រាជធានីភ្នំពេញ ៖ ទោះជាទើបឡើងមកប្រកួតនៅស្រុកតែម្ដង ប៉ុន្តែកីឡាករជើងខ្លាំងថៃ Kamlia Phath ត្រូវបានអ្នកស្នេហាវិស័យប្រដាល់កត់សម្គាល់ពីសមត្ថភាពប្រកួតយ៉ាងខ្លាំង បន្ទាប់ពីកីឡាកររូបនេះបានបំបាក់កីឡាកររឿង សោភ័ណ្ឌ
រាជធានីភ្នំពេញ ៖ ទោះជាទើបឡើងមកប្រកួតនៅស្រុកតែម្ដង ប៉ុន្តែកីឡាករជើងខ្លាំងថៃ Kamlia Phath ត្រូវបានអ្នកស្នេហាវិស័យប្រដាល់កត់សម្គាល់ពីសមត្ថភាពប្រកួតយ៉ាងខ្លាំង បន្ទាប់ពីកីឡាកររូបនេះបានបំបាក់កីឡាកររឿង សោភ័ណ្ឌ ឲ្យចាញ់យ៉ាងអាម៉ាស់ ក្នុងដំណើរមកប្រកួតកាលលើកទី១នោះ ។ អីុចឹងហើយទើបការប្រកួតលើកទី២របស់គេដែលត្រូវប៉ះជាមួយកីឡាករកម្ពុជាឡុង សុភី នៅល្ងាចថ្ងៃសៅរ៍ ហាក់ទទួលបានការចាប់អារម្មណ៍ខ្លាំង ។
នៅចុងសប្ដាហ៍នេះ នៅលើសង្វៀនទូរទស្សន៍អាស៊ីអាគ្នេយ៍ មានការប្រកួតអន្តរជាតិតែមួយសង្វៀនប៉ុណ្ណោះ គឺការប្រដាល់ពេលរសៀលថ្ងៃសៅរ៍ទី២៨ វិច្ឆិកា ក្នុងថ្ងៃនេះ ។ ការប្រកួតអន្តរជាតិនេះ នឹងមានបង្ហាញសមាសភាពកីឡាករកម្ពុជា២រូប និងកីឡាករថៃ២រូប ។ មួយគូទៀត កីឡាករថៃមិនត្រូវបានគេស្គាល់អត្តសញ្ញាណក្រៅពីឈ្មោះ និងប្រភេទទម្ងន់នោះទេ ដោយសារតែគេទើបមានមុខមកប្រកួតនៅថ្ងៃនេះហើយមិនដែលជាន់ដីកម្ពុជាទាល់តែសោះ ។
អីុចឹងហើយទើបការប្រកួតអន្តរជាតិសម្រាប់ថ្ងៃនេះ គេហាក់មផ្ដោតជាពិសេសតែលើការប្រកួតរវាងកីឡាករឡុង សុភី និងកីឡាករថៃ Kamlai Phath ដែលពួកគេនឹងកំដរបរិយាកាសការប្រដាល់អន្តរជាតិក្នុងប្រភេទទម្ងន់៦៩គីឡូក្រាម ។ ជំនួបរបស់អ្នកទាំងពីរមានការចាប់អារម្មណ៍ដោយសារតែជើងខ្លាំងរបស់ក្លិបសាលវ័ន្តកីឡា បានប្រកាសថានឹងយកជ័យជម្នះគ្រប់ការប្រកួតឲ្យទាល់តែបាន មុនពេលខ្លួនចូលរោងការនៅដើមឆ្នាំ២០១៦ខាងមុខ។ ម្យ៉ាងគូប្រកួតរបស់គេ គឺជាកីឡាករថៃដែលធ្លាប់ផ្ដួលរឿង សោភ័ណ្ឌ កាលខែកញ្ញាកន្លងទៅផង ទើបការផ្គូផ្គងឲ្យអ្នកទាំងពីរប៉ះគ្នា គឺជារឿងដែលមានអ្នកទស្សនាឃ្លាំមើល ។
Kamlai Phath គឺជាជើងខ្លាំងដែលមានប្រវត្តិប្រកួតមិនធម្មតានោះឡើយ ដោយសូម្បីតែរឿង សោភ័ណ្ឌ ក៏ទទួលស្គាល់ចំពោះការបរាជ័យរបស់ខ្លួននោះដែរ ក្នុងពេលប៉ះប្រកួតជាមួយគេ៥ទឹកពេញ ហើយទៅមិនរួចគ្រប់ស្នៀតនោះ ។ Kamlai Phath ធ្លាប់ប្រកួត៩៧លើក ឈ្នះ៧៧លើក ចាញ់១៨លើក និងស្មើ២លើកដោយលទ្ធផលប៉ុន្មានប្រកួតចុងក្រោយរបស់គេគឺក្រៅពីឈ្នះម្ចាស់ខ្សែក្រវាត់រឿង សោភ័ណ្ឌ ធ្វើឲ្យមានការទទួលស្គាល់ គេក៏ឈ្នះជើងខ្លាំងនៅក្នុងប្រទេសផ្សេងទៀតផងដែរ ។ កីឡាកររូបនេះល្អកែង ហើយរហ័សម៉ាត់ និងទាត់ និយាយរួមកម្រិតក្នុងការវាយលុករបស់គេសឹងមិនមានបច្ចេកទេសណាមួយទៅមិនរួចខ្លាំងណាស់ ទើបធ្វើឲ្យកីឡាករជាគូប្រកួតពិបាកនឹងស៊ី ។
យ៉ាងណាក៏ដោយ ក្នុងជំនួបជាមួយឡុង សុភី នៅល្ងាចនេះ វាមិនអាចដូចការចង់បានរបស់គេនោះឡើយ ដោយសារតែឡុង សុភី គឺជាកីឡាករដែលអ្នកគាំទ្រកម្ពុជាមានទំនុកចិត្ត១០០ភាគរយថា អាចសងសឹកឲ្យរឿង សោភ័ណ្ឌ បានសម្រេចក្រោយចប់ការប្រកួត ។ ក្រុមអ្នកតាមដានបានធ្វើការវិភាគថា កីឡាករកម្ពុជាមិនអាចបរាជ័យបានទេ ដោយសារតែក្រោយគ្រងតំណែងជាម្ចាស់ខ្សែក្រវាត់របស់ក្រុមហ៊ុនខារ៉ាបាវ នៅទូរទស្សន៍បាយ័ន កីឡាកររូបនេះល្អ និងខ្លាំងជាងមុនដាច់ឆ្ងាយ ។ ទាំងបច្ចេកទេស និងកម្លាំងស៊ុហ្វ ឡុង សុភី ហាក់ក្ដោបក្ដាប់បានខ្លាំងបើធៀបនឹងកីឡាករល្បីឈ្មោះផ្សេងទៀត ដែលកាន់តែមានប្រវត្តិឡើងប្រកួតច្រើន ក៏ធ្លាក់ដៃថយក្រោយបន្តិចម្ដងៗនោះ ។
ឡុង សុភី ត្រូវគេឃើញប្រឹងប្រែងហ្វឹកហាត់សំបើមណាស់ បើទោះជាលោកនឹងក្លាយជាកូនកំលោះ ដែលត្រៀមបន្ទុំសាច់រៀបការក្នុងពេលដ៏ខ្លី ។ ជើងខ្លាំងរូបនេះបញ្ជាក់ថា គេត្រូវការឈ្នះ១០០ភាគរយសម្រាប់ការប្រកួតដែលនឹងធ្វើឡើងនៅមុនរៀបការ ដោយរាប់ទាំងការប្រកួតនៅល្ងាចថ្ងៃនេះផង ទើបធ្វើឲ្យអ្នកគាំទ្រមានទំនុកចិត្តស្របគ្នា ។ នាពេលកន្លងមក កីឡាកររូបនេះ ក៏មានប្រវត្តិវាយផ្ដួលកីឡាករបរទេសមិនតិចនាក់នោះដែរ ទើបធ្វើឲ្យមានជំនឿចិត្តមិនណយប៉ុន្មាននៅក្នុងចំណោមមហាជនភាគច្រើន។
ឡុង សុភី ធ្លាប់ប្រកួតជាមួយកីឡាករថៃ មិនតិចជាង២០នាក់នោះទេ ដោយការប្រកួតកន្លងមកគេឈ្នះ១៩នាក់ ស្មើ១នាក់ និងចាញ់ថៃតែម្នាក់គត់សម្រាប់ជំនួបអន្តរជាតិនោះ ។
ជាក់ស្ដែងការប្រកួតលើកចុងក្រោយគឺគេបានបំបាក់ជើងខ្លាំងរបស់ថៃម្នាក់ឈ្មោះTom Tam ក្នុងទឹកទី៤នៅលើសង្វៀន SEA-TVធ្វើឲ្យមានការកោតសរសើរផងដែរ ។ ជើងខ្លាំង Kamlai Phath ទំនឹងជាពិបាក បើទោះជាគេធ្លាប់ស៊ីរឿង សោភ័ណ្ឌ ហើយបានឡើងក្រេឌីតក្នុងចំណោមអ្នកចូលចិត្តប្រដាល់នៅក្នុងប្រទេសកម្ពុជានោះក្ដី ។
សម្រាប់ការប្រកួតអន្តរជាតិមួយគូទៀត គឺឌុម កែវដា ជើងខ្លាំងរបស់កម្ពុជាមកពីក្លិបមកុដរាជសីហ៍ ត្រូវគេផ្គូផ្គងឲ្យប្រកួតជាមួយកីឡាករថៃឈ្មោះ Kamlai Yuk ។ អ្នកទាំងពីរប្រកួតគ្នាក្នុងប្រភេទទម្ងន់៦០គីឡូក្រាម ដោយកីឡាករថៃមិនត្រូវបានបង្ហាញតួលេខប្រកួតដើម្បីបញ្ជាក់ថា មានបទពិសោធន៍កម្រិតណានោះឡើយ ។ យ៉ាងណាមិញ អ្នករៀបចំការប្រកួតបានអះអាងថា Kamlai Yuk គឺជាបងប្អូនបង្កើតរបស់ Kamlai Phath ដែលជាជើងខ្លាំងត្រូវប៉ះជាមួយឡុង សុភី នោះ ទើបគេចាប់អារម្មណ៍ថាកីឡាករថៃទំនងមិនមែនជាជើងថ្មី ដែលឌុម កែវដា ងាយស៊ីនោះដែរ ។ ចាំមើលមើល៍តើការប្រកួតរបស់ពួកគេភាគីកម្ពុជា ឬថៃ ដែលទទួលបានឱកាសឈ្នះនោះ ។
នៅល្ងាចថ្ងៃសៅរ៍នេះ នៅលើសង្វៀនប៉ុស្ដិ៍លេខ៥ជ្រោយចង្វាឯណោះវិញ ក៏មានការប្រកួតដ៏គួរឲ្យចាប់អារម្មណ៍ផងដែរចាប់ពីម៉ោង៥ល្ងាចតទៅ ដោយសារតែកីឡាករល្អៗនៅក្នុងពិភពកីឡាប្រដាល់បង្ហាញវត្តមាន ៕
ចែករំលែកព័តមាននេះ