ខេត្តកំពត ៖ បើតាមតួលេខសរុបពីចំនួនភ្ញៀវទេសចរជាតិ និងអន្តរជាតិដែលចូលមកលេងកំសាន្តតាមរមណីយដ្ឋាននានាក្នុងទឹកដីខេត្តកំពតរយៈពេលបីថ្ងៃ របស់មន្ទីរទេសចរណ៍បានឲ្យដឹងថា រយៈពេលបីថ្ងៃនៃព្រះរាជពិធីបុណ្យអុំទូកឆ្នាំនេះចំនួនភ្ញៀវទេសចរសរុប៤០.៧៥៣នាក់ ក្នុងនោះភ្ញៀវទេសចរ ជាតិមានចំនួន៣៨.៩៩១នាក់ និងភ្ញៀវទេសចរបរទេសចំនួន១.៧៦២នាក់។
បើប្រៀបធៀបរយៈពេលបីថ្ងៃ នាឆ្នាំ២០១៤កន្លងទៅ មានការកើនឡើងប្រមាណជា៥%នៃភ្ញៀវដែលចូលមកលេងកំសាន្តក្នុងខេត្តដែលសម្បូរទៅដោយរមណីយដ្ឋានទេសចរណ៍ធម្មជាតិមួយនេះ។ បើតាមប្រសាសន៍របស់លោក សយ ស៊ីណុល ប្រធានមន្ទីរទេសចរណ៍ខេត្តបានឲ្យដឹងថា មូលហេតុនៃកំណើនភ្ញៀវទេសចរណ៍កើនឡើងជាងឆ្នាំមុនៗ គឺដោយសារអាជ្ញាធរគ្រប់ថ្នាក់ និងស្ថាបន័ពាក់ព័ន្ធនៅទូទាំងខេត្តបានសហការយ៉ាងល្អការពារសុវត្ថិភាពសន្តិសុខជូនប្រជាពលរដ្ឋនៅក្នុងខេត្តក៏ដូចជាភ្ញៀវដែលចូលមកលេងកំសាន្តផងដែរ។
ម្យ៉ាងវិញទៀតការយកចិត្តទុកដាក់ពីសំណាក់អាជ្ញាធរគ្រប់ថ្នាក់បានធ្វើការណែនាំ និងផ្សព្វផ្សាយដល់អាជីវករអ្នកលក់ដូរម្ហូបអាហារគ្រប់ផ្នែកនៅទីផ្សារក៏ដូចអ្នកបំរើសេវាលក់ដូរតាមរមណីយដ្ឋាន ភោជនីយដ្ឋាន និងផ្ទះសំណាក់ផងដែរ គឺកុំឲ្យបងប្អូនលក់តម្លៃខ្ពស់ស្រេចតែអំពើចិត្ត ត្រូវលក់ដូរឲ្យបានសមស្របដែលភ្ញៀវអាចទទួលយកបានឲ្យស្របនឹងពាក្យថា ទីក្រុងស្អាត ឆ្នេរស្អាត សេវាកម្មល្អ ខេត្តទទួលកិត្តិយសផ្ការំដួលបីទង ពីប្រមុខដឹកនាំរាជរដ្ឋាភិបាលផងដែរ៕
ចែករំលែកព័តមាននេះ