ទីតាំងលេងល្បែងបញ្ជល់មាន់ និងអាប៉ោងដោយខុសច្បាប់ ស្ថិតនៅក្នុងព្រៃឬស្សី ខាងកើតសាលារៀនកូនត្មាត ភូមិឈើទាលជ្រុំ ឃុំអញ្ចើម ស្រុកត្បូងឃ្មុំនោះ ដោយក្រុមអ្នកមានល្បែងពពាក់ពពួន នាំគ្នាលេងហូរកញ្ជ្រៀវយ៉ាងសប្បាយមិនខ្លាចពីការឆ្លងជំងឺ
ខេត្តត្បូងឃ្មុំ ៖ ទីតាំងលេងល្បែងបញ្ជល់មាន់ និងអាប៉ោងដោយខុសច្បាប់ ស្ថិតនៅក្នុងព្រៃឬស្សី ខាងកើតសាលារៀនកូនត្មាត ភូមិឈើទាលជ្រុំ ឃុំអញ្ចើម ស្រុកត្បូងឃ្មុំនោះ ដោយក្រុមអ្នកមានល្បែងពពាក់ពពួន នាំគ្នាលេងហូរកញ្ជ្រៀវយ៉ាងសប្បាយមិនខ្លាចពីការឆ្លងជំងឺកូវីដ១៩នោះទេ។ ប៉ុន្តែមន្ត្រីសាលាស្រុកមួយរូបបានបង្ហើបថា ពេលកម្លាំងចុះធ្វើតេស្តទៅលើអ្នកភូមិចំនួន២ នាល្ងាចថ្ងៃទី២២ មិថុនា និងនៅព្រឹកថ្ងៃទី២៣ មិថុនា ២០២១នោះ ក៏បានរកឃើញថា អ្នកលេងបញ្ជល់មាន់ចំនួន២នាក់ មានផ្ទុកវិជ្ជមានកូវីដ១៩ ក្នុងនោះមានអ្នកពាក់ព័ន្ធជាង៣០នាក់ទៀតផងដែរ។
បើតាមលោក នៅ អូន មេឃុំអញ្ចើម ក៏មានប្រសាសន៍ឲ្យដឹងនៅរសៀលថ្ងៃទី២៣ ខែមិថុនា ឆ្នាំ២០២១ ថា តាមពិតទៅល្បែងស៊ីសង គឺខុសច្បាប់មិនអនុញ្ញាតឱ្យលេងនោះទេ តែក្រុមអ្នកញៀនល្បែងបាននាំគ្នាលេងចល័ត រត់ទីកន្លែងមួយទៅកន្លែងមួយទៀត ដោយមិនមានគ្នាច្រើននោះទេ។
លោកមេឃុំអញ្ចើម មានប្រសាសន៍បន្តថា កន្លងមក ពេលដែលប្រជាពលរដ្ឋរាយការណ៍មានការលេងបញ្ជល់មាន់ខុសច្បាប់ លុះពេលកម្លាំងសមត្ថកិច្ចដឹងក៏ចុះទៅបង្ក្រាប ធ្វើឲ្យក្រុមអ្នកលេងល្បែងទាំងនោះ នាំគ្នារត់គេចខ្លួន ហើយឈប់លេងនៅទីតាំងចាស់ ដោយនាំគ្នាទៅលេងនៅកន្លែងថ្មីតែមិនអាចចិន្ត្រៃយ៍នោះទេ។ គឺលេងម្ដងត្រង់នេះ ម្ដងត្រង់នោះ ដើម្បីបង្វែងដានពីកម្លាំងសមត្ថកិច្ច ។
ជាមួយគ្នានោះ រូបលោកនឹងក្រើនរំលឹកឲ្យនាយប៉ុស្តិ៍រដ្ឋបាលអញ្ចើម តាមឃ្លាំមើលទីតាំងលេងល្បែងខាងលើ ប្រសិនបើឃើញត្រូវតែបង្ក្រាប ព្រោះថាជាទង្វើខុសច្បាប់ ហើយការជួបជុំមនុស្សច្រើនបែបនេះ គឺផ្ទុយនឹងការណែនាំរបស់ជំនាញក្រសួងសុខាភិបាល ដែលអាចនាំឲ្យឆ្លងជំងឺកូវីដ១៩។
លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំប្រាប់ឲ្យដឹងថា ចំពោះទីតាំងខាងលើនោះ មិនមានគេលេងល្បែងបញ្ជល់មាន់ខុសច្បាប់ទៀតនោះទេ។
តាមមន្ត្រីសាលាស្រុកមេមត់មួយរូបបានបង្ហើបប្រាប់ឲ្យដឹងថា កម្លាំងរបស់ជំនាញសុខាភិបាលស្រុកបានចុះធ្វើតេស្តទៅលើអ្នកភូមិសង្គមមានជ័យ និងភូមិត្រពាំងរាំង ឃុំមេមត់ ស្រុកមេមត់ នាល្ងាចថ្ងៃទី២២ មិថុនា និងនៅ ព្រឹកថ្ងៃទី២៣ មិថុនា ២០២១នេះ ក៏បានរកឃើញថា អ្នកលេងបញ្ជល់មាន់ចំនួន២នាក់ មានផ្ទុកវិជ្ជមានកូវីដ១៩ ក្នុងនោះមានអ្នកពាក់ព័ន្ធជាង៣០នាក់ទៀត កំពុងតែចុះប្រមូលសំណាកហើយ៕
ចែករំលែកព័តមាននេះ