ភ្នំពេញ៖ រដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ បានអះអាងជាថ្មីនូវការគាំទ្ររបស់ចក្រភពអង់គ្លេស សម្រាប់កិច្ចប្រជុំកំពូលអាស៊ី-អឺរ៉ុប លើកទី១៣ ASEM 13…
ភ្នំពេញ៖ រដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ បានអះអាងជាថ្មីនូវការគាំទ្ររបស់ចក្រភពអង់គ្លេស សម្រាប់កិច្ចប្រជុំកំពូលអាស៊ី-អឺរ៉ុប លើកទី១៣ ASEM 13 ដែលនឹងរៀបចំដោយកម្ពុជា នៅថ្ងៃទី២៥-២៦ ខែវិច្ឆិកា ឆ្នាំ២០២១។ នេះបើតាមសេចក្តីប្រកាសរបស់ក្រសួងការបរទេស ពីលទ្ធផលនៃជំនួបរវាងរដ្ឋមន្ត្រីការបរទេសកម្ពុជា និងអង់គ្លេស នៅព្រឹកថ្ងៃទី២៣ ខែមិថុនា ឆ្នាំ២០២១។
លោក ដូមីនិក រ៉ាអាប់ គឺជារដ្ឋមន្ត្រីការបរទេសនៃចក្រភពអង់គ្លេស ដំបូងគេបង្អស់ ដែលបានអញ្ជើញមកបំពេញទស្សនកិច្ច នៅកម្ពុជា។ មកដល់ភ្នំពេញ កាលពីយប់ថ្ងៃទី២២មិថុនា លោក ដូមីនិក រ៉ាអាប់ បានមកបំពេញទស្សនកិច្ចផ្លូវការនៅកម្ពុជា នាថ្ងៃទី២៣មិថុនានេះ ដើម្បីជំរុញ និងពង្រឹងបន្ថែមទៀតនូវកិច្ចសហប្រតិបត្តិការទ្វេភាគី និងពហុភាគីរវាងប្រទេសទាំងពីរ។
ក្នុងអំឡុងពេលទស្សនកិច្ច នៅកម្ពុជា លោក ដូមីនិក រ៉ាអាប់ បានជួបប្រជុំផ្លូវការជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងលោក សាយ សំអាល់ រដ្ឋមន្ត្រីក្រសួងបរិស្ថាន។ លោករដ្ឋមន្ត្រី ក៏បានអញ្ជើញទៅទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលឯកសារកម្ពុជា ផងដែរ៕
ចែករំលែកព័តមាននេះ