ខេត្តបន្ទាយមានជ័យ ៖ កម្លាំងជំនាញនគរបាលការិយាល័យកណ្តាលព្រហ្មទណ្ឌដឹកនាំដោយលោកវរសេនីយ៍ឯក សិទ្ធ ឡោះ ស្នងការរង កាលពីវេលាម៉ោង១រំលងអធ្រាត្រឈានចូលថ្ងៃទី២៧ វិច្ឆិកា ២០១៥ បានចុះត្រួតពិនិត្យគ្រប់ម៉ូតូចេញមកពីក្លិបហ្គោលថោន នៅក្រុងសិរីសោភ័ណ ក្នុងនោះបានរកឃើញដាវសាម៉ូរ៉ៃ១ដើមលាក់ទុកនៅក្រោមកែបម៉ូតូ ហើយអ្នកបើកបរម៉ូតូនេះត្រូវបានសមត្ថកិច្ចរកឃើញថាធ្លាប់ប្រើប្រាស់សារធាតុញៀន នេះបើតាមការធ្វើតេស្តទឹកនោម ។
នៅចំពោះមុខសមត្ថកិច្ច ជនសង្ស័យឈ្មោះ សៀក សារ៉ាយ ភេទប្រុស អាយុ១៦ឆ្នាំ ជិះម៉ូតូម៉ាក ZOMMER ពណ៌ស គ្មានស្លាកលេខ រស់នៅភូមិតារាងបាល់ទាត់ សង្កាត់កំពង់ស្វាយ បានសារភាពថា ខ្លួនពិតជាធ្លាប់ប្រើប្រាស់គ្រឿងញៀនរយៈពេល៦ខែហើយ ប៉ុន្តែចំពោះសមត្ថកិច្ចបានរកឃើញដាវសាម៉ូរ៉ៃដែលលាក់ទុកនៅក្រោមកែបម៉ូតូនោះ គេបានបដិដេធថាមិនមែនជាដាវរបស់គេនោះទេ ។
លោកវរសេនីយ៍ត្រី ម៉ុល សុភេទ នាយការិយាល័យនគរបាលព្រហ្មទណ្ឌកំរិតស្រាល បានបញ្ជាក់ថា ទោះបីជាជនសង្ស័យមិនសារភាពទទួលស្គាល់ដាវសាម៉ូរ៉ៃជារបស់ខ្លួនក៏ដោយ តែសមត្ថកិច្ចត្រួតពិនិត្យ និងរកឃើញជាក់ស្តែង គឺដាវនេះនៅក្រោមកែបម៉ូតូរបស់ជនសង្ស័យ ។
បច្ចុប្បន្នជនសង្ស័យ និងវត្ថុតាង កម្លាំងនគរបាលជំនាញកំពុងរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមនិតិវិធីច្បាប់ ៕
ចែករំលែកព័តមាននេះ