ខេត្តកំពង់ឆ្នាំង ៖ សមត្ថកិច្ចស្រុកកំពង់លែងបានឲ្យដឹងថា កម្លាំងជំនាញបានឃាត់ខ្លួនជនសង្ស័យម្នាក់ ករណីលួចយកម៉ូតូរបស់ប្រជាពលរដ្ឋ មួយគ្រឿង ដែលទុកចោល ហើយភ្លេចដកកូនសោចេញពីម៉ូតូ ។
ករណីចោរកម្មនេះ បានកើតឡើងនៅវេលាម៉ោង០១និង១០នាទី រសៀលថ្ងៃទី២១ ខែមិថុនា ឆ្នាំ២០២១ នៅចំណុចបឹងវែង ស្ថិតក្នុងភូមិសំរោងសែន ឃុំសំរោងសែន ស្រុកកំពង់លែង ខេត្តកំពង់ឆ្នាំង ។
សមត្ថកិច្ចបានបន្តថា ករណីលួចម៉ូតូមួយគ្រឿងម៉ាកហុងដាឌ្រីម កម្លាំងម៉ាស៊ីន១២៥ ពណ៌ខ្មៅ សេរីឆ្នាំ ២០១៧ ឡើយសេរីឆ្នាំ ២០១៨ ពាក់ស្លាកលេខ ភ្នំពេញ 1GT-8506 នៅចំណុចបឹងវែង ដែលម្ចាស់ម៉ូតូមានឈ្មោះ ដែក សុង ភេទប្រុស អាយុ៦៧ឆ្នាំ សញ្ជាតិខ្មែរ រស់នៅភូមិដារ ឃុំដារ ស្រុកកំពង់លែង ខេត្តកំពង់ឆ្នាំង បានជិះម៉ូតូចេញពីផ្ទះទៅមើលដីស្រែ នៅចំណុចកើតហេតុខាងលើ បានទុក ម៉ូតូនៅលើផ្លូវលំ ដែលមានចម្ងាយប្រហែល ៥០០ម៉ែត្រ ពេលទៅមើលដីស្រែ បានប្រហែល៤០នាទី ដោយនឹកឃើញថា ភ្លេចដកកូនសោចេញពីម៉ូតូ ក៏បានដើរត្រឡប់មកកន្លែងទុកម៉ូតូវិញ ស្រាប់តែបាត់ម៉ូតូ ពីកន្លែងទុកនោះ ហើយក៏បានរត់មករាយការណ៍ជូនកម្លាំងសមត្ថកិច្ចតែម្តង ។
ក្រោពីទទួលបានពាក្យបណ្តឹងពីជនរងគ្រោះភ្លាម កម្លាំងសមត្ថកិច្ច បានចុះដល់កន្លែងកើតហេតុ ធ្វើការស្រាវជ្រាវ រហូតដល់កំណត់មុខសញ្ញាបាន ហើយក៏ឃាត់ខ្លួនជនសង្ស័យម្នាក់ ឈ្មោះអ៊ីម មករា ភេទប្រុស អាយុ២១ឆ្នាំ សញ្ជាតិខ្មែរ រស់នៅភូមិដារ ឃុំដារ ស្រុកកំពង់លែង ខេត្តកំពង់ឆ្នាំង នាំយកមកសាកសួរ ។
តាមរយៈការសួរនាំតាមជំនាញរបស់សមត្ថកិច្ច ជនសង្ស័យក៏ព្រមសារភាព ហើយនាំទៅបង្ហាញទីតាំងម៉ូតូ ដែលខ្លួនយកទៅលាក់ទុកក្នុងព្រៃផងដែរ ។ បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