រាជធានីភ្នំពេញ ៖ ទោះបីមានការព្យាករណ៍ពីកំណើនសេដ្ឋកិច្ចកម្ពុជាក្នុងឆ្នាំ២០២១នេះថា នឹងមានសញ្ញាវិជ្ជមានឡើងវិញក្ដី តែកត្តាមួយចំនួននៅតែធ្វើឱ្យការព្យាករណ៍នេះមិនទាន់ជឿជាក់១០០ភាគរយលើសេដ្ឋកិច្ចក្នុងឆ្នាំ២០២១ ក្នុងនោះ ធនាគារពិភពលោកប្រចាំកម្ពុជាក៏បានព្យាករណ៍ថា សេដ្ឋកិច្ចកម្ពុជានឹងមានកំណើនឡើងជាវិជ្ជមានឡើងវិញក្នុងឆ្នាំនេះ តែទស្សនវិស័យនៃកំណើននៃនៅតែមិនច្បាស់លាស់ដដែល ។
យោងតាមរបាយការណ៍របស់ធនាគារពិភពលោកប្រចាំកម្ពុជាឱ្យដឹងថាទស្សនៈវិស័យកំណើនរបស់កម្ពុជានៅតែមិនច្បាស់លាស់ខ្លាំង ព្រោះថាសណ្ឋាន និងល្បឿនជាក់ស្ដែងនៃការងើបឡើងវិញ នៅតែមិនច្បាស់លាស់ខ្លាំង ហើយភាគច្រើនពឹងផ្អែកលើការវិវត្តនៃវីរុសកូរ៉ូណា និងល្បឿននៃការចាក់វ៉ាក់សាំងបង្ការជំងឺនេះ ។ ធនាគារពិភពលោកក៏បានលើយកសេវារីយ៉ូពីមកបង្ហាញ ដោយទី១គឺសេណារីយ៉ូគោលដែលផ្អែកលើការសន្មតបែបសុទិដ្ឋិនិយមចំពោះការឆ្លងជំងឺនេះ និងការចាក់វ៉ាក់សាំងបង្ការ និងទី២ សេណារីយ៉ូអវិជ្ជមានបំផុតដែលសន្មតពីហានិភ័យអវិជ្ជមានភាគច្រើន ។
ក្រោមសេណារីយ៉ូ គោល សេដ្ឋកិច្ចកម្ពុជាត្រូវបានព្យាករណ៍ថានឹងកើនឡើង៤ភាគរយនៅឆ្នាំ២០២១ ដែលគាំទ្រដោយការងើបឡើងវិញបណ្ដើរៗនៃតម្រូវការក្នុងស្រុក ក្រោយពីចាក់វ៉ាក់សាំងបង្ការរួច និងកំណើននៃតម្រូវការខាងក្រៅ និងលំហូរចូលមូលធន ។ ការព្យាករនេះសន្មតថាទំនុកចិត្តទីផ្សារបានវិលត្រលប់មកឡើងវិញនៅខណៈដែលការផ្ទុះជំងឺកូវីដ១៩ ក្នុងសហគមន៍ពេលថ្មីៗនេះ ដែលបានចាប់ផ្ដើមនៅខែកុម្ភៈ ២០២១ នៅតែអាចគ្រប់គ្រងបានដែលនាំឱ្យមានការបន្ធូរបន្ថយវិធានការបិទខ្ទប់ជាដំណាក់កាលៗ ដោយមិនបង្កផលប៉ះពាល់ខ្លាំងក្នុងរយៈពេលមធ្យម និងរយៈពេលវែង លើវិស័យសាជីវកម្មឬវិស័យធនាគារឡើយ ។ លំហូរចូលការវិនិយោគផ្ទាល់ពីបរទេសនឹងវិលត្រលប់ទៅរកភាពប្រក្រតីឡើងវិញ ។ ក្រោមសេណារីយ៉ូគោលនេះ ការរំពឹងទុក