ខេត្តព្រះវិហារ ៖ ប្រាសាទព្រះវិហារទទួលភ្ញៀវទេសចរជាតិ និងអន្តរជាតិចូលទៅទស្សនាយ៉ាងច្រើនកុះករ ក្នុងមួយថ្ងៃៗ ក្នុងឆ្នាំ២០១៥នេះ បើប្រៀបធៀបទៅនឹងឆ្នាំ២០១៤ មានការកើនឡើងគួរឲ្យកត់សម្គាល់ ជាពិសេសក្នុងឱកាសបុណ្យប្រពៃណីជាតិខ្មែរធំៗ។
តាមការបញ្ជាក់ឲ្យដឹងពីលោក ចាន់ ឆន មន្ត្រីទទួលបន្ទុកព័ត៌មានអាជ្ញាធរជាតិព្រះវិហារ បានប្រាប់អ្នកសារព័ត៌មាន កាលពីថ្ងៃទី២៦ វិច្ឆិកា ២០១៥ថា រៀងរាល់ថ្ងៃធម្មតាក្នុងមួយថ្ងៃៗ ភ្ញៀវទេចរជាតិ និងអន្តរជាតិ ចូលមកទស្សនាប្រាង្គប្រាសាទព្រះវិហារប្រមាណជា៣០០នាក់ទៅ៤០០នាក់ ចំណែកឯក្នុងឱកាសបុណ្យប្រពៃណីជាតិធំៗវិញ ភ្ញៀវទេសចរជាតិ និងអន្តរជាតិចូលទៅទស្សនាប្រាសាទព្រះវិហារក្នុងមួយថ្ងៃ ចាប់ពី១.០០០នាក់ ទៅ១.៥០០នាក់ ដែលមកពីគ្រប់បណ្តាខេត្ត-ក្រុងក្នុងព្រះរាជាណាចក្រកម្ពុជា ។
មន្ត្រីអាជ្ញាធរជាតិព្រះវិហារដដែលបានបន្តថា នៅតំបន់រមណីយដ្ឋាន វប្បធម៌ប្រវត្តិសាស្ត្រប្រាសាទព្រះវិហារ ក៏មានសេវាកម្មទទួលភ្ញៀវទេសចរ ដូចជា មានសេវាកម្មដឹកអ្នកដំណើរឡើងភ្នំ តាមម៉ូតូ ឬរថយន្ត សេវាកម្មលក់ម្ហូបអាហារ នៅលើប្រាសាទព្រះវិហារ និងនៅចំណុចឃុំស្រឯម ចម្ងាយពីជើងភ្នំប្រាសាទព្រះវិហារ ប្រមាណ២០គីឡូម៉េត្រ ក៏មានសេវាកម្ម សណ្ឋាគារ ផ្ទះសំណាក់ ភោជនីយដ្ឋាន និងអាហារដ្ឋាន ជាច្រើនកន្លែងផងដែរ ។
តាមរបាយការណ៍របស់មន្ទីរទេសចរណ៍ខេត្តព្រះវិហារ បានឲ្យដឹងថា ចំនួនភ្ញៀវទេសចរចូលទស្សនាប្រាសាទព្រះវិហាររយៈពេល៦ខែ ដើមឆ្នាំ២០១៥នេះ ចំពោះភ្ញៀវជាតិមានចំនួន៥៣.០១៥នាក់ បើធៀបទៅនឹងឆ្នាំ២០១៤ ថយចុះ ៦.៧% ភ្ញៀវអន្តរជាតិមានចំនួន៨.៤៩៩នាក់ បើធៀបទៅនឹងឆ្នាំ២០១៤ កើនឡើង២៦.១៨% ។ ចំណែកឯស្ថិតិផ្ទះសំណាក់ អាហារដ្ឋាន គឺកំណត់មិនច្បាស់នោះទេ ដោយសារតែផ្ទះសំណាក់ សណ្ឋាគារ អាហារដ្ឋាន ភោជនីយដ្ឋាន ត្រូវបានបង្កើតឡើងជាហូរហែនៅតំបន់នោះ ។
សូមបញ្ជាក់ផងដែរថា ក្នុងរយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ភ្ញៀវទេសចរជាតិ មានចំនួន២.៨២៩នាក់ និងអន្តរជាតិចូលទស្សនាប្រាសាទព្រះវិហារ មានចំនួន២៧០នាក់ រីឯស្ថានការណ៍យោធាតំបន់ប្រាសាទព្រះវិហារ មានសភាពស្ងប់ស្ងាត់ជាធម្មតា មិនមានអ្វីគួរឲ្យកត់សម្គាល់ឡើយ ដោយកងកម្លាំងទាំងពីរភាគីកម្ពុជា-ថៃ មានទំនាក់ទំនងកិច្ចសហប្រតិបត្តិការគ្នាល្អជានិច្ច ៕
ចែករំលែកព័តមាននេះ