អាជ្ញាធរកម្ពុជានឹងចាត់វិធានការផ្សេងៗ ក្នុងការទាក់ទាញការវិនិយោគបន្ថែមនិងជំរុញ ពាណិជ្ជកម្មតាមរយៈការគ្រោងដាក់ចេញច្បាប់ស្ដីពីការវិនិយោគ ( ថ្មី) នៅឆមាសទី២ក្នុងឆ្នាំ២០២១ ដោយមានការជំរុញដោយកិច្ចព្រមព្រៀងពាណិជ្ជកម្មសេរីដែលត្រូវបានចុះហត្ថលេខានាពេលថ្មីៗនេះ ។
នៅក្នុងផែនការស្ដារសេដ្ឋកិច្ចរបស់ខ្លួន កម្ពុជាខិតខំបង្កើនភាពប្រកួតប្រជែងតាមរយៈកំណែទម្រង់បរិកាសវិនិយោគនិងការទាញប្រយោជន៍ពីបច្ចេកវិទ្យាឌីជីថល ។ អាជ្ញាធរកម្ពុជាព្យាយាមអនុវត្តគោលនយោបាយសារពើពន្ធគាំទ្រកំណើន ពេលសេដ្ឋកិច្ចមានវិបត្តិ ដោយបន្តអនុវត្តកម្មវិធីគាំពារសង្គម ទន្ទឹមនឹងការជំរុញ ការវិនិយោគសាធារណៈដែលទទួលបានហិរញ្ញប្បទានភាគច្រើនពីប្រាក់សន្សំចរន្តរបស់រដ្ឋាភិបាល ។
ក្រោមសេណារីយ៉ូទាបបំផុត សេដ្ឋកិច្ចកម្ពុជាត្រូវបានព្យាករណ៍ថានឹងកើនឡើង១ភាគរយនៅក្នុងឆ្នាំ២០២១នេះ ។ សេណារីយ៉ូទាបបំផុតសន្មតថា ស្ថានភាពសេដ្ឋកិច្ចក្នុងស្រុកនឹងកាន់តែដុនដាប ដោយសារតែការបិទខ្ទប់ជាច្រើនលើច្រើនសា និងការរឹតត្បិតការធ្វើដំណើរ នៅពេលដែលកិច្ចខិតខំប្រឹងប្រែងក្នុងការរារាំង បិទខ្ទប់ការផ្ទុះជំងឺកូវីឌ១៩ មិនទទួលបានជោគជ័យ ដែលនាំឱ្យសេដ្ឋកិច្ចមិនអាចស្ដារឡើងវិញបាន បើទោះជាស្ថានភាពក្រៅប្រទេសមានភាពប្រសើរក្ដី ។
កិច្ចខិតខំប្រឹងប្រែងរាំងខ្ទប់ធ្វើឱ្យខាតបង់ធនធានសាធារណៈនៅខណៈដែលការអនុវត្តកម្មវិធីចាក់ថ្នាំបង្ការត្រូវបានសន្មតថាមានល្បឿនយឺត ។ ឱនភាពសារពើពន្ធកើនឡើង ព្រោះថាចំណាយកើនឡើង ខណៈដែលប្រាក់ចំណូលក្នុងស្រុកថយចុះយ៉ាងខ្លាំង ដោយសារតែសកម្មភាពសេដ្ឋកិច្ចអសកម្មរយៈពេលយូរ ។ នៅខណៈពេលបន្តមានសម្ពាធបំណុលសាធារណៈនិងសម្ពាធថវិកាកម្ចីខាងក្រៅនិងការថយចុះប្រាក់សន្សំចរន្តរបស់រាជរដ្ឋាភិបាលកើនឡើង ដែលត្រូវការពេលវេលាកាន់តែច្រើនដើម្បីឱ្យរដ្ឋាភិបលាអាចស្ដារផ្នែកសារពើពន្ធបាន៕
ចែករំលែកព័តមាននេះ